Po o Lelei Lau Taumafa Faaleagaga?

1. O ā aafiaga e tatou te ono oo i ai ona o meaʻai tatou te taumafaina?

¹ Ua faapea mai se muagagana, ‘e aafia i tatou i mea tatou te aai ai.’ E moni, e aafia ai lo tatou malosi faaletino ma le soifua mālōlōina i mea e masani ona tatou aai ai. Talu ai o Iesu na fetalai “e lē na o meaʻai e ola ai le tagata, ae o afioga uma e tulei mai i le fofoga o Ieova,” o a tatou meaʻai faaleagaga, e faapena ona aafia ai i tatou a lē o le lelei o leaga. (Mata. 4:4) O lea la, po o lelei lau taumafa faaleagaga? Po o oe o se tasi e ʻai filifili? Pe e faatopetope ona e taumafa? Po o le mea o e faaalu le taimi e olioli ai e lē aunoa e taumafa i meaʻai paleni faaleagaga?

2. Aiseā e tatau ai ona tatou taumafai e taumamafa lelei i meaʻai faaleagaga?

² Iloilo Lau Mea Taumafa: Ua saunia e Ieova “meaʻai i le taimi tatau” ma “le faigaʻai o mea lelei,” e ala mai i “le pologa faamaoni ma le faautauta.” (Mata. 24:45; Isa. 25:6) Ina ia maua atoatoa aogā mai nei sauniuniga alofa, e tatau ona tatou faia ni taumafaiga ina ia taumamafa lelei ai faaleagaga.

3. E faapefea ona tatou faamautinoa o loo lelei lo tatou taumamafa faaleagaga?

³ E te ono fesili ifo iā te oe lava: ‘Po o oʻu faitauina le mau o le aso ma faaopoopoga i aso taʻitasi? Po o oʻu faitau i aso taʻitasi le Tusi Paia ma mafaufau loloto i ai? Pe ou te sauniuni mo sauniga a le faapotopotoga e ala i le muaʻi suʻesuʻeina o mataupu? Po o oʻu faitauina lomiga fou uma e aofia ai ma le tusi, Faaaliga—Ua Latalata Lona Tumutumuga Matagofie!?’

4. Aiseā e tāua tele ai lo tatou naunau i meaʻai faaleagaga?

⁴ Na folafola mai e Iesu e faapea: “E fiafia o ē naunau i mea faaleagaga . . . E fiafia o ē fia aai ma fia inu i le amiotonu, auā e faamalieina.” (Mata. 5:3, 6) O lea, ia taumafa lelei i meaʻai faaleagaga e ala i le faatumuina o lou mafaufau ma le loto i le poto e uiga i le Atua.