Pusa Fesili
◼ O le ā e ao ona tatou manatua pe a faaaogāina telefoni feaveaʻi?
O na masini, e mafai ona tatou faafesootaʻia ai isi toeitiiti lava mai so o se nofoaga atonu o loo tatou iai. E ui atonu e aogā nei mea, ae e tatau ona tatou faaeteete ina ia lē avea le faaaogāina o telefoni feaveaʻi i taimi lē talafeagai, ma faalavelave i la tatou faiva po o sauniga faa-Kerisiano. E mafai faapefea ona tupu o lenei mea?
Seʻi manatu i le iʻuga e oo i ai pe a tatagi lau telefoni a o e auai i le faiva i le fanua o loo avatu se molimau. O le ā le manatu o le a oo i lē e ona le fale? O le ā se aafiaga e ono oo i lē e ona le fale pe a taofi le talanoaga ae tali le telefoni? O le mea moni e tatou te lē mananaʻo e faia so o se mea lava e faalavelave ai i isi a o faalogologo i le feʻau o le Malo. (2 Kori. 6:3) I lea, pe afai e tatou te aveina se telefoni feaveaʻi, e tatau lava ona faatulaga ina ia lē faalavelave iā i tatou po o isi a o tatou auai i le faiva i le fanua.
Ae faapefea pe afai e tatou te faatalitali a o loo molimau atu isi? Pe afai ua tatou faataatia ese se taimi mo le auaunaga i le fanua, pe e lē tatau ea ona taulaʻi atu o tatou mafaufau i lenā galuega? Ona o le faaaloalo i la tatou auaunaga paia, faamolemole e tatau ona tuu au lava pisinisi lē tatau po o isi mea na e te fiafia i ai seʻi fai i se isi taimi. (Roma 12:7) E lē taofia ai i lenei mea le faaaogāina o le telefoni e avatu atili ai se molimau, po o le faia foʻi o se fuafuaga ina ia faia faapea.
E tatau foʻi ona tatou faaeteete i le faaaogāina o le telefoni feaveaʻi a o aveina le taavale, talu ai ua faaalia i nisi o suʻesuʻega e faapea, o le faia o lenei mea, ua matuā faateleina ai lava le tulaga lamatia i le ono tupu mai o se faalavelave faafuaseʻi. E tatau lava ona tatou matuā mataʻitūina ia so o se tulafono e faasāina ai le faaaogāina o telefoni feaveaʻi a o aveina taavale.
E tatou te ō mai i sauniga, fonotaga, tauaofiaga faa-Kerisiano, e tatou te tapuaʻi atu ai iā Ieova ma aʻoaʻoina i tatou e ia. Pe e lē tatau ea i lo tatou lotofaafetai mo le paia o nei sauniga ona uunaʻia ai i tatou e faatulaga ia telefoni feaveaʻi ina ia aua neʻi faalavelave iā i tatou po o isi tagata? Pe afai e iai se mataupu faanatinati e manaʻomia ona tatou uaʻi vave atu i ai, e tatau ona tatou faia faapea i fafo atu o le fale o loo faia ai le sauniga. O lea, e ao ona tatou fuafua e faia a tatou lava mataupu ma isi mataupu i nisi taimi e ese mai i taimi ua fuafuaina mo le tapuaʻiga.—1 Kori. 10:24.
Seʻi faaalia lo tatou magafagafa mo isi ma le talisapaia loloto o mea faaleagaga i le auala e faaaogā tatau ai telefoni feaveaʻi ma isi lava masini faapena.