Se Vitiō e Ao Ona Mafaufau Loloto i Ai
“E uunaʻia oe e lenei vitiō e mafaufau lelei!”
“Na pāʻia loʻu loto i le taimi lava lenā!”
“Na matuā ootia oʻu lagona loloto!”
1 Po o ou lagona na ina ua e muaʻi maimoaina le vitiō Young People Ask—How Can I Make Real Friends? (lea e mafai ona tatou faa-Samoa faapea, Ua Fesili Mai Talavou—Pe Faapefea Ona Ou Maua ni Uō Moni?) I ni tausaga ua mavae, na oo ai se uso talavou i se taimi faigatā o lona olaga, ma e māfua mai i ana uō na ia filifilia. O ana uō nei na māfua ai ona mou atu lona fiafia i le upu moni, faapea ma lana faiā ma Ieova. Ae ina ua tatalaina le vitiō Real Friends, ona ia tusi mai lea e faapea: “A o oʻu matamata ma saga matamata pea i le vitiō, e na o le maligi lava o loimata le mea na fai. Ou te faafetaia Ieova mo le fesoasoani ua maua i le taimi ua sili ona talafeagai.” Ioe, na uunaʻia o ia e le vitiō e faia ni suiga tetele i lona olaga, ma taumafai e maua ni uō lelei. Na ia toe faapea mai: “E manino le mata o le vai i lo outou silafia lelei o mea o loo aafia ai talavou.” O lea, mātua e, faapea ma talavou, aiseā e lē toe maimoaina ai le vitiō i le isi suʻesuʻega a lo outou aiga o loo sosoo ai? Taofi le vitiō pe a uma vaega taʻitasi, ma ia saʻoloto le talanoaina ma le faamaoni o fesili o loo i palakalafa o loo sosoo mai.
2 Faatomuaga: O le ā tonu lava le mea e taʻu o le uō moni?—Faata. 18:24.
3 Mea e Taofia ai Faigāuō: E faapefea ona e foʻia lagona o le faaesea o oe? (Fili. 2:4) Aiseā e ao ai ona e naunau e faaleleia ou uiga, ma o ai e fesoasoani iā te oe e faia faapea? O ā ni avanoa e mafai ona maua e fai ai nisi au uō, ma o fea e te maua ai?—2 Kori. 6:13.
4 Se Faauōga ma le Atua: E faapefea ona e ati aʻe se faiā māfana ma Ieova, ma aiseā e aogā ai le faia faapea? (Sala. 34:8) O ai e sili atu ona ia faamalosia la oulua faiā ma le Atua?
5 Uō Leaga: O ai aumea e leaga? (1 Kori. 15:33) E faapefea e uō leaga ona taʻitaʻia se tasi i le faaleagaina faaleagaga? O le ā e te aʻoaʻoina mai le tala e faatatau iā Tina o loo i le Tusi Paia?—Kene. 34:1, 2, 7, 19.
6 Se Tala Faaonapōnei: Na faapefea ona aafia Tara i lagona o le faaesea o ia? O ā ana faamolemolega na māfua ai ona aumea atu i talavou o le lalolagi? O ā tulaga lamatia na latou tuua i ai Tara? Aiseā na lē iloa ai e ona mātua tulaga lamatia na ia oo atu i ai, ma na faapefea ona suia uiga o mātua, ina ia fesoasoani e toe faafoʻisia lona malosi faaleagaga? Na faapefea i se tuafafine paeonia ona avea ma uō moni iā Tara? Aiseā e ao ai ona utagia e Kerisiano manatu o loo i le Faataoto 13:20 ma le Ieremia 17:9? O le ā se lesona tāua na aʻoaʻoina e Tara?
7 Faaiʻuga: O ā ni lesona ua e aʻoaʻoina mai lenei vitiō? E faapefea ona e faaaogā e fesoasoani ai i isi?—Sala. 71:17.