Faaaogā Mea o Loo Tutupu e Faagaee ai le Fiafia
1 Pe e te manaʻo e faaauau pea ona e maua ni manatu lelei na o le a faafouina ai pea lau faiva ma faagaee ai le naunau o tagata i le feʻau o le Tusi Paia? Ia faaaogā la mea o loo tutupu i le lalolagi ma i lou lava nuu e amata ai ni talanoaga. E mafai ona e maua mai ni manatu mai i tala o mea tutupu i lou vaipanoa, le nuu, po o tala faava-o-malo. Ua oo foʻi ina suia pea nei mea. (1 Kori. 7:31) Manatu i ni faaaʻoaʻoga nei.
2 O faafitauli tau tamaoaiga ma le taugatā o le soifuaga ua matuā faapopoleina ai tagata. O lea, e mafai ona e faapea atu:
◼ “Pe sa e faalogo i tala fou e uiga i le tau o le [taʻua le mea] ua toe sii foʻi?” Pe e mafai foʻi ona e fai atu se manatu e uiga i le leai o ni galuega pe afai e toʻatele ni tagata faigaluega a se kamupani tele ua vāea. E faalagolago i le auala e te manaʻo e faaauau ai le talanoaga, e mafai ona e faaauau i lou fesili atu e faapea,“Pe sa e taumānatu pe aiseā ua matuā faigatā ai ona maua ni mea e ola ai?” pe e te fesili atu foʻi, “Pe e te manatu o le a tumau ai pea le faigatā ona maua o ni mea e ola ai?”
3 O lipoti e uiga i faiga sauā, e pei o mala i aiga po o tamaiti aʻoga, ua saunia ai foʻi se faavae mo se isi talanoaga. E mafai ona e fesili atu:
◼ “Sa e faitau i le nusipepa e uiga i le [taʻua se mala i le nuu]?” Ona e fesili atu lea, “O le ā sou manatu i le pogai ua tele ai faiga sauā i le lalolagi?” po o le, “Pe e te manatu o le a iai se taimi e mafai ona tatou lagona ai le saogalemu?”
4 Tala i lōlōga mataʻutia, o mafuiʻe, po o fevesiaʻiga a tagata o se atunuu lava latou i vaega eseese o le lalolagi ua maua ai foʻi mataupu e faatupu ai le naunau. Mo se faaaʻoaʻoga, e mafai ona e fesili atu:
◼ “Pe tuuaʻia le Atua ona o le [taʻua le mala faalenatura]?” E mafai foʻi ona e faasino atu i se tulaga fou o fevesiaʻiga a tagata o se atunuu ma faapea atu: “Afai e mananaʻo tagata uma i le filemu, aiseā ua faigatā ai ona maua?”
5 Ia mataalia i mea fou e tutupu e mafai ona faaaogā i lau faatomuaga. O loo maua isi fautuaga aogā i lalo o le ulutala “Mea Tutupu i Taimi Nei,” i le itulau e 3 o le tamaʻi tusi, Le Auala e Amata ma Faaauau ai Talanoaga Faale-Tusi Paia. Ae peitaʻi, ia ʻalofia le faaituʻau i mataupu faapolotiki po o mataupu lautele faaletagata. Na i lo lea, tataʻi saʻo le manatu i le Tusi Paia ma le Malo o le Atua e na o lea le vaifofō tumau i faafitauli o le fanau a tagata.