Mātua e—Ia Aʻoaʻo a Outou Fanau Mai Lava a o Tamaitiiti
1 “Aʻoaʻo ia i le tama e tusa ma lona ala; a oo ina toeaina lava o ia, e le teʻa ese ai.” (Faata. 22:6) Mātua e, afai e tou te lē mananaʻo e “teʻa ese” a outou fanau mai le ala o le upu moni, o afea la e tatau ona amata toleniina ai? Mai lava a o tamaitiiti!
2 Ina ua faapea mai Paulo na amata le toleniina faaleagaga o Timoteo, “talu foi ina o . . . tama itiiti,” e manino mai, na amata mai lava a o pepe. (2 Timo. 3:14, 15) O le iʻuga, na tupu aʻe ai Timoteo i le avea o se tagata sa matuā sili ona lelei faaleagaga. (Fili. 2:19-22) Mātua e, e tatau foʻi ona amata avatu toleniga o loo manaʻomia e a outou fanau ‘mai lava a o tamaiti’ ina ia ʻtutupu aʻe ai ma Ieova.’—1 Samu. 2:21.
3 Avatu le Vai o Loo Latou Manaʻomia Ina ia Tutupu Aʻe Ai: E pei lava ona manaʻomia pea e tamaʻi laau le vai ina ia tutupu aʻe ai e avea o ni laau tetele, e manaʻomia e ituaiga uma lava o tamaiti ona faasūsūina i vai o le upu moni o le Tusi Paia, ina ia tutupu aʻe ai o ni auauna taʻumatuaina a le Atua. O le auala muamua lava e aʻoaʻo ai tamaiti i le upu moni ma fesoasoani ai iā i latou ina ia maua se faiā totino ma Ieova, o le faia lea e lē aunoa o le suʻesuʻega faale-Tusi Paia a le aiga. Ae peitaʻi, mātua e, ia manatunatu i le umi o le taimi e mafai ona uaʻi mai ai tamaiti taʻitoʻatasi. Mo tamaiti laiti, o le avatu e lē aunoa o ni faatonuga i taimi pupuu, o le a sili atu ona aogā, na i lo o ni lesona uumi ae seāseā faia.—Teu. 11:18, 19.
4 Aua neʻi manatu faatauvaa i le tomai o lau fanau e aʻoaʻoina ai mea. Faamatala iā i latou ia tala e uiga i tagata o le Tusi Paia. Tuu atu iā i latou e tusi ni ata o vaaiga faale-Tusi Paia, pe faatinoina ni ata o mea na tutupu i le Tusi Paia. Ia faaaogā lelei a tatou vitiō ma kaseti, e aofia ai ma tala faale-Tusi Paia. Ia fetuutuunaʻi le suʻesuʻega a le aiga i tausaga ma tomai o lau fanau e aʻoaʻo ai mea. Ia faafaigofie aʻoaʻoga amata, i ni vaega laiti; ae a o tuputupu aʻe se tamaitiiti, ona faalautele atu lea ma ia agaʻigaʻi i luma lona toleniina. Ia olaola ma ia faaeseese ia faatonuga mai le Tusi Paia. O lou manaʻo ia “naunau” lau fanau i le Afioga a le Atua, o lea ia faafelanuaʻi le suʻesuʻega i le tele e te mafaia.—1 Pete. 2:2.
5 Ia Faaaafia i Latou i Meafai a le Faapotopotoga: Ia faataatitia ni sini agaʻigaʻi i luma mo lau fanau ina ia faaaafia atoatoa ai i latou i meafai a le faapotopotoga. O le ā e ono avea muamua ma o latou sini? Na faapea mai mātua o ni tamaiti talavou se toʻalua: “Sa amata le toleniga o i laʻua uma ina ia nonofo fifilemu i le Maota o le Malo.” Mulimuli ane, ona fesoasoani atu lea i fanau ina ia fai ni tali i sauniga i a laʻua lava upu, ma ia fai ma o la sini le tusia o o la igoa i le Aʻoga o le Faiva Faatiokarate. I le auaunaga i le fanua, o sini lelei e tatau ona ausia, o le ofoina lea o se sāvali i le fale, ia faitau se mau, ia faia se taulimaga i le ofoina o se mekasini, ma ia faia ni talanoaga uigā ma ē e ona fale.
6 Ia Faataatia se Faaaʻoaʻoga Aasa: Pe e masani ona faalogo lau fanau o e tautala e uiga iā Ieova ma tatalo atu iā te ia? Pe latou te vāai atu iā te oe o suʻesuʻeina lana Afioga, auai i sauniga, faia se sao i le faiva i le fanua, ma maua le fiafia i le faia o le finagalo o le Atua? (Sala. 40:8) E tāua lava lo latou faia ma lo outou faia faatasi o nei mea. Na faapea mai se tama teine matua e uiga i lona tinā, o lē na tausia aʻe se fanau e toʻaono ina ia avea o ni Molimau faamaoni: “O le mea sa sili ona faafiafiaina ai i matou, o le faaaʻoaʻoga a Tinā lava ia—e sili ona leotele na i lo o upu.” Na taʻua e se matua o se fanau e toʻafā: “‘O le faamuamua o Ieova i o matou olaga’ sa lē na o se faaupuga masani, ae o le ituaiga o olaga na sa ola ai lo matou aiga.”
7 Mātua e, ia vave amata le toleniina o a outou fanau, ia aʻoaʻo i latou i upu moni mai le Afioga a le Atua, i le faataatitiaina o ni sini e agaʻigaʻi ai i luma, ma faataatitia ni faaaʻoaʻoga e sili ona lelei. O le a faafiafiaina outou ona sa outou faia na mea!