Seʻi o Tatou Faamamaluina Uma Ieova ma Lona Alo
Le Auala e Mafai ai e Ē Uma e Auai i le Faamanatuga ia Aperila 8 Ona Maua Aogā Atoatoa
1 O ai o loo faamamaluina faapitoa i aso nei? O ē o loo sili ona manatu maualuga i ai le lalolagi ona o mea na latou faataunuuina. Ae peitaʻi, i le tele o tulaga, e lē umi lava se taimi ae galo atu a latou gaoioiga. Ae faapefea gaoioiga e aogā moni mo le fanau uma a tagata? O le aupito sili o nei gaoioiga, o le a tatou uaʻi totoʻa atu i ai a o tatou faamanatuina le Talisuaga Afiafi a le Alii pe a goto le lā ia Aperila 8, 2001.
2 O ai ua tatau ona matuā faamamaluina? Ua tali mai le Tusi Paia: “[Ieova] e, . . . e tatau lava oe ina ia tuuina atu ia te oe le viiga, ma le faaneeneega [“mamalu,” NW], ma le mana; auā na e faia mea uma lava.” (Faaa. 4:11) Ona o ia o Lē na Foafoaina Mea, ua avea ai la Ieova ma Pule Silisili Ese o le vateatea. E lē taitai ona mou atu le tatau ona faamamaluina o ia!—1 Timo. 1:17.
3 Sa faia e Iesu Keriso, le Alo o le Atua, ia gaoioiga aogā o le a aumaia ai faamanuiaga e lē gata mai mo le fanau a tagata. Sa ia faataʻitaʻi atoatoa i lona Tamā. (Ioa. 5:19) O lona usiusitai ma le lē ponā ma lana auaunaga faamaoni, “ua tatau . . . ina tuuina atu ia te ia le mana, ma le oa, ma le poto, ma le malosi, ma le faaneeneega [“mamalu,” NW] ma le viiga, ma le faamanū.” (Faaa. 5:12) Sa faamamaluina o ia e lona Tamā e ala i le faauuina o ia e fai ma Tupu. (Sala. 2:6-8) Ae mo i tatou, o le a tatou maua le avanoa e faamamaluina ai le Tamā ma le Alo a o tatou faamanatuina le Talisuaga Afiafi a le Alii ia Aperila 8, 2001.
4 O se mea e faanoanoa ai, ona e matuā toʻaitiiti lava i latou i le talafaasolopito o tagata o loo avatua le mamalu e tatau ai ia Ieova ma lona Alo. Sa iai taimi, e oo lava i tagata o le Atua i aso anamua, le nuu o Isaraelu, sa tuuina atu na o se auaunaga e tau ina fai ia Ieova. Sa manino mai ai lava le matuā lē faaaloalo. (Mala. 1:6) O le faaaloalo tatau, e manaʻomia ai le usiusitai faamaoni e faavae i le alofa ma le talisapaia o mea uma na faia e Ieova ma lona Alo mo i tatou. O le tuuina atu o lena mamalu ma le faaaloalo, o lona uiga e tatau ona tatou faaalia le mataʻu faale-Atua ma le migao e tatau ai, i le amanaʻiaina o Ieova ma Iesu i o tatou ala uma. E taumafai foʻi le faapotopotoga Kerisiano e aʻoaʻo ma fesoasoani atu i isi ina ia faia lea lava mea.
5 Se Sauniga Faapitoa e Faaali Atu ai le Faamamaluina: O le faamanatuina o le Faamanatuga, o le faatasiga sili lea ona tāua i tausaga taʻitasi i tagata o Ieova. O tagata uma o ē mananaʻo e auauna ma faamamaluina Ieova e tatau ona auai. (Luka 22:19) E tatou te faatalitalia e faapea, e faaopoopo i le 6 miliona o Molimau maelega, o le a faateleina e sili atu i le 14 miliona le aofia o ē lotofiafia o le a auai. Maʻeu se avanoa lelei e faamamaluina ai lo tatou Tamā faalelagi! A o taulaʻi atu le faamanatuga ia Iesu, o le āva ma le faaaloalo ua faaalia mo le mea na ia faataunuuina e viia ai le Tamā o lē na auina mai o ia.—Ioa. 5:23.
6 O le ā e mafai ona tatou faia ina ia lagolagoina ai lenei sauniga faapitoa? E mafai ona tatou fesoasoani i ē e fou lotofiafia ina ia mauaina atoatoa aogā. Faalaeiau i latou ina ia auai, ma afai e manaʻomia, ofo atu i ai se fesoasoani agalelei ia i latou ina ia mafai ai ona iai iinā. Faamatala le fuafuaga o le lauga. Faafeiloaʻi atu i latou i isi. O mea o latou vaai ma faalogo i ai, e mafai ona uunaʻia ai i latou ina ia taumafai e aufaatasi ma i tatou i le faamamaluina o Ieova.
7 Aua neʻi manatu māmā i le aogā o le polokalame. O le manatu lenei na faaalia e se tagata aʻoga i se iunivesite e faapea: “E tele lava taimi na ou alu ai i Komenio i laʻu lotu, ae o le sauniga lenei, e matuā ese lava. Ua ou iloa o le mea tonu lava lenei o loo fai mai ai le Tusi Paia, ma ua ou manatu o loo ia te outou le upu moni.” Sa amata loa ona ia auai e lē aunoa i sauniga ma sa leʻi pine ae papatisoina o ia.
8 Fesoasoani i Ē Fou Ina ia Agaʻigaʻi i Luma: Ia mātau i latou o ē e fou na auai i le Faamanatuga ma ia vave ona asia i se taimi mulimuli ane, ina ia autalu mea e faafouina ai na latou aʻoaʻoina ma mātauina. Ia faailoa atu ia te i latou isi sauniga, e mafai ona faaopoopoina ai lo latou poto i le Tusi Paia. O le autaluina o le mataupu e 17 o le tusi o Le Poto, “Ia Maua le Saogalemu i le Aufaatasiga ma Tagata o le Atua,” o le a faailoa atu ai ia i latou le anoanoaʻi o sauniuniga faaleagaga ua ofoina mai e le faapotopotoga, ia e mafai ona latou maua. Fai se fuafuaga ina ia latou matamata i le vitiō Our Whole Association of Brothers ina ia mafai ai ona molimauina e i latou lava le autasi, olioli ma le maelega o tagata o Ieova!
9 E tāua ona aʻoaʻoina e tagata lotofiafia le auala e mafai ona latou faaalia totino ai le faamamaluina ma le faaaloalo mo Ieova. Faamatala i ai e faapea, o tatalo mai i le loto e faafiafia ai Ieova ma o se puna e lē aunoa o le faafouina faaleagaga. (1 Ioa. 5:14) O le faaaogāina o le lesona 8 e oo i le 12 i le polosiua o le Manaomia, ua faamatalaina ai ituaiga o amioga e faamamaluina ai Ieova. E ala i le talanoaina o le mea o loo taʻua i le polosiua Faia o le Finagalo o le Atua, itulau e 22-23, faalaeiau tagata fou ina ia mafaufau i le avanoa e faamamaluina ai Ieova e ala i le faia totino o se sao i le galuega talaʻi.
10 O le talisapaia o le taulaga a Iesu ma lo tatou faaeaga o le auauna e avea ma ona soo, ua faamamaluina ai le Tamā ma aumaia ai faamanuiaga i isi. Na folafola mai e Iesu: “Pe a auauna mai foi se tasi ia te au, ona viia [“faamamaluina,” NW] lea o ia e le Tamā.”—Ioa. 12:26.