E Leoleo ma le Lotonaunau e “Meaalofa i Tagata” le Lafu a le Atua

¹ Maʻeu se sauniuniga alofa ua faia e Ieova e ala i lona Alo, i le aumaia o “mea alofa i tagata”! (Efe. 4:8, 11, 12) E tele o latou tiute tauave, e aofia ai le leoleoina ma le mataʻalia atoa ai ma le lotonaunau o le lafu a le Atua. (1 Pete. 5:2, 3) E aogā mo i tatou uma lava lenei sauniuniga e sili ona manaʻomia. Po o ai lava o fetaiaʻi ma ni faigatā, po o ē fou atu i le faapotopotoga, po o nisi o loo iai ni vaivaiga, po ua sē ese, o loo naunau totino lava nei tane mo le lelei faaleagaga o tagata uma.—Fili. 2:4; 1 Tesa. 5:12-14.

² Pe a fai sina popole ona o mea faigatā o loo tutupu i le lalolagi, ua avea lava nei leoleo mamoe lagolago “e pei o se lafitaga i le matagi, ma se mea e malu ai i le afā.” Pe a tatou vaivai pe mafatia i avega mamafa ma ua manaʻomia ai se faamāfanafanaga, e latou te faafouina i tatou e “pei o vaitafe i le nuu naumati,” pe e “pei o le paolo foi o le papa tele i le nuu ua le o i ai se vai.”—Isa. 32:2.

³ Faalaeiau i Latou ua Lē o Toe Talaʻi: Ua faia ai e toeaina se taumafaiga faapitoa e faalaeiauina ai i latou o ē ua seāseā talaʻi po ua lē o toe talaʻi foʻi, e fesoasoani ai iā i latou ina ia toe auai e lē aunoa i galuega uma a le faapotopotoga. O asiasiga alofa faaleoleo mamoe, ua fesoasoani i le toʻatele ina ia auai ai e lē aunoa i sauniga a le faapotopotoga, ma ia atiina aʻe ai faaleagaga ma oo ai ina toe faia se sao i le faiva i le fanua. O na taumafaiga uma a toeaina, ua atagia atu ai le tausiga alofa a Ieova ma le taʻitaʻiga maelega a Iesu Keriso. Ua ia faataatia le faaaʻoaʻo i le faaalia o sea manatu mamafa mo so o se tasi o ana mamoe, o sē atonu ua taasē po ua leiloa foʻi.—Mata. 18:12-14; Ioa. 10:16, 27-29.

⁴ O leoleo mamoe e latou te vaavaai mo ni faailoga e faaalia ai pe e iai se tasi ua tautevateva faaleagaga. A iai nisi ua iloa ai ni faailoga o le faavaivai, o ē ua seāseā auai i sauniga, po ua faalēauai i le auaunaga i le fanua, e foliga mai la ua manaʻomia se fesoasoani faaleagaga. E naunau toeaina e fesoasoani atu i nisi o ē ua amata ona faaalia le fiafia i laʻei ma teuga a le lalolagi, po o se tasi ua iai se uiga faitio i le faapotopotoga. I le naunau moni ma le alofa māfana, ua ‘avatu ai ola’ o ovasia manatu mamafa ma le lotonaunau i le faia o taumafaiga uma e fesoasoani ai iā i latou na, ina ia toe faaolaola lo latou alofa mo Ieova.—1 Tesa. 2:8.

⁵ I aso ua mavae, na oo ina lē toe fesootaʻi ai nisi o Kerisiano tuuina atu ma le faapotopotoga, ma faapea ai ona lē toe olaola faaleagaga talu ai ua oo ina lofitūina i latou i faafitauli tau i le soifua mālōlōina, faalētonu o le tamaoaiga, po o omiga i aiga. E aunoa ma le faitio, e faamautinoa atu ma le agalelei e toeaina e faapea, e manatu alofa Ieova i ana mamoe uma lava ma o le a na tausia i latou i taimi o faigatā. (Sala. 55:22; 1 Pete. 5:7) O leoleo mataalia o le lafu, e mafai ona fesoasoani iā i latou ina ia iloa e faapea, afai e latou te ‘faalatalata atu i le Atua, ona faalatalata mai lea o ia ia i latou,’ i le aumaia o faamāfanafanaga ma faafouina ai.—Iako. 4:8; Sala. 23:3, 4.

⁶ Faatāuaina i Latou ua Lē Atoatoa le Malosi: E manatu mamafa foʻi leoleo mamoe alolofa iā i latou o ē e ono faagalogaloina. I faapotopotoga uma lava, e iai nisi o ē ua lē atoatoa le malosi, ua nonofo i falemaʻi o tagata matutua, po ua faalētonu foʻi i se isi tulaga. Ua faapena ai foʻi la ona faatapulaa lo latou sao i le folafolaina atu o le feʻau o le Malo talu ai o latou tulaga. Atonu e pau le avanoa e latou te maua e fai ai se molimau, o le talanoa atu lea i tagata asiasi atu, o isi maʻi, po o tagata tausi maʻi foʻi. Ae ui i lea, po o le ā lava le mea e mafai ona latou faia, e manatu i ai o se sao matuā tāua i le galuega talaʻi atoa. (Mata. 25:15) E tusa lava pe na o le 15 minute e latou te molimau atu ai, e tatau lava ona faia se lipoti, ma o le a faitaulia lava i latou o ni tagata talaʻi e lē aunoa o le Malo.

⁷ Ua iloa lelei lava e “meaalofa i tagata” manaʻoga faaleagaga o o latou uso i le taimi lenei o le tausaga—le vaitaimi o le Faamanatuga. Maʻeu se taimi talafeagai mo toeaina e faia ai se taumafaiga faapitoa e fesoasoani atu ai iā i latou uma lava ua sē po ua lē o toe talaʻi foʻi, ina ia toe tofo i le olioli ma le filemu o le mafaufau e maua mai le aufaatasiga māfana i le faapotopotoga! E tatou te fiafia pe a tatou vaai atu iā i latou e “aiga [ma i tatou] i le faatuatua” o auai i sauniga a le faapotopotoga, ma auai atu i le faiva i le toe faamautinoaina o lo latou faatuatua i le taulaga togiola.—Kala. 6:10; Luka 15:4-7; Ioa. 10:11, 14.