Pusa Fesili

◼ E mafai faapefea ona fesoasoani atu i se tagata ua lē toe talaʻi mo se taimi umi ina ia toe agavaa e avea o se tagata talaʻi o le tala lelei?

Pe a faamaonia mai e le tagata ua lē toe talaʻi lona faanaunauga mai le loto e auauna ia Ieova, o se māfuaaga lenei e olioli ai. (Luka 15:4-6) E foliga mai ona o le faatagaina e le tagata o teteega po o omiga o le olaga e taofia ai ana suʻesuʻega totino, auai i sauniga, ma le auai i le faiva i le fanua. O le ā se auala e sili ona lelei e avatu ai se fesoasoani totino ina ia mafai ai ona ia agaʻigaʻi i luma faaleagaga?

E ao ia i tatou uma lava ona tausolomua i le faamautinoa atu i lenei tagata lo tatou alofa faa-Kerisiano moni mo ia. O le a vave ai lava ona fuafuaina e toeaina ona manaʻoga patino faaleagaga. (Iako. 5:14, 15) Pe afai e puupuu se taimi na lē toe talaʻi ai, atonu e na o le pau lava se mea o manaʻomia o se fesoasoani mai se tagata talaʻi poto masani ina ia toe amata ai le tagata i le auaunaga i le fanua. Ae peitaʻi, afai na umi se taimi e leʻi toe auaufaatasi ai le tagata ua lē toe talaʻi ma le faapotopotoga, atonu la e tatau ona tuuina atu atili se fesoasoani. Ina ia atiina aʻe le faatuatua ma le talisapaia, atonu e manaʻomia le faia o se suʻesuʻega totino faale-Tusi Paia i se lomiga talafeagai. I lena tulaga, o le a fuafuaina ai e le ovasia o le auaunaga ia se tagata talaʻi agavaa na te faia le suʻesuʻega. (Epe. 5:12-14; tagaʻi i le Pusa Fesili o La Tatou Faiva o le Malo o Novema 1998.) Afai e te iloaina se tasi o manaʻomia se fesoasoani faapena, ona e talanoa atu lea i le ovasia o le auaunaga i lau faapotopotoga.

A o leʻi valaauliaina le tagata ua leva ona lē toe talaʻi ina ia toe faia se sao i le faiva, e fautuaina ina ia toe faia se feiloaʻiga ma ni toeaina se toʻalua ina ia iloa ai po o agavaa o ia e avea ma tagata talaʻi o le Malo. E latou te mulimuli i se taualumaga e talitutusa ma lea e faaaogāina pe a feiloaʻi ma tagata fou o ē o loo mananaʻo ina ia taʻuagavaaina e avea ma tagata talaʻi o le tala lelei. (Tagaʻi i Le Olomatamata, Iuni 1, 1989, itulau 29.) E ao i le tagata ua lē o toe talaʻi ona naunau faamaoni e tufa atu le tala lelei i isi. E manaʻomia foʻi ona ia ausia ia tapulaa manaʻomia na o loo faataatia mai i itulau e 98-99 o le tusi Our Ministry ma ia tausisia pea le auai i sauniga a le faapotopotoga.

O le iai o se masaniga lelei faaleagaga o le a tele ai mea e mafai ona fesoasoani ai i lē ua toe foʻi mai ina ia faamalosia ma tausisia pea lana faiā tāua ma Ieova ma ia savali ai pea i le ala i le ola e faavavau. (Mata. 7:14; Epe. 10:23-25) O lona faia o ni taumafaiga ma le “matuā faamalosi” ma atiina aʻe uiga faa-Kerisiano e tumau, o le a puipuia ai o ia mai le toe avea o se soo Kerisiano ‘ua paiē, pe e lē fua mai.’—2 Pete. 1:5-8.