Ia Faaalia le Naunau i ‘Tamaiti ua Mātua Oti’
1 O Ieova “o le tamā ia o ē ua mātua oti.” (Sala. 68:5) Ua faaalia i le poloaʻiga lea na ia tuuina atu i le nuu o Isaraelu anamua le manatu mamafa o Ieova mo le lelei o i latou na: “Aua le agaleaga i se fafine ua oti lana tane, po o se mātua oti. Afai e te agaleaga lava i ai, ona alaga mai lea o ia iā te aʻu, ou te faalogo lava i lona alaga mai.” (Eso. 22:22, 23) E aofia ai foʻi i le Tulafono a le Atua ia fuafuaga e fesoasoani ai i manaʻoga faaletino o i latou na. (Teu. 24:19-21) I faatulagaga faa-Kerisiano, ua apoapoaʻia ai tagata tapuaʻi faamaoni “ina ia tauasiasi atu i e mātua oti ma fafine ua oti a latou tane i o latou tigā.” (Iako. 1:27) E mafai faapefea ona tatou faataʻitaʻi i le alofa naunau o Ieova iā i latou na ola aʻe i aiga e iai mātua nofo toʻatasi po o aiga e eseese tapuaʻiga?
2 Toleniga Faaleagaga: Pe afai o oe o se matua e nofo toʻatasi, pe e lē talitonu lau paaga, atonu o le a faigatā ona faia e lē aunoa se suʻesuʻega faale-Tusi Paia ma lau fanau. Peitaʻi, afai e te manaʻo ina ia tutupu aʻe i latou ma avea o ni tagata matutua taʻumatuaina ma paleni, e tatau la ona faia e lē aunoa se suʻesuʻega faale-Tusi Paia uigā. (Faata. 22:6) E matuā tāua foʻi le talanoa ma i latou i mea faaleagaga i aso uma. (Teu. 6:6-9) Atonu e te lagona lou loto vaivai i nisi taimi, ae aua lava e te faamaamulu. Saʻili atu iā Ieova mo le malosi ma le taʻitaʻiga a o faaauau pea ona e “tausi atu [i lau fanau] i aʻoaʻiga ma apoapoaʻiga a le Alii.”—Efe. 6:4.
3 Pe afai e te mana’omia se fesoasoani i le faatinoina o au matafaioi faale-Tusi Paia, ia faailoa atu lou manaʻo i toeaina. Atonu e mafai ona latou tuuina atu se fautuaga aogā pe e fesoasoani atu foʻi iā te oe i le faavaeina o se masaniga lelei faaleagaga mo lou aiga.
4 Le Auala e Fesoasoani ai Isi: I le uluaʻi senituri, na avea Timoteo o se auauna maelega a Ieova e ui lava na ola aʻe i se aiga e eseese tapuaʻiga. E lē fesiligia le tāua o le vaega na faia e lona tinā ma le tinā o lona tinā i le aʻoaʻoina o ia i tusitusiga paia a o talavou lava. (Galu. 16:1, 2; 2 Timo. 1:5; 3:15) Ae peitaʻi, sa ia maua foʻi aogā mai le auaufaatasi ma isi Kerisiano, e aofia ai le aposetolo o Paulo o lē na ia taʻua Timoteo o lona “atalii pele lea ma le faamaoni i le Alii.”—1 Kori. 4:17.
5 E faapena foʻi aso nei, maʻeu le manaia pe a faaalia e uso ma tuafāfine taʻumatuaina le alofa naunau i tama ma teine mātua oti o loo i le faapotopotoga! Pe e te silafia igoa o i latou taʻitoʻatasi? Pe e te talanoa iā i latou i sauniga faa-Kerisiano ma i isi taimi? Valaaulia i latou e tou te ō faatasi i le faiva i le fanua. Atonu e lelei foʻi pe a faaaofia ai i latou faatasi ma lo latou matua nofo toʻatasi, po o le matua talitonu i la outou suʻesuʻega faaleaiga, po o le fuafuaina foʻi o ni faafiafiaga talafeagai. Pe afai e vaai na talavou iā te oe o sa latou uō, e foliga mai o le a sili atu ona latou faalogo i au faalaeiauga ma faataʻitaʻi i au faaaʻoaʻoga lelei.—Fili. 2:4.
6 E matuā naunau Ieova i tamaiti ua mātua oti, ma e na te faamanuia a tatou taumafaiga alofa e fesoasoani iā i latou e faatatauina le upu moni i o latou olaga. O le toʻatele o i latou, sa ola aʻe ma mātua nofo toʻatasi pe e eseese foʻi tapuaʻiga, na latou maua na faalaeiauga, ma ua auauna faamaoni nei e avea o ni paeonia, auauna o le faiva, toeaina, ovasia femalagaaʻi, misionare, po o ni sui o aiga Peteli. Seʻi o tatou tulimataʻia uma ni auala e “faateleina” ai lo tatou naunau i ē ua mātua oti, i le faataʻitaʻi atu i lo tatou Tamā faalelagi.—2 Kori. 6:11-13.