Ia Faaauau ona Agaʻi i Luma i se Faasologa Maopoopo
1 Sa i le aposetolo o Paulo se faalogona mafana faapitoa mo le faapotopotoga i Filipi, lea na ia taulamua ai i le faavaeina. Sa ia talisapaia lo latou agalelei faaletino ma na ia taʻua i latou o ē ua avea ma faaaoaoga lelei.—2 Kori. 8:1-6.
2 O le tusi a Paulo i tagata Filipi sa uunaia e le alofa loloto. Na lipotia mai e le tusi Insight, Tusi e 2, itulau e 631, e faapea: “I lana tusi atoa sa ia faalaeiau atu ai i le faapotopotoga i Filipi ina ia faaauau pea i o latou ala lelei ia saili atili le faautauta ma ia mausali i le Upu o le ola, ia atili malosi le faatuatua, ma ia faamoemoe i le taui o loo i luma.” Sa latou tali atu ma le mafana, ma fausia aʻe ai se fusi o le alofa i le va o i latou ma le aposetolo. Ua iai se uiga tāua o nei upu a Paulo mo i tatou i aso nei, ua aumaia ai i a i tatou se mafuaaga tatau e manatunatu ai ma le faaeteete i ana lapataiga, ae maise lava o ana upu o loo i le Filipi 3:15-17.
3 O se Uiga Faalemafaufau Taumatuaina e Manaomia: I le Filipi 3:15, na tusi ai Paulo e pei o se tagata ua iai le poto masani mo le tele o tausaga. Na ia faailoa atu le agaigai i luma o le tulaga faaleagaga o uso i Filipi, i lona talosagaina o i latou o ni Kerisiano taumatuaina ma o latou uiga faalemafaufau saʻo. Afai e faaatagia mai i o latou uiga faalemafaufau le loto maulalo ma le talisapaia e pei ona faataitaia e Iesu, ona faaauau pea lea ona latou “le mataʻuleagaina, ma ē ua sao le amio, o le fanau a le Atua e le ponā . . . , o loo taofia . . . le upu o le ola.” (Fili. 2:15, 16) Pe a tatou faitau i upu a Paulo, e tatau ona tatou manatu i ai o loo talanoa mai i a i tatou. O lea ua tatou naunau ai ma le faamaoni ina ia i a i tatou lea lava manatu e tasi sa i a Iesu ma ia faaalia lo tatou loto maulalo e talia ai faaeaga tatou te maua. O lea ia faaauau ai ona tatou faalatalata atu i a Ieova i le tatalo, ma tagisia lana fesoasoani i lenei mataupu atoa ma isi mea.—Fili. 4:6, 7.
4 E pei ona taʻua e le Filipi 3:16, e tatau i a i tatou uma lava ona fai se taumafaiga e agaigai ai i luma. O le upu “agaigai i luma” o lona uiga ia “alualu i luma, faia ni taumafaiga auiluma.” O tagata e agaigai i luma e “fiafia i manatu fou, mea latou te maua mai i a latou sailiiliga, po o so o se avanoa mo le agaʻi i luma.” Na manao Paulo ia malamalama uso i Filipi, o le Faa-Kerisiano e lē tumau i se mea e tasi ma o i latou e taʻua o Kerisiano e tatau ona alualu pea i luma. O lo latou agaga o le agaigai i luma e mafai ona faataitaia i le lotomalie e suesue ifo i latou lava, ina ia iloa o latou vaivaiga, ma ia aapa atu i avanoa e faia ai mea e sili atu pe faaleleia atili ai foi galuega o loo latou faia. I aso nei o loo agaigai pea i luma le faalapotopotoga a Ieova, ua matuā faateleina ma faaolaolaina la latou galuega atoa ma lo latou malamalamaga i le Afioga a le Atua. O i tatou taitoatasi uma lava e tatau ona ō faatasi ma lana faalapotopotoga ma ia faaaogāina ma le tatau mea uma ua ia saunia, ma faia sa tatou vaega atoatoa i lana galuega.
5 Agaʻi i Luma e Manaomia ai se Faasologa Maopoopo: Sa faaauau ona faamalosi atu Paulo i ona uso ina “ia savavali faatatau [“maopoopo,” NW] i lea lava mataupu.” (Fili. 3:16) Ina ia savavali maopoopo e manaomia ai ona tatou tuua o tagata po o isi mea i o latou tulaga tatau i le fesootai atu i isi ma ia amio lelei. Sa tuua e Kerisiano i Filipi i latou lava i o latou tulaga tatau, i le pii ama atu lea i le faalapotopotoga a Ieova ma isi o o latou uso. Sa pulea e le alofa o latou olaga. (Ioa. 15:17; Fili. 2:1, 2) Na faamalosia i latou e Paulo ina ia “tusa la [latou] amio ma le tala lelei ia Keriso.” (Fili. 1:27) O le manaoga o le maopoopo ma le amio lelei ua o se mea pito sili lea ona tāua mo Kerisiano i aso nei.
6 O se faasologa, o le faia pea lea o se tulaga masani o se mataupu ua uma ona faavaeina. Ua fesootai vavalalata atu lea i le masani tatou te faia ai mea. O le iai o se faasologa, e aogā lea mo i tatou, auā tatou te lē faavaivai ai ma tau mafaufau po o le ā le isi gaoioiga e tatau ona fai, auā foi ua uma ona faataatia le faavae tatou te mulimuli i ai ona o se tulaga ua masani ai.
7 O se faasologa faifai pea maopoopo faatiokarate e aofia ai amio ma tu e mamā, e aogā, e amioatua ma le faanaunauga e atiina aʻe ai i tatou faaleagaga, e fesoasoani atu ai i isi, ma pe afai e mafai ai, ia faia ai se sao atili i le auaunaga i a Ieova. Ina ia maua ma le manuia nei sini, e manaomia ai le faia ma faatumauina o se faasologa e aofia ai suesuega totino, le auai pea i sauniga, ma le faia o se sao i le galuega talaʻi.
8 Mea Tāua e Aofia i a Tatou Faasologa Maopoopo: O se tasi mea tāua, o le “iloa lelei atoa ma le faautauta uma.” (Fili. 1:9) O suesuega totino e faalolotoina ai lo tatou faatuatua, faamalosia ai lo tatou talisapaia mo le upu moni, ma uunaia ai i tatou mo le faia o galuega lelei. Ae peitai, ua faafaigata tele mo nisi ona faifai pea a latou suesuega totino. O se tasi o mafuaaga ua taʻua o le lē lava o le taimi.
9 O aogā e maua mai le faitauina o le Tusi Paia i aso taitasi e tāua tele. O ana faatonuga e aogā i so o se auala. (2 Timo. 3:16, 17) E faapefea ona tatou mauaina se taimi mo suesuega faale-Tusi Paia i a tatou faasologa i aso taitasi? O nisi ua vave feala i taeao taitasi, le taimi lea o loo ala ai le mafaufau. O nisi ua sili atu mo i latou pe a faitau a o leʻi momoe i le po. O avā o loo nonofo i fale latou te faataatia ese sina taimi i le aoauli a o leʻi ō mai isi tagata o le aiga mai i galuega ma aʻoga. I le faaopoopo atu i le faitauina pea o le Tusi Paia, o nisi ua faaaofia ai le faitauina o le tusi Proclaimers i a latou faasologa o suesuega faalevaiaso.
10 Pe a tutupu aʻe ni amioga fou, tatou te faatalitalia le feteenai ma amioga tuai. I taimi muamua atonu na tatou faatagaina ai ni mea lē aogā e faatumu ai o tatou taimi paganoa. O le vavae ese mai i lena masani e lē faigofie. E leai se tasi na te faatonutonuina pe pulea mai le faia o a tatou suesuega e masani ai; pe tatou te tali atu i ai e tusa ai ma lenei tulaga. O le faifai pea o a tatou suesuega e faalagolago lea i le talisapaia o “mea pito sili ona tāua” ma lo tatou lotomalie e “faaaogā tatau le taimi” ina ia maua mai ai aogā.—Fili. 1:10, NW; Efe. 5:16, NW.
11 O sauniga faa-Kerisiano ua faia sona sao tele faaleagaga i lo tatou agaʻi i luma faaleagaga, lea na te saunia ia faatonuga ma faalaeiauga manaomia. O lea la, o le auai i sauniga o se tasi lea vaega tāua o a tatou faasologa maopopo. Na faamamafa e Paulo le tāua o lenei mea. E lē o se mea e fai ai sau filifiliga pe seiloga e te lotomalie i ai.—Epe. 10:24, 25.
12 E faapefea ona faataitaia i se tulaga maopoopo a tatou faasologa o galuega mo vaiaso taitasi? O nisi ua fuafua taimi faapitoa e faataunuu ai o latou manaoga totino ona taumafai lea e faaofi ane ai ma sauniga i se avanoa o totoe ai, ae e tatau ona lē faia o lea, a o lona tuufaafeagai. O a tatou sauniga faalevaiaso e ave i ai le faamuamua, ona faatoʻā fuafua loa lea i ai o isi galuega.
13 O le auai pea i sauniga e manaomia ai le faia o faasologa lelei ma le galulue faatasi o le aiga. I le gasologa o le vaiaso e masani lava ona pisi ai a tatou faasologa ma e omia ai i le lē lava o le taimi. O lona uiga o lenei mea, pe a mafai, e tatau ona fai se fuafuaga ina ia vave fai le taumafataga o le afiafi ia lava ai le taimi mo tagata o le aiga e aai ai, e sauni ai, ma ia taunuu ai i le sauniga a o leʻi amataina. O lena tulaga e manaomia ai i tagata taitoatasi o le aiga ona felagolagomai i auala eseese.
14 O le auai pea i le galuega i le fanua o le a lē faagalogaloina pe afai tatou te tausisi pea ona agaʻi i luma i la tatou faasologa maoopoopo. Ua tatou iloa uma lava le tāua o la tatou avega tauave o le talaʻia o le feau o le Malo. O le uiga lena o le avea o i tatou ma Molimau a Ieova. (Isa. 43:10) Talu ai ona o se galuega e pito sili ona aogā ma faanatinati i ona po nei, e matuā aveese ai la se manatu faapea o se tasi lena o vaega seiloga e maua se avanoa i la tatou faasologa ona faatoʻā fai lea. Na timai mai Paulo e faapea: “O lenei, o ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.”—Epe. 13:15.
15 Pe afai a tatou fuafuaga mo vaiaso taitasi, ia faataatia ese se taimi patino mo le auaunaga i le fanua. E pei ona faia faatasiga mo fuafuaga o le auaunaga i le fanua a faapotopotoga mo vaiaso taitasi, o lea ua tāua ai le fuafua po o lē fea se aso tatou te lagolagoina. E tatau ona aapa atu i le faia o sa tatou sao i vala uma o le auaunaga, e pei o le talaʻi mai lea fale i lea fale e faaaogā ai mekasini ma isi lomiga, o le faia o toe asiga, ma le faia o suesuega faale-Tusi Paia. E mafai foi ona tatou sauniuni mamao mo le molimau atu lē fuafuaina e ala i le ave o lomiga ma ia mataala i so o se avanoa e amataina ai se talanoaga. Talu ai e masani lava ona tatou ō ma isi i le fanua, ua manaomia ai ona fesili atu e uiga i a latou faasologa ina ia tatou faia ai fuafuaga tutusa ma talafeagai.
16 E tatau ona faatumauina pea la tatou faasologa o le galuega talaʻi e tusa lava po o ā teteega e fesagai ma i tatou i le oganuu. Ua leva ona tatou iloa ua na o sina vaega toaitiiti o le a tali lelei mai. (Mata. 13:15; 24:9) Sa faatonuina Esekielu ia talaʻi atu i tagata ‘fouvale, mata lē mamā, ma le loto maaa.’ Sa folafola e Ieova o le a ia fesoasoani i a Esekielu e ala lea i le faia o lona “muaulu ia malō ina ia fesagai ma o latou muaulu,” e pei lea o le “samira ua sili le malō i le papa.” (Eseki. 2:3, 4; 3:7-9) O lea la, o se faasologa maopoopo e lē aunoa mo le fanua e manaomia ai le maumauai.
17 Faaaoaoga Lelei e Ao ona Faataitaia: O le toatele lava o i tatou e sili atu a tatou taumafaiga i le fanua pe afai e iai se tasi e taimua. Sa faataatia e Paulo ma ana aumea ni faataitaiga lelei, ma na ia faamalosi atu i isi ina ia faaaoao i a te ia. (Fili. 3:17) O lana faasologa na aofia ai mea uma e faatumau ai lona malosi faaleagaga.
18 I aso foi nei, ua faamanuiaina i tatou i ni faaaoaoga lelei. I le Eperu 13:7, na faamalosi mai ai Paulo e faapea: “Ia outou manatua o outou taʻitaʻi, . . . ia outou faaaoao i lo latou faatuatua, ma ia mafaufau i le iuga o a latou amio.” E moni, o Keriso o lo tatou Faaaoao, ae peitai e tatau ona tatou faaaoao i le faatuatua o i latou o loo taimua mo i tatou. I le pei o Paulo, e tatau i toeaina ona mataala i le avea o i latou o faaaoao lelei i isi. E ui atonu o o latou tulaga totino e eseese, ae tatau i a i latou taitoatasi ona faaalia o loo latou faatumauina a latou faasologa ia maopoopo i le faamuamua lea o manaoga o le Malo. E oo lava foi i tiute ma galuega i totonu o le aiga lava ia, e tatau i toeaina ona faataatia se faavae mautu i suesuega totino, le auai i sauniga, ma ia tausolomua i le taitaia o le galuega talaʻi. Pe afai e avatu e toeaina se faamaoniga o le latou ‘pule lelei i o latou lava aiga,’ o le a faalaeiau ai foi la i latou uma o i le faapotopotoga ina ia agaʻi i luma i se faasologa maopoopo.—1 Timo. 3:4, 5.
19 Sini mo le Tausaga Fou Faaleauaunaga: O le amataga o le tausaga fou faaleauaunaga o se taimi talafeagai lea e manatunatu ai i la tatou faasologa totino. I le toe autaluina o la tatou galuega i le tausaga ua tea, o le ā ua na taʻu mai i a i tatou? Pe na tatou tausisi ea i ai, pe faaleleia, le tulaga o la tatou galuega? Atonu na tatou galulue ma le maeaea i a tatou suesuega totino. Atonu na tatou auai i sauniga i se tulaga faifai pea po o le faateleina foi o lo tatou sao i le galuega i le fanua i le avea o ni paeonia lagolago. Ia pe atonu foi tatou te manatuaina ni galuega agalelei faa-Kerisiano na tatou faia mo nisi o le tatou faapotopotoga po o tatou aiga. Afai na tatou faia faapea, o le a tatou olioli ai ona sa tatou savavali i le auala e faafiafia ai le Atua, ua i a i tatou ai la se mafuaaga tatau ina ia “faasilisili pea i ai.”—1 Tesa. 4:1.
20 Ae faapefea pe afai na tatou lē tausisi i a tatou faasologa? Na faapefea ona aafia ai lo tatou itu faaleagaga? Pe sa iai ea se mafuaaga na faalavelavea ai lo tatou agaʻi i luma? Ina ia faaleleia, e amata lea i le ōle atu i a Ieova mo lana fesoasoani. (Fili. 4:6, 13) Talanoa mea o loo e manaomia ma isi tagata o le aiga, fesili atu i ai mo se fesoasoani i le toe fetuunaia o vaega o lau faasologa. Afai e iai ni ou faafitauli, ia talosaga atu i le au toeaina mo se fesoasoani. Afai tatou te faia ni taumafaiga sili ma tali atu i le taitaiga a Ieova, e mautinoa o le a tatou alofia le avea ma ni ē “paie, a o e fua mai.”—2 Pete. 1:5-8.
21 O le agaʻi i luma i se faasologa maopoopo e taitaia atu ai i faamanuiaga e tauia ai au taumafaiga na fai. A o e filifili e faaauau ona e agaʻi i luma i se faasologa maopoopo, tau ina ia “aua le faavaivai i le filigā, ia malosi le loto, ia auauna i le Alii.” (Roma 12:11) Mo nisi faamatalaga auiliili o lenei mataupu ia tagaʻi i Le Olomatamata faa-Peretania, o Me 1, 1985, itulau e 13-17.