Ia Tausisia e Ulu o Aiga se Masaniga Faifai Pea Faaleagaga

¹ E ui lava sa ola Tanielu mo le tele o tausaga faatasi ma tagata ifo i tupua ma faiga faapiʻopiʻo i Papelonia, ae sa lauiloa o ia i lona auauna atu “e le aunoa” iā Ieova (Tani. 6:16, 20) Na faapefea ona ia tausisia lona tulaga faaleagaga? Ua faaalia i faamaumauga a le Tusi Paia e faapea, sa ia tausisia se masaniga maopoopo lelei i le faatinoina o ana gaoioiga e tusa ai ma le tapuaʻiga moni. Mo se faaaʻoaʻoga, sa masani ona tatalo faatolu i le aso Tanielu i lona potu. (Tani. 6:10) Ma le mautinoa lava, sa ia faataatia foʻi ni faaaʻoaʻoga lelei i isi gaoioiga faaleagaga, e pei o le faitauina o le Tulafono. O lea la, ina ua fesagaʻi ma se tofotofoga e faamataʻuina ai lona ola, e leʻi maluelue ai le faamaoni o Tanielu iā Ieova, ma na laveaʻiina ai faavavega o ia.—Tani. 6:4-22.

² E faapena foʻi aso nei, e tatau ona tatou faamalolosi ina ia “mataala pea.” (Efe. 6:18) O le lalolagi lea tatou te ola ai, o loo “nofo toʻilalo i loo leaga.” (1 Ioa. 5:19) E mafai lava ona tutupu faafuaseʻi mai teteega ma tulaga faigatā ma tofotofoina ai lo tatou faatuatua. I le taimi o le puapuaga tele, o le a avea ai auauna a le Atua ma taulaʻiga o osofaʻiga atoatoa a Koku o Makoku, lea e foliga mai e lē mafai ona sao ai. E manaʻomia ai i lenei mea le matuā faatuatua atoatoa atu iā Ieova.—Eseki. 38:14-16.

³ “O se tasi o vala tāua, o le avea lea o le faitauina ma le uigā e le aiga o le Tusi Paia, suʻesuʻeina, ma le talanoaina o se vaega o le olaga.” O le manatu lenā na taʻua i le faatomuaga o le tala faale-Tusi Paia lea na faia i le tauaofiaga itumalo i le 1998, o lona matua e faapea “Aiga e—Ia Avea le Faitauina o le Tusi Paia i Aso Uma o se Vaega o lo Outou Soifuaga!” Ua faaauau mai e faapea: “Pe a mulimuli e lē aunoa aiga i lea polokalame ma faatinoina i se auala e olaola ai pea le faitauina o le Tusi Paia, o le a telē lava se aafiaga lelei o lenei masaniga i le aiga. E faateleina ai lo tatou malamalama. E faamalosia ai lo tatou faatuatua. Ma saunia ai mo i tatou ni faaaʻoaʻoga lelei tau amio—aemaise lava o tane ma fafine faatuatua anamua, ia e mafai ona faagaeetia ai i tatou, ma uunaʻia ai i tatou e sapasapaia le upu moni.” A o tatou talanoaina vala eseese o masaniga lelei faaleagaga, e tatau i ulu o aiga ona vaavaai mo se auala se tasi po o se lua ina ia faaleleia ai le polokalame faaleagaga a lo latou aiga.

⁴ Ia Talanoaina e Lē Aunoa le Afioga a le Atua: “Pe a pule le Malo o le Atua e aunoa ma se faalavelavea ma faia lona finagalo i le lalolagi e pei ona faia i le lagi, o le a leai ni tagata e osofaʻia tagata—e leai foʻi ni manu—e taufeʻai e “faia se mea leaga, latou te lē faaumatia foʻi se mea.” (Isa. 11:9; Mata. 6:9, 10)” O upu na o loo i le tusi, Iloiloina o le Tusi Paia i Aso Taʻitasi, o le 2001, i le faaopoopoga o le mau o le Tusi Paia mo Setema 11. Maʻeu le faamāfanafanaina ai i lenei faamanatuga! Oe lenā le ulu o le aiga, pe e fai ma au masani i aso taʻitasi le talanoaina ma lou aiga o le mau o le Tusi Paia ma le faaopoopoga? E matuā aogā tele lenei mea. Afai e lē mafai ona faapotopoto faatasi i le taeao, atonu e mafai ona outou faia faapea i se taimi mulimuli ane o le aso. Na faapea mai se tasi tamā: “O le taimi e sili ona lelei mo i matou e talanoa ai le mau o le Tusi Paia i aso uma, o le taumafataga i le afiafi.”

⁵ E faamālō atu iā te oe pe afai o la outou masani lenā o le talanoaina e le aiga o le mau o le aso. Atonu e mafai ona outou maua atili aogā e ala i le faitauina o se vaega o le Tusi Paia i le taimi lava lenā. Ua fai ma masani a isi le faitauina o le mataupu atoa lea e maua ai le mau o le aso. O isi e faitau faasolosolo le Tusi Paia e ala i le filifilia o se tusi o le Tusi Paia. O le faitauina o le Tusi Paia i aso taʻitasi, o le a fesoasoani i le aiga e ati aʻe le mataʻu mamā i le Atua i le lē faia o se mea e lē fiafia ai Ieova, ma o le a faateleina ai lo latou naunau e faia lona finagalo.—Teu. 17:18-20.

⁶ Afai e te faaalu sina taimi puupuu e talanoa ai i le aogā o le faatatauina o faamatalaga, o le a atili ai ona aogā le polokalame faitau tusi ma le talanoaina o le mau i aso taʻitasi a lo outou aiga. O le fautuaga lenei o loo aumaia i le itulau e 60 o le tusi e faatonu ai le aʻoga, le Aʻoga o le Faiva: “Atonu . . . e te filifilia ni nai fuaiupu o le faitauga Tusi Paia o loo faatulagaina mo le vaiaso, talanoa i le uiga o nei fuaiupu ona fai atu lea o fesili e pei o nei, ‘E faapefea i lenei fuaiupu ona saunia ai taʻiala mo i tatou? E faapefea ona tatou ono faaaogāina nei fuaiupu i le faiva? O le ā o latou faailoa maia e faatatau iā Ieova ma lana auala e faia ai mea, ma e faapefea i lenā tulaga ona ati aʻe ai lo tatou talisapaia mo ia?’” O talanoaga faaleagaga faapena, o le a fesoasoani i tagata uma o lou aiga e “iloa le finagalo o [Ieova].”—Efe. 5:17.

⁷ Suʻesuʻega a le Aiga: O le faia pea o le suʻesuʻega a le aiga i vaiaso taʻitasi, o se auala lelei lea e faailoa atu ai e ulu o aiga i a latou fanau e faapea, o mea faaleagaga e muamua. E manatua e se tasi tama talavou e faapea: “E ui lava e vaivai loʻu tamā i nisi taimi pe a sau mai le galuega, ma ua matuā fia moe lava, ae e fai lava la matou suʻesuʻega, ma sa fesoasoani lenei mea iā i matou e malamalama ai i le tāua o le suʻesuʻega.” E mafai foʻi ona saosaolaumea tamaiti i le taulau manuia o lenei fuafuaga. Sa masani ona feala se tasi aiga e toʻaiva le fanau i le tā o le lima i le taeao e faia la latou suʻesuʻega faaleaiga ona sa leai se isi taimi avanoa.

⁸ Ina ia aogā le suʻesuʻega a le aiga, e tatau i le ulu o le aiga ona ʻuaʻi totoʻa atu i lana aʻoaʻo atu.’ (1 Timo. 4:16) O loo taʻua i le tusi taʻiala, Aʻoga o le Faiva, itulau e 32: “E mafai ona faapea atu o se suʻesuʻega faaleaiga e uigā e amata mai i le suʻesuʻega a lou lava aiga. O faapefea le agaʻigaʻi i luma faaleagaga o tagata o lou aiga? . . . A o outou iai ma lau fanau i le faiva i le fanua, pe o faigofie ona latou faailoa atu i latou i ē latou te tupulaga e faapea o i latou o ni Molimau a Ieova? Pe o latou fiafia i le polokalame a lo outou aiga o le faitauina o le Tusi Paia ma le faia o suʻesuʻega? Pe o latou avea moni ea ala o Ieova ma ala latou te ola ai? O le mataʻitūina ma le faaeteete o le a faaalia ai po o le ā e mafai ona e fai i le avea ai ma ulu o le aiga, ina ia faatulaga ma ati aʻe ai uiga faaleagaga i tagata taʻitasi o le aiga.”

⁹ Sauniga a le Faapotopotoga: O le sauniuni mo sauniga ma le auai i sauniga a le faapotopotoga, e tatau ona avea o se vaega tāua o lau faasologa masani faalevaiaso. (Epe. 10:24, 25) I nisi taimi, atonu e mafai ona sauniuni lo outou aiga mo nisi vaega o sauniga. Pe e mafai ona fuafua e sauniuni lelei a o mamao le taimi na i lo o le faatali i le taimi mulimuli? O se faasologa maopoopo i lenei itu, o le a faaleleia ai au sauniuniga ma maua ai aogā mai sauniga.—Faata. 21:5.

¹⁰ O le tausisia pea o se tulaga lelei ma ia faifai pea, o faailoga patino na o se masaniga lelei faaleagaga. Ae faapefea pe afai e iai ni tulaga e faafaigatā ai iā te oe ona sauniuni mo sauniga uma? O le fautuaga lenei mai le tusi, Aʻoga o le Faiva, itulau e 31: “Ia ʻalofia mailei o le faatopelau ona tilofaʻia o le mataupu ia tau lava ina fai, ia po o le sili atu ona leaga, o le lē suʻesuʻea lea o se mea ona e faapea e lē mafai ona e faia. Na i lo lenā, faatulaga pe o le ā le tele e mafai ona e suʻesuʻeina, ona fai lea o lenā mea ia lelei. Ia fai i vaiaso taʻitasi. A o faagasolo taimi, taumafai malosi e faalautele atu ina ia aofia ai isi sauniga.”

¹¹ Pe a vave ona taunuu aiga i le sauniga, o le a fesoasoani lea ia faatoʻafilemuina ai i latou, ma uaʻi atu e vivii iā Ieova ma maua ai aogā mai faatonuga ia ua ia saunia. Po o le masani lea a le tou aiga? E manaʻomia ai i lenei mea le fuafua lelei ma le felagolagomaʻi o tagata uma o le aiga. Afai e masani ona e iloa le vevesi o lou aiga pe e iai foʻi ni omiga i po o sauniga, pe e mafai ona fetuunaʻi lau faasologa? Pe e iai ni mea e manaʻomia ona faia muamua a o lava le taimi? Afai ua mafatia se tagata o le aiga i le tele naʻuā o mea e fai, pe mafai e isi ona fesoasoani? Po o le a faaitiitia ai le vevesi pe afai e vave sauni tagata uma, ma vave ona ō i le sauniga na i lo le taimi e masani ona ō ai? O le maopoopo lelei o se faasologa e mafai ona fesoasoani i le mauaina o se agaga toʻafilemu e lē gata i le aiga, ae i le faapotopotoga.—1 Kori. 14:33, 40.

¹² Auaunaga i le Fanua: O le faatulaga o taimi maʻoti e auai ai i le faiva, o se tasi lea vaega o se masaniga lelei faaleagaga. E manatua ai e se tama talavou e igoa ia Jayson e faapea: “Sa faaavanoa lava e lo matou aiga taeao o Aso Toonai mo le auaunaga i le fanua. Sa avea o se fuafuaga lelei lea mo aʻu auā o le tele o loʻu alu ai i le faiva, o le tele foʻi lea o loʻu iloa o mea lelei ua faataunuuina, ma na faateleina ai loʻu fiafia.” E faapena foʻi le toʻatele o i latou na ola aʻe i ni aiga Molimau, sa latou mātauina e faapea, o le faaalu o se taimi patino i le faiva i vaiaso taʻitasi, sa fesoasoani i lo latou agaʻigaʻi i luma faaleagaga i le avea o ni faifeʻau Kerisiano.

¹³ O le maopoopo lelei o se faasologa, ua mafai foʻi ona fesoasoani i le faia o le taimi lea e faaaluina e lou aiga i le auaunaga i le fanua ia sili atu ona olioli ma fuatele mai. E mafai faapefea ona faataunuuina lenei mea? O le fautuaga lenei o loo aumaia i Le Olomatamata o Iulai 1, 1999, itulau e 21: “Po o masani ona outou faaaogā le taimi o a outou suesuega faaleaiga e fesoasoani ai i tagata o lo outou auaiga ia sauniuni mo le auaunaga i le fanua i le vaiaso? O le faia faapea e mafai ona matuā aogā. (2 Timoteo 2:15) E mafai ona fesoasoani ina ia uigā ma fuatele mai ai la latou auaunaga. Mai lea taimi i lea taimi, e mafai ona e faaavanoa ai se suesuega atoa lava mo le faia o lena sauniuniga. Ae i le tele o taimi e mafai ona faapuupuu i se vala o le faiva i le fanua pe a uma le suesuega a le aiga pe i se isi taimi a o faagasolo le vaiaso.” Pe na faataʻitaʻi e lou aiga lenā mea?

¹⁴ Ia Faaauau Ona Agaʻigaʻi i Luma: Pe sa e mātauina mai i lenei talanoaga ni vala o agaʻigaʻi ai i luma lou aiga? Ia faamālō iā i latou, ma taumafai e faaleleia nei vala. Afai o e iloa nisi o vala e manaʻomia ona faaleleia, ia fili se vala se tasi po o se lua e galulue ai muamua. Pe afai ua avea na vala ma vaega o lau faasologa masani faaleagaga, ona toe galue foʻi lea i se isi vala se tasi po o se lua. Ia mautinoa ma ia magafagafa. (Fili. 4:4, 5) O le faataatiaina o se masaniga lelei faaleagaga mo lou aiga, e manaʻomia ai ni taumafaiga se tele, ae e ese le aogā, auā ua faamautinoa mai e Ieova iā i tatou e faapea: “O lē ua mafaufau i lona ala, ou te faailoa atu iā te ia le faaolataga mai le Atua.”—Sala. 50:23.