Ia Avea o Sē Faia ma le Fiafia
1 Na fetalai Iesu e faapea, i le taimi o lona faatasi mai, e matuā anoanoaʻi tagata o le a latou ‘lē ano’ mai e pei lava o ona pō o Noa. (Mata. 24:37-39, NW) Ua faatalitalia la e faapea, e toʻatele tagata o le a lē faalogo i le tala lelei o le Malo. O le ā e mafai ona fesoasoani ia i tatou e tausia ai se agaga fiafia a o faia la tatou faiva?—Sala. 100:2.
2 Muamua, e manaʻomia ona tatou manatua e faapea, o la tatou feʻau ma lo tatou tofiga e talaʻi e mai le Atua. Afai lava la e lē tali mai i le faiva e ui lava i a tatou taumafaiga silisili, o le mea moni o le teena lava lena o Ieova. O le manatuaina e faapea, o lo tatou faamaoni i le talaʻiga ua iai lana faamaoniga, o le a fesoasoani lea ia te i tatou e tausia ai lo tatou olioli ma le lotofiafia i le avea o sē e faia le afioga a le Atua.—Iako. 1:25.
3 Lona lua, o loo iai pea tagata o ē o le a talia auala a Ieova o le faaolataga. E ui lava e toʻatele atonu e lē ano mai, ae o loo iai pea i latou e pei o ni mamoe e tatau ona aoaoina mai, e oo lava i le taimi nei, a o tatou matuā tulata atu i le iʻuga. E manaʻomia ona tatou talaʻi pea, ia ō atu i “se aai po o se faoa aai” e “fesili po o ai se i ai ua tatau.”—Mata. 10:11-13.
4 Ia Tausia se Uiga Mautinoa: O le talaaga leaga o lotu sesē ua lē mautonu ai nisi. O isi ua “lailoa i latou ma tuulafoaiina” e lenei faiga o mea. (Mata. 9:36) E toʻatele atonu ua lofitūina ona o le leai o ni a latou galuega, tausiga o le soifua mālōlōina, ma le saogalemu. O le malamalama i lenei mea o le a fesoasoani ia i tatou e finafinau ai i la tatou galuega. Taumafai e faamaʻite ni talanoaga e faatatau i mataupu e sili ona popole i ai tagata i la tatou oganuu. Fesoasoani ia i latou e iloa o le Malo o le Atua e na o le pau lena o le vaifofō. Faaaogā mau faale-Tusi Paia ma manatu patino i lomiga e pāʻia ai o latou loto i le tala lelei.—Epe. 4:12.
5 E manatua pea e ē o faia ma le fiafia le afioga a le Atua e faapea: “O le fiafia ia Ieova o lo [tatou] malosi lea.” (Nee. 8:10) E lē manaʻomia ona leiloa lo tatou fiafia. “Pe afai foi ua tatau lea aiga, ia oo atu i ai la outou faamanuia; a e afai ua le tatau, ia toe foi mai ai ia te outou la outou faamanuia.” (Mata. 10:13) E faafouina ma faamalosia e Ieova lo tatou fiafia a o tatou tumau ma le onosai i lana auaunaga paia ma na te faamanuiaina lo tatou faamaoni.