Ia Faateleina Lou Olioli i le Talaʻiga
1 O le olioli i le faailoaina atu o le tala lelei—po o e mauaina ea lea olioli i lau faiva? Afai e tatou te lē faaeteete, e mafai e le lalolagi amioleaga o loo siʻomia ai i tatou ona faalotovaivaia i tatou i le talaʻiga, ma aveesea ai lo tatou olioli. O le galue i oganuu e lē talilelei mai, e mafai foʻi ona faavaivaia ai i tatou. O ā laasaga aogā e mafai ona tatou faia ina ia faateleina ai lo tatou olioli i le talaʻiga?
2 Ia Mautinoa: E matuā fesoasoani lava le iai o se uiga mautinoa. O se tasi o auala e faia ai lenā mea o le mafaufau loloto lea i lo tatou avanoa tutasi o le avea ma ʻaufaigaluega faatasi ma le Atua.’ (1 Kori. 3:9) O loo faatasi foʻi Iesu ma i tatou i le faataunuuina o lenei galuega. (Mata. 28:20) Ma e na te lagolagoina i tatou e ala i le ʻauagelu. (Mata. 13:41, 49) Ona mafai lea ona tatou mautinoa e faapea, o loo faatonutonuina e le Atua a tatou taumafaiga. (Faaa. 14:6, 7) O lea, e tusa lava po o a uiga faaalia o nisi tagata i la tatou galuega, ae o le tali mai le lagi, o se tasi lea o olioli sili!
3 Sauniuni Lelei: O le sauniuni lelei, e saosaolaumea foʻi i lo tatou olioli. E lē manaʻomia ona faaaofia ai ni galuega se tele i le sauniuni atu mo le faiva. E na o ni nai minute lava e faaalu i le iloiloina o ni manatu e talanoa ai mai mekasini fou po o lomiga mo le ofo o le masina. Fili se taulimaga mai le mataupu, “Le Tala e Fai Atu e Uiga i Mekasini” i La Tatou Faiva o le Malo. Tagaʻi i le faaopoopoga o Ianuari 2002, “Taulimaga ua Fautuaina mo le Auaunaga i le Fanua,” pe tagaʻi i le tamaʻitusi, Le Auala e Amata ma Faaauau ai Talanoaga Faale-Tusi Paia mo se faatomuaga uigā. Pe afai e faafaigatā iā te oe se teteega e masani ona lāgā e ē ona fale, ia sauniuni se tali o le a mafai ona amanaʻia ai o latou manatu ma tataʻi manatu i se mataupu faatupu naunau. E matuā fesoasoani tele le tusi o le Reasoning i lenei mea. O le faaaogāina o nei fesoasoani, o le a tatou maua ai le mautinoa lea tatou te manaʻomia e talaʻi ai ma le olioli.
4 Ia Tatalo Faatauanau: O le tatalo, e tāua mo le faatumauina o le olioli. Talu ai o loo tatou faia le galuega a Ieova, e manaʻomia la ona tatou ole atu iā te ia mo lona agaga, lea foʻi e fuaina mai ai le tasi uiga, o le olioli. (Kala. 5:22) O le a aumaia e Ieova iā i tatou le malosi e faaauau ai pea ona talaʻi. (Fili. 4:13) O le tatalo e faatatau i la tatou faiva e mafai ona fesoasoani iā i tatou e tausisia ai pea se vaaiga saʻo pe a oo ni mea faalēlelei iā i tatou. (Galu. 13:52; 1 Pete. 4:13, 14) Afai e tatou te lagona le fefefe, e mafai e le tatalo ona fesoasoani iā i tatou e faaauau ai pea ma le lototele ma le lotofiafia.—Galu. 4:31.
5 Ati Aʻe ni Avanoa: O le mea moni, e sili atu ona fiafia la tatou faiva pe a mafai ona tatou maua tagata ma molimau atu i ai. O le fesuiaʻi o lau faasologa ina ia asiasi atu mai lea fale i lea fale i se isi taimi, atonu i le afiafi po o le afiafipō, e ono iʻu ai ina sili atu ona taulau. E te feiloaʻi ma tagata i taimi uma e te savali atu ai i le auala, alu e faatau, tietie i le pasi, pe savalivali i se paka. Aiseā e lē sauniuni ai se mataupu puupuu e amata ai se talanoaga ma tausolomua oe ona faafeiloaʻi tagata o ē e foliga faaleuō mai? Pe atonu e te faigaluega i se galuega totogi, pe alu foʻi i le aʻoga, o inā e te talanoa ai i aso taʻitasi ma isi. Atonu e mafai ona e maua se avanoa e avatu ai se molimau i le tau lava ina lāgā se mataupu faale-Tusi Paia e faagaee ai se naunau. O loo maua fautuaga lelei i le itulau muamua o le faaopoopoga o La Tatou Faiva o le Malo o Ianuari 2002. O le faaaogāina o so o se vala o nei auala o le a tele ai mea e mafai ona faia, ina ia faateleina ai le olioli o se tasi i le talaʻiga.
6 Talu ai e fesoasoani le olioli iā i tatou ina ia tumau, maʻeu la le tāua o le tausisia pea o sea olioli! O le faia faapea, o le a tatou selesele mai ai se taui tele pe a faaiʻuina lenei galuega e lē toe faia lava. O lenā faamoemoe e mafai ona faateleina ai lo tatou olioli i le talaʻiga.—Mata. 25:21.