Talisapaia le Uiga o Mea o loo Tutupu
1 “O le a mavae atu le tu o le lalolagi nei.” (1 Kori. 7:31) Ua atagia lea i le saosaoa o mea o loo tutupu. Faatasi ma mea uma lava o loo tutupu i le faalapotopotoga a Ieova, o le ā ua uiga i ai lenei mea mo oe totino?—Luka 21:28.
2 O le faataunuuga o valoaga a le Tusi Paia i lenei 20 senituri ua faamautinoa ai faapea ua iai lenei faiga aoao o mea amioleaga i ona aso e gata ai. (Mata. 24:3-14; Luka 21:7-11) Na fetalai Iesu faapea “e le mavae atu lenei tupulaga, seia taunuu mea uma.” (Luka 21:32) Pe e te talisapaia le uiga o lenei mea mo tagata i lau oganuu o ē e leʻi tutū lava i le itu a Ieova? Afai o e faia faapena, o le ā le āuga o lenei mea i lau faiva i le fanua?—Luka 21:34-36.
3 Fesoasoani i iai a o iai le Taimi: Sa uunaia e Iesu ona soʻo e faaaogā tatau tulaga talileleia ina ia faalauiloa atu ai le tala lelei. (Ioane 9:4) Na toe taʻua foi e le aposetolo o Paulo lena fautuaga ina ua ia uunaia uso i Kolose e “savavali [pea] ma le poto i e o i tua, ma [ia faatau mai le taimi avanoa].”—Kolo. 4:5.
4 Ua utagiaina e nisi fautuaga a le aposetolo ina ia faatau mai le taimi ma ua avea ai ma paeonia sauatoa. E toatele talavou ua auai i le auaunaga faapaeonia sauatoa a o iai pea i aʻoga ma ua maua ai ni taunuuga manuia i le faia faapea. E mafai e talavou i aʻoga ona faatau mai le taimi avanoa e fesoasoani ai i uo i vasega ina ia malamalama i le uiga o mea o loo tutupu i aso nei ma le faamoemoe pupula mo le lumanai i lalo o le Malo o le Atua.—Fai. 12:1.
5 E mafai ona tatou faaaogā tatau lo tatou taimi i le faiva i le fanua ia Oketopa e faatomua ai mekasini o Le Olomatamata ma le Awake! i avanoa uma. Ua aumaia e nei lomiga le malamalamaga i le uiga moni o mea o loo tutupu. Ia ofoina atu ia mekasini i tagata e manatu mamafa e te tau i ai a o e galue i lea fale ma lea fale. Ia tausolomua ona ofo atu i uo i vasega po o tagata i le mea e te faigaluega ai. Faamatilatila mataupu atonu e naunau patino i ai tagata e te iloa. Mo se faaaʻoaʻoga, ua iai i le Awake! o Setema 8, 1991, mataupu e uiga i Malo Aufaatasi ma lana sailiga mo le filemu. E toatele tagata e manatu mamafa i lenei mataupu.
6 E mafai faapefea ona faaaogā le Mataupu mo Talanoaga o loo iai? A maeʻa ona faailoa atu oe, e mafai ona e fesili atu i lē ona le fale: “O le ā sou manatu i le pogai ua fesagaʻi ai faigamalo ma le tele o faafetauli faamomoiloto ua faapea ona faalavelavea ai la latou sailiga mo le filemu i aso nei?” A uma lana tali mai, e mafai ona e faaopoopo atu: “Ua faamatala mai e le Tusi Paia faapea e lē mafai ona tatou faamoemoe i taʻitaʻi faaletagata latou te aumaia le filemu moni. Matau le mea ua taʻua i le Salamo 146:3 [Faitau.] Pe e te ioe i le mea ua taʻua i inei? [Faataga mo se tali.] O le ā la sau tala e uiga i le pulega mai le Atua? [Faataga e tali mai.] O le mau lenei ua aumai ai ia i tatou se faamautinoaga mo se lumanai filemu. [Faitau Tanielu 2:44.] E oo foi i Malo Aufaatasi e lē mafai ona taulau i lana sailiga mo le filemu. Seʻi matau le mataupu lea ua iloiloina i la matau mekasini fou o le Awake!” Ma, e faalagolago i le naunau e faaalia, atonu e te filifili ai pe ao ona e ofoina i ai se tusiga po o mekasini taitasi pe e sili atu ona talafeagai le tau ina tuu ai o se sāvali.
7 E lē toe tau masalomia o ni aso faaosofiafia nei e auauna ai ia Ieova. Talosia ia uunaia i tatou e lenei mea moni ina ia faaaogā tatau ai avanoa i lenei masina e fesoasoani ai i ni tagata loto faamaoni e toatele ina ia iloa le uiga moni o loo i tua o mea o loo tutupu i le taimi nei.