Ia Avea Oe ma Fesootaʻiga Lelei!

¹ Ina ia faatinoina lo tatou tofiga e talaʻi ma faia soo, e tatau ona tatou tuuina atu ni faamatalaga i isi. (Mata. 24:14; 28:19, 20) E mafai ona avea fesootaʻiga o se mea faigatā, e oo lava i le va o uō. O le ā e mafai ona fesoasoani iā i tatou ina ia molioo atu ai le tala lelei i isi tagata e tatou te lē masani i ai?

² Mai se Tagata Ese i le Avea o se Uō: Taumafai e tuu oe i tulaga o i latou e te feiloaʻi atu i ai i le faiva. I le lalolagi i aso nei, ua tatou iloa e iai nisi atonu e masalosalo, pe e fefefe foʻi i tagata ese. E mafai e lenei mea ona taofia ai le faia o se talanoaga. E mafai faapefea ona e foʻia le matafefe i tagata i le taimi muamua e te feiloaʻi atu i ai? Ae tatou te leʻi fai atu se upu, o le tasi auala e fesootaʻi atu ai, o o tatou lava foliga vaaia. O o tatou laʻei onomea ma amio pulea, foliga fiafia ma le toʻafilemu, e mafai ona fesoasoani e aveesea ai le fefe.—1 Timo. 2:9, 10.

³ O le isi fesoasoani i le faaleleia o fesootaʻiga, o uiga toʻafilemu ma faaleuō. E fesoasoani lenei e faanofogofie ai isi ma latou naunau ai e faalogologo. E manaʻomia foʻi ona sauniuni lelei e tusa ai ma lenei mea. Pe afai e tatou te mafaufau lelei i upu o le a tatou tautala atu ai, o le a sili atu ona tatou toʻa. Ma o lenei uiga toʻafilemu o o tatou mafaufau, e mafai ona tosina mai ai isi i la tatou feʻau. Na taʻua e se tasi fafine e uiga i le asiasiga a se Molimau e faapea: “O le mea lea ou te manatua e uiga i ona laufofoga fiafia, o le filemu. Na faafiafiaina ai aʻu.” O lenei mea na maua ai e le fafine le avanoa e faalogo ai i le tala lelei.

⁴ O Uiga e Tosina Mai Ai: E manaʻomia ona tatou faaalia le naunau moni i isi. (Fili. 2:4) O se tasi o auala e faatinoina ai, o lou lē faia uma o tala. O le mea moni, o le fesootaʻi atu, e aofia ai foʻi ma le faalogologo lelei. Pe a tatou tuu atu le avanoa i la tatou ʻaufaalogologo e fai mai ai ni o latou manatu ma tatou faalogologo atu ma le naunau i o latou manatu faaalia, ona latou lagona lea e tatou te amanaʻia i latou. O lea, pe a talanoa mai lau ʻaufaalogologo, aua e te vave faasalavei atu ina ia toe faaauau atu lau taulimaga na sauni. Faamālō i ai ma le lotofaamaoni pe afai e mafai, ma taumafai e talanoa e uiga i mea na e latou te fai mai ai. Pe afai e faaalia i a latou faamatalaga se mea o loo latou manatu mamafa i ai, ia sui lau talanoaga e faatatau atu i mea o loo latou popole ai.

⁵ O le agamalu ma le loto maulalo e sologa lelei ai le talanoaga. (Faata. 11:2; Galu. 20:19) Sa tosina atu tagata iā Iesu ona sa ia “agamalu ma le loto maulalo.” (Mata. 11:29) I le isi itu, o se uiga fia mamalu, e mafai ona lē fiafia ai tagata. I lea, e ui lava ua tatou matuā mautinoa o lea ua iā i tatou le upu moni, ae o se faiga atamai le ʻalofia ona tautala i upu faasausili.

⁶ Ae faapefea pe afai e atagia mai i faamatalaga a le tagata ia talitonuga e lē ōgatusa ma le aʻoaʻoga a le Tusi Paia? Po o sa tatou matafaioi le faasaʻoina o ia? Ioe, a o faagasolo le taimi, ae lē o le taumafai e faia i le uluaʻi asiasiga. E aogā tele lo tatou talatalanoa i manatu e taufai talitonu uma i ai ma la tatou ʻaufaalogologo, a o leʻi talanoaina aʻoaʻoga a le Tusi Paia na e matuā faigatā lava ona ia ioeina. O mea faapenei e manaʻomia ai le onosai ma le tomai. Ua faataatia e Paulo se faaaʻoaʻoga lelei i lenei tulaga ina ua molimau atu i le faamasinoga i Areopako.—Galu. 17:18, 22-31.

⁷ I mea uma lava, o le alofa lē manatu faapito o le a fesoasoani iā i tatou ina ia avea ai o ni ē e faia fesootaʻiga lelei. I le pei o Iesu, e tatau ona tatou tigā alofa i tagata o ē “ua lailoa i latou ma tuulafoaiina, e pei o mamoe e leai so latou leoleo.” (Mata. 9:36) Ua uunaʻia ai i tatou e lenei mea ina ia avatu iā i latou le tala lelei ma fesoasoani e ui i le ala i le ola. O la tatou feʻau, o le feʻau o le alofa, o lea, seʻi o tatou taʻu atu pea lava pea lenei feʻau i se auala alofa. O le faia faapea, ua tatou faataʻitaʻi ai iā Ieova ma Iesu Keriso—o Ē e aupito sili ona lelei i le faia o fesootaʻiga i le lalolagi aoao.