Ia Pāʻia le Loto o Lau Tagata Suʻesuʻe
1 A o leʻi afio aʻe i le lagi, na fetalai atu Iesu i ona soo ia aʻoaʻo isi e “tausi” i mea uma ua ia poloaʻi atu ai. (Mata. 28:19, 20) Afai o le a “tausi” e se tagata poloaʻiga a Keriso, e tatau la ona pāʻia lona loto e faamatalaga. (Sala. 119:112) E mafai faapefea ona e pāʻia le loto o se tasi o loo lua suʻesuʻeina le Tusi Paia?
2 Tatalo mo le Taʻitaʻiga a Ieova: O le faia o soo, o le galuega a le Atua. O lana faamanuiaga, ae lē o ni o tatou tomai, e manaʻomia lava mo le taulau manuia. (Galu. 16:14; 1 Kori. 3:7) O lea, e tatau ona tatalo mo le fesoasoani a Ieova i le aʻoaʻoina o le upu moni i isi.—Isa. 50:4.
3 Ia Iloa Mea e Talitonu i ai le Tagata Suʻesuʻe: O le iloaina o mea e talitonu i ai tagata ma le pogai e latou te talitonuina ai, e mafai ona tatou malamalama ai po o ā mea e tatau ona tatou fai atu ai ina ia pāʻia o latou loto. Aiseā e fiafia ai le tagata suʻesuʻe i se aʻoaʻoga patino? O le ā ua faamautinoa ai iā te ia e faapea e tatau ona ia talitonu i ai? O lena iloa e mafai ona fesoasoani iā i tatou e tautala atu ai ma le faautauta.—Galu. 17:22, 23.
4 Atiina Aʻe se Faamatalaga Saʻo ma Faale-Tusi Paia: E tatau ona uigā le upu moni i le tagata suʻesuʻe. (Galu. 17:24-31) E tatau ona tatou avatu se māfuaaga lelei mo lo tatou faamoemoe. (1 Pete. 3:15) Ae peitaʻi, ia faia pea i se uiga agalelei, ma le onosai.
5 Ia Lagolagoina e Tala Faatusa: E lē gata o tala faatusa e faigofie ai ona malamalama le tagata suʻesuʻe, ae e faagaee ai foʻi faalogona. O tala faatusa e mafai ona faaaafia ai le mafaufau ma le loto. Sa masani lava ona faaaogā e Iesu tala faatusa. (Mare. 4:33, 34) O le mea moni, ina ia aogā, e tatau ona fetaui le tala faatusa ma le manatu lea e talanoaina, ma e tatau ona fesootaʻi atu i le olaga o le tagata suʻesuʻe.
6 Faailoa Atu Aogā o le Taliaina o le Upu Moni: E fia iloa e tagata aogā o le faatatauina o mea o loo latou aʻoaʻoina. Fesoasoani i lau tagata suʻesuʻe e iloa le atamai o upu a Paulo i le 2 Timoteo 3:14-17.
7 Aua le lotovaivai pe afai e lē tali mai nisi i lau aʻoaʻoga. E lē o loto uma e talisapaia. (Mata. 13:15) Peitaʻi ane, o nisi tagata ua avea ma tagata talitonu. (Galu. 17:32-34) Tau ina ia avea au taumafaiga e pāʻia loto i le tala lelei ma fesoasoani ina ia talia ma “tausi” e le toʻatele mea na poloaʻi mai ai Iesu.