O se Talosaga ma le Loto Naunau ia Utagia Faaaʻoaʻoga Lapataʻi mo o Tatou Aso

E mafai ona faamalosia la tatou faaiʻuga maumauaʻi ina ia tausisia lo tatou faamaoni, i le utagiaina o lesona na aʻoaʻoina mai le tala faale-Tusi Paia lea o loo faatinoina i lenei vitiō, Warning Examples for Our Day. (Faaaʻoaʻoga Lapataʻi mo o Tatou Aso) A o leʻi matamataina le vitiō, faamolemole faitau le Numera mataupu 25 ma le mataupu e fesootaʻi i ai i le Tusi lona 2, itulau e 419, palakalafa e 3-5 o le Insight on the Scriptures. Ona tali lea o fesili nei: O ai tagata Moapi, ma aiseā na taʻu atu ai e Ieova iā Mose e aua le sii taua atu iā i latou? (Teu. 2:9) Na faapefea ona faufau Palaamo ina ia faaaogā tagata Moapi e faaumatia ai le nuu o Isaraelu? Aiseā e lē tatau ai ona galo iā i tatou le toʻatele o tagata Isaraelu na leʻi faasaoina mai i se tofotofoga, a o toetoe lava ulu atu i le Nuu o le Folafolaga?—1 Kori. 10:11, 12.

A o maimoaina lenei vitiō, seʻi mafaufau i vala nei e fā o le olaga e tatau ona tatou uaʻi totoa atu iai i aso nei, pe afai tatou te faamaoni ma olioli i le mauaina o le finagalo malie o le Atua. (1) Uiga: Na faapefea ona faaalia e nisi tagata Isaraelu se uiga sesē agaʻi iā Ieova ma ana fuafuaga? Na i lo o lea, o ā uiga e tatau ona tatou taumafai e faaatagia atu? (2) Aumea: Aiseā na lē finagalo ai Ieova e faauō atu tagata Isaraelu i tagata Moapi? (Eso. 34:12; Faata. 13:20) Aiseā e ao ai ona filifilia ma le atamai a tatou aumea? (3) Amioga: O le ā le agasala matuiā na aafia ai tagata Isaraelu e 23,000 ona o aumea leaga? (1 Kori. 10:8) O le ā ua maileia ai nisi tagata o le Atua e faia amioga lē mamā i aso nei, ae e mafai faapefea ona puipuia ai i tatou? (4) Tapuaʻiga: Na faapefea ona tofotofoina tagata Isaraelu e tusa ai ma le tulaga mamā o la latou tapuaʻiga? O ā nisi o ifoga i tupua faatogafiti atonu ua lolo atu i ai nisi i aso nei, ae e mafai faapefea ona tatou ʻalofia ia faiga?—Kolo. 3:5.

I le tala, na faapefea ona faamanuiaina Iaminu ona o lona faamaoni? E ala i lenei vitiō, o le ā le talosaga ua faia ma le lotonaunau e le Vaega Pule mo Kerisiano moni uma? Afai o oe o se ulu o se aiga, aiseā e te manatu ai o se mea lelei le matamata pea lava pea o lou aiga i lenei vitiō?