Ia Faatalitonu Tagata e Ala i Lau Aʻoaʻo Atu
1. O le ā e masani ona aofia ai i le faaaogā lelei o le Afioga a le Atua i le faiva?
1 O faifeʻau e taulau manuia, e pei o le aposetolo o Paulo, e latou te iloa o le “taulimaina ma le saʻo” o le upu moni e tele mea e aofia ai nai lo le na ona sii mai o manatu mai le Tusi Paia. (2 Timo. 2:15) Pe a tatou faaaogā le Afioga a le Atua, e faapefea ona tatou taumafai e “faatalitonu” isi e ala i la tatou aʻoaʻo atu?—Galu. 28:23.
2. E faapefea ona tatou fesoasoani i tagata ia matuā faaaloalo i le Afioga a le Atua?
2 Taʻu i ai le Mea o Fai Mai ai le Afioga a le Atua: O le mea muamua, ia faauaʻi atu manatu i le Tusi Paia i se auala e talia ai ma le faaaloalo e le tagata, o loo i le Tusi Paia le atamai o le Atua. O lo tatou maufaatuatuaina o le Tusi Paia e ono uunaʻia ai foʻi le tagata e uaʻi totoʻa mai pe a faitau se mau. (Epe. 4:12) E mafai ona tatou faapea atu: “Ou te talitonu i le aogā o le iloa o le finagalo o le Atua e faatatau i lenei mataupu. Mātau le mea o fai mai ai lana Afioga.” So o se taimi e talafeagai ai, taʻu i ai le mea o fai mai ai le Afioga a le Atua e ala i le faitau i ai o se mau.
3. Pe a uma ona faitau se mau, o le ā e ao ona fai e fesoasoani i le tagata ina ia malamalama i le uiga?
3 O lona lua, faamatala le mau. O le toʻatele e lē faigofie ona malamalama i se mau i le taimi muamua e faitau ai. O le tele lava o taimi, e manaʻomia ona tatou faamalamalama le faatatauga o le mau i le mataupu. (Luka 24:26, 27) Faauaʻi atu manatu i faaupuga tāua o le mau e lagolagoina lau mataupu. Atonu e aogā se fesili ina ia faamautinoa ai ua malamalama i le manatu tāua o le mau.—Faata. 20:5; Galu. 8:30.
4. O le ā le laasaga mulimuli e manaʻomia ina ia faatalitonu e ala i la tatou aʻoaʻo atu?
4 Ia Fefulifulisaʻi i le Tusi Paia: O lona tolu, taumafai malosi ia pāʻia le mafaufau ma le loto. Fesoasoani i le tagata o le aiga ia iloa le auala e faatatau ai le mau iā te ia. O le fefulifulisaʻi i le Tusi Paia e mafai ona fesoasoani i le tagata e suia ona manatu. (Galu. 17:2-4; 19:8) Mo se faaaʻoaʻoga, pe a uma ona faitau le Salamo 83:18 e mafai ona tatou fefulifulisaʻi i le mea moni, o le iloa o le igoa o se tasi e mafai ona faavae ai se faiā totino. Atonu e sosoo ai ma le faapea atu, “Pe e te manatu o le iloa o le suafa o le Atua e mafai ona uigā atili ai au tatalo?” Ona faafesootaʻi loa lea o le mau i le soifuaga o le tagata o le aiga i le uiga e pei ona faamatalaina i inei ina ia faataʻitaʻia ai lona aogā. O lou aʻoaʻo atu i se uiga e faatalitonu ai faapena mai le Afioga a le Atua, e mafai ona tosina mai ai tagata loto faamaoni e tapuaʻi i le Atua moni o loo soifua o Ieova.—Iere. 10:10.