‘Ia Auauna iā Ieova ma le Fiafia’
1. O le ā se tulaga e matuā faafiafiaina ai auauna a Ieova?
1 Na tusi le aposetolo o Paulo e faapea: “Ia outou olioli i le Alii e lē aunoa; ou te toe fai atu, ia outou olioli.” (Fili. 4:4) O le faaeaga o le tufatufaina atu o le tala lelei ma le fesoasoani i tagata pei o ni mamoe ina ia tapuaʻi iā Ieova, o se tulaga e matuā faafiafiaina ai. (Luka 10:17; Galu. 15:3; 1 Tesa. 2:19) O le ā e mafai ona tatou faia pe afai ua tau mou atu lo tatou fiafia i la tatou faiva i nisi o taimi?
2. E faapefea ona tatou maua le fiafia i le taulaʻi atu i lē na maua mai ai lo tatou tofiga?
2 O se Galuega Mai le Atua: Manatua foʻi, o la tatou talaʻiga o se tofiga mai iā Ieova. Ioe, o se faaeaga lē laumaua le avea o i tatou ma ʻʻau faigaluega faatasi ma le Atua’ i le folafolaina atu o le feʻau o le Malo ma le faia o soo! (1 Kori. 3:9) O loo tatou faatasi ma Iesu Keriso i lenei galuega e lē toe faia i le lumanaʻi. (Mata. 28:18-20) Ua faia foʻi se sao tiotio a le ʻau agelu ma ua tatou galulue faatasi i le seleselega sili faaleagaga o loo faia i le taimi nei. (Galu. 8:26; Faaa. 14:6) Ua iai ni faamaoniga manino faale-Tusi Paia atoa foʻi ma tala o mea na tutupu i tagata o le Atua, e iloa ai o loo lagolagoina e Ieova lenei galuega. O lea la afai tatou te talaʻi, tatou te ō atu o ē ʻmai le Atua, o i luma o le Atua, o i tatou ua iā Keriso.’ (2 Kori. 2:17) Maʻeu se māfuaaga lelei e fiafia ai!
3. E faapefea ona fesoasoani le tatalo e faatumau ai le fiafia i la tatou auaunaga?
3 E tāua le tatalo ina ia faatumau ai le olioli po o le fiafia i le auaunaga i le Atua. (Kala. 5:22) Talu ai e lē mafai ona tatou faia le galuega a le Atua i lo tatou lava malosi, e manaʻomia la ona tatou ole atu mo lona agaga, lea e na te foaʻi maia ma le agalelei i ē o loo talosaga atu i ai. (Luka 11:13; 2 Kori. 4:1, 7; Efe. 6:18-20) O le tatalo e uiga i la tatou faiva, o le a fesoasoani lea iā i tatou e maua ai pea se vaaiga saʻo pe a lē lelei le tali mai a tagata. O le a fesoasoani e faaauau ai pea ona tatou faamalolosi e talaʻi ma le olioli.—Galu. 4:29-31; 5:40-42; 13:50-52.
4. E faapefea i le sauniuni lelei ona faateleina ai lo tatou fiafia i le talaʻiga, ma o ā nisi o auala aogā e mafai ona tatou sauniunia?
4 Sauniuni Lelei: O se auala lelei e faateleina ai lo tatou fiafia pe a auai i le faiva, o le tatou sauniuni lelei. (1 Pete. 3:15) E lē manaʻomia ona tele se taimi e alu i na sauniuniga. E na o ni nai minute lava e faaalu e toe autalu ai taulimaga o loo fautuaina atu mo mekasini fou, po o se taulimaga e talafeagai ma le lomiga o loo e fuafua e ofo. Mo faatomuaga talafeagai, e mafai ona e tagaʻi i le tamaʻitusi Le Auala e Amata ma Faaauau ai Talanoaga Faale-Tusi Paia ma lomiga ua tuanaʻi o La Tatou Faiva o le Malo. O se mea ua fesoasoani i nisi o tagata talaʻi o le Malo, o le tusi lea i lalo o se taulimaga puupuu i se fasi pepa malō. E fai ma latou toe tagaʻi i le fasi pepa ina ia manatua ai le taulimaga. E fesoasoani lenā mea e aveesea ai o latou faalogona fefe ma talaʻi ai ma le mautinoa ma le faamalosi.
5. O ā aogā e lē gata tatou te maua, ae e maua foʻi e isi ona o le fiafia?
5 E tele aogā e maua ona o le fiafia. O laufofoga fiafia e atili ai ona naunau mai tagata i la tatou feʻau. O le fiafia e faamalosia ai i tatou e tumau ma le faamaoni. (Nee. 8:10; Epe. 12:2) O le laualuga o na mea uma, o la tatou auaunaga fiafia e viia ai Ieova. O lea la, ia tatou “auauna atu iā Ieova ma le fiafia.”—Sala. 100:2.