Vivii Atu ia Ieova e Ala i Galuega Lelei
1 Pe a maua oe i se matagi malosi, maʻeu se mapusaga pe afai e mafai ona maua se lafitaga! Pe afai e māfanafana ma saogalemu lena lafitaga ma afai foʻi e faaalia ane le agaga talimalo o tagata o loo nonofo ai, ua e fiafia la e te nofo ai iinā. Ua tataʻi atu e le galuega talaʻi o le Malo tagata i se lafitaga faapena mai le faiga o mea a Satani. Pe e mafai e a tatou amioga i aso faisoo ona fesoasoani i isi ina ia iloa, le matagofie o lenei lafitaga saogalemu? Ioe, auā na fetalai Iesu e faapea, o le a ‘iloa la tatou amio lelei’ e tagata ‘ma latou vivii atu ai i lo tatou Tamā o i le lagi.’—Mata. 5:16.
2 E mafai faapefea ona tatou amioaʻi, ina ia mafai e a tatou galuega ona faatosina mai ai isi ia Ieova ma lana faalapotopotoga? E ala i le faaleleia o o tatou olaga i aso taʻitasi, e tusa ai ma fetalaiga a Iesu i le Luka 6:31 ma le 10:27. O le a uunaʻia i tatou e lenei mea e faailoa atu le manatu alofa mo uso a tagata, e faaesea ai i tatou mai i lenei lalolagi lē alofa ma le lē amanaʻiaina o isi.
3 Sa mātauina e se tuafafine sa faimalaga i se vaa se tasi fafine talavou sa maʻi vasa, ma sa lē mafai ona ia vaaia lana tama laʻitiiti. Sa ofo atu le tuafafine e na te vaaia le tamaitiiti. Ina ua fesili atu le fafine pe e iai se auala e mafai ona ia faailoa atu ai lona lotofaafetai, na faapea atu le tuafafine: ‘Faamolemole, ia e faalogo i Molimau a Ieova i se isi taimi e latou te asiasi atu ai.’ Na faia faapena e le fafine, ma i le taimi nei ua avea ai o ia ma lana tane ma Molimau. O galuega lelei, na suia ai le auala na la tali mai ai i le feʻau o le Malo.
4 Ua Aafia ai o Tatou Olaga Atoa: O a tatou amioga i le nuu, a o iai i le galuega po o le aʻoga ma i taimi o faafiafiaga, ua faapogai ai ona faatupu e nisi ni manatu sesē e uiga ia i tatou ma la tatou lotu. O lea, e lelei ai ona tatou fesili ifo ia te i tatou lava e faapea: ‘O le ā le manatu o tagata o loo vaavaai mai ia te aʻu ma loʻu aiga? Po o manatu o tatou tuaoi i lo tatou fale ma le fanua e mamā ma tausia lelei? Po o manatu a tatou aumea i le galuega ma le aʻoga o i tatou o ni ē taunuu vave atu ma e filigā? Po o le a vaai mai isi ia te i tatou o ni ē e foliga mamā ma faaaloalo?’ O a tatou galuega lelei ua mafai ona avea ai le tapuaʻiga ia Ieova o se mea e sili atu ona tosina mai ai isi.
5 Na lapataʻi mai Peteru o le a tauemua Kerisiano. (1 Pete. 4:4) E tatau ona tatou faamautinoa ia lē avea a tatou amioga ma pogai o talanoaga lē lelei. (1 Pete. 2:12) Afai o a tatou galuega i aso faisoo e viia ai le Atua lea o loo tatou tapuaʻi atu i ai, ona avea lea o i tatou e pei o ni molī ua tuu i se mea maualuga, e faatosina mai i ai isi i le lafitaga saogalemu lea ua saunia e Ieova.—Mata. 5:14-16.