Pusa Fesili

◼ O ā mataupu silisili o le Tusi Paia e mafai ona faatatau i le faaaogāina o telefoni feaveaʻi, a o auai i sauniga ma le talaʻiga?

“E Iai le Taimi e Atofaina mo Mea Uma.” (Fai. 3:1): O telefoni feaveaʻi ua mafai ai e tagata ona talanoa pe lafo atu feʻau tusitusia i so o se taimi. Peitaʻi, e iai taimi e lē mananaʻo ai Kerisiano e faalavelavea i latou ona o telefoni. O se faataʻitaʻiga, o sauniga o le taimi lea mo le tapuaʻiga iā Ieova, maua ai timaʻiga faaleagaga, ma olioli ai i faalaeiauga. (Teu. 31:12; Sala. 22:22; Roma 1:11, 12) Pe e mafai ona tapē a tatou telefoni pe a taunuu i le sauniga, ma faitau feʻau tusitusia pe a māeʻa? Ae afai e iai se māfuaaga tāua e ao ai ona ki pea le telefoni, e ao la ona seti i se tulaga e lē faalavelavea ai isi.

“Faia Mea Uma Ona o le Tala Lelei.” (1 Kori. 9:23): E aogā le telefoni i le talaʻiga, e vili ai le uso taʻimua i isi o le ʻautalaʻi o loo galulue i isi vaega o le oganuu. E faaaogā foʻi e tagata talaʻi e faafesootaʻi ai se tagata fiafia po o se suʻesuʻega faale-Tusi Paia a o leʻi toe asia, aemaise pe a mamao le mea e nofo ai lenā tagata. Afai e iai ni a tatou telefoni, ia faaeteete ia aua neʻi faalavelavea ai i tatou a o talanoa ma le tagata o le fale. (2 Kori. 6:3) A o faatalitali mo isi o le ʻautalaʻi, e lelei ona taulaʻi atu pea i le faiva ma ē o loo tatou galulue faatasi, nai lo o le talanoa i le telefoni pe lafo atu ni feʻau tusitusia.

Ia Manatu Mamafa i Isi. (1 Kori. 10:24; Fili. 2:4): Ia aua neʻi manatu māmā i le vave taunuu i faatasiga mo le talaʻiga, ma mafaufau e mafai lava ona vili pe lafo atu se feʻau tusitusia i se tasi ina ia iloa ai le oganuu. Afai e tatou te tuai, o le a toe faatulaga le vaega. E moni e iai tulaga lē maʻalofia e tatou te tuai ai. Ae a fai ma masani le vave taunuu, o le a faaalia ai lo tatou manatu mamafa i le faatulagaga a Ieova, le uso o loo taʻimua faapea le ʻautalaʻi.