Le Auala e Faatalitonu ai Isi
1 Sa lauiloa le aposetolo o Paulo o se faifeʻau e na te faatalitonuina tagata. (Galu. 19:26) E oo lava i le tupu o Akeripa na ia taʻu atu ia te ia e faapea: “O se mea itiiti ona e faaliliuina [“faatalitonuina,” NW] ai aʻu e fai ma Kerisiano.” (Galu. 26:28, LF) O le ā na avea ai le faiva a Paulo o se mea e faatalitonu ai tagata? Sa ia talanoa saʻo mai i le Tusi Paia, i le faafetaui atu o ona manatu i lana ʻaufaalogologo.—Galu. 28:23.
2 I le faaaʻoaʻo ia Paulo, e manaʻomia ai foʻi ona avea i tatou o ni ē e faatalitonuina tagata i la tatou faiva. E faapefea? E ala i le faaaogāina o le tofā mamao pe a talanoa atu ma i le faalogologo atu i isi. (Faata. 16:23) E tolu ni laasaga tāua o le a fesoasoani ia i tatou e faataunuuina ai lenei mea.
3 Faalogologo Lelei: A o tautala le isi tagata, ia faalogologo lelei mo se manatu e te lua tau fai ioe uma i ai e mafai ona faavae ai se talanoaga. Afai e na te lāgā se teteega, taumafai ia malamalama i le manatu o loo faavae ai. O le iloa tonu o le aano o lona talitonuga, o le a fesoasoani e malamalama ai i le tonu o le māfuaaga ua ia talitonuina ai, ma o le ā na faatalitonuina ai o ia. (Faata. 18:13) Ia taumafai i se auala tomai e utufia mai ai ona manatu.
4 Fai Atu ni Fesili: Afai e faaalia e se tagata lona talitonuga i le Tolutasi, e mafai ona e fesili atu: “Po ua leva ona e talitonu i le Tolutasi?” Ona e toe fesili atu lea: “Sa e suʻesuʻe māeʻaeʻa i le mea o loo fai mai ai le Tusi Paia e uiga i le mataupu?” E mafai foʻi ona e fesili atu: “Afai o le Atua o se vaega o le Tolutasi, pe tatou te lē faatalitalia ea la o le a faailoa manino mai lenei mea i le Tusi Paia?” O tali o le a e maua, o le a fesoasoani lea ia te oe e fefulifulisaʻi ai ma le tagata e uiga i faamatalaga a le Tusi Paia.
5 Faaaogā Fefulifulisaʻiga Talafeagai: Na fesili atu se Molimau i se fafine, o lē sa talitonu o Iesu o le Atua: ‘Afai e te taumafai e faataʻitaʻi mai e faapea e tutusa ni tagata se toʻalua, o le ā le faiā faaleaiga e te ono faaaogāina?’ Sa ia tali mai: “Ou te ono faaaogāina se ʻauso se toʻalua.” Na faaopoopo atu le Molimau: “Atonu po o le faailoaina foʻi o se masaga. Ae i le aʻoaʻoina o i tatou ina ia manatu i le Atua e faapea o le Tamā ma o ia o le Atalii, o le ā le feʻau sa faailoa mai e Iesu?” Sa iloa e le fafine le aano o le manatu e faapea, o le tasi e matua ma e sili atu lana pule. (Mata. 20:23; Ioa. 14:28; 20:17) Sa pāʻia lona loto ma le mafaufau ona o le tomai e faatalitonu ai.
6 E moni, e lē o tagata uma e tali lelei mai i le upu moni, e tusa lava po o le ā le talafeagai ma le saʻo o a tatou taulimaga. Ae i le pei o Paulo, seʻi o tatou filigā i le saʻilia o tagata lotofaamaoni i la tatou oganuu, i le faatalitonuina o i latou ina ia talia le feʻau o le Malo.—Galu. 19:8.