Polokalame Fou o le Fonotaga Matagaluega
1 Ina ia tumau i le faatuatua i se lalolagi lē tumau, e tatau ona tatou faatuatua iā Ieova. O le ā le uiga o lenei mea e tusa ai ma o tatou olaga i aso faisoo? E aafia ai faapefea i lenei mea o tatou lava olaga ma olaga faaleaiga? E faapefea ona fesoasoani lenei mea iā i tatou ina ia tetee atu ai i faatosinaga a le lalolagi a Satani? O le a taliina nei fesili i le polokalame o le fonotaga matagaluega mo le tausaga faaleauaunaga e 2003. O le matua o lea fonotaga e faapea, “Ia Faatuatua iā Ieova, ma Faia Mea Lelei.”—Sala. 37:3.
2 O lo tatou faatuatua iā Ieova e lē taofia seʻi tau o taimi faapitoa po o taimi e mafatia ai, po ua iai foʻi ni manaʻoga faanatinati. E aafia ai o tatou olaga i aso faisoo. E faamamafaina lenei manatu i le lauga amata, “Ia Faatuatua iā Ieova i Taimi Uma Lava.” (Sala. 62:8) O le lauga faasolo “Ia Faaalia Lou Faatuatua ia Ieova” e fā vaega, o le a faailoa mai ai iā i tatou le auala e maua ai ma faatatauina faamatalaga mai le Tusi Paia ia e mafai ona fesoasoani iā i tatou i le atiina aʻe o se faaipoipoga e taulau manuia, le taulimaina o faafitauli e mapuna aʻe i totonu o le aiga, ma le auala e faamalieina ai o tatou manaʻoga faaletino.
3 O loo taumafai le lalolagi a Satani e faaofi mai iā i tatou se vaaiga sesē i le mea saʻo ma le mea sesē ma faafenuminumiaʻi i tatou i le po o le ā le mea e tāua ma le mea e lē tāua. (Isa. 5:20) O lauga “Ia Leoleo Faasaga i Mea Lē Aogā o le Olaga” ma le “Ia Tetee i le Leaga—Avea ma Ē Faia Mea Lelei” o le a faamalosia ai la tatou faaiʻuga e faamaualugaina tapulaa maualuluga a Ieova.—Amo. 5:14.
4 Pe a aumaia e Ieova le iʻuga i lenei faiga amioleaga o mea, o le a manaʻomia ai la i auauna a le Atua ona faatuatua atoatoa atu iā te ia. E faamatilatilaina lenei manatu i le lauga lautele e faapea, “Ua Lata le Laveaʻiga Mai i Mafatiaga o le Lalolagi.” Pe a mavae lenā lauga, ona valaauliaina lea o i tatou ina ia suʻesuʻe ifo i tatou lava i le lauga, “Pe o le a Taʻuaogāina Oe i le Malo o le Atua?” O le a faaiʻuina le polokalame i se apoapoaʻiga e faapea, “Ia Faatuatua i Folafolaga a Ieova.”
5 O tumutumuga o fonotaga uma lava o le lauga o le papatisoga. O nisi o ē e mananaʻo ina ia papatisoina, e ao ona faailoa vave atu i le ovasia taʻimua i se vave e mafai ai ina ia faia ai fuafuaga manaʻomia.
6 I nei taimi fesouaʻiina, e na o Ieova lava o le puna moni o le faatuatuaga ma le mautinoa. (Sala. 118:8, 9) Seʻi o tatou faatuatua malosi ia iā te ia e ala i lou auai i le polokalame atoa o le fonotaga matagaluega.