Fesili Mai le Au Faitau

Ona ua taʻua soo e le Tusi Paia “le mātuaoti” [“tama e leai se tamā,” NW] pe ua faailoa mai ai ea e lenei faaupuga le faaletaua o teine?

E matuā leai lava.

Ua faaaogā e le New World Translation of the Holy Scriptures le faaupuga o “le tama e leai se tamā” i le tele o fuaiupu o loo faaalia ai le manatu mai o le Atua i tamaiti ua leai ni matua. Na faaalia manino e le Atua lenei naunau mai i tulafono na ia tuuina atu ia Isaraelu.

Mo se faaaoaoga, na fetalai le Atua e faapea: “Aua le agaleaga i se fafine ua oti lana tane, po o se mātuaoti. Afai e te agaleaga lava i ai, ona alaga mai lea o ia ia te au, ou te faalogo lava i lona alaga mai. E matuā tupu ai loʻu ita, ou te fasioti ai foi ia te outou i le pelu, e avea foi a outou avā o fafine ua oti a latou tane, o la outou fanau foi e mātuaoti.” (Esoto 22:22-24) “Auā o Ieova lo outou Atua o le Atua o atua ia, o le Alii o alii, o le Atua silisili, e mamana o ia ma le matautia, o le na te le faailogaina tagata, e le talia foi e ia se taui; o le na te faamasinoina mo le ua mātuaoti ma le fafine ua oti lana tane.”—Teuteronome 10:17, 18; 14:29; 24:17; 27:19.

O le tele lava o faaliliuga o le Tusi Paia e faitauina faapea, o le “tamaitiiti e leai se tamā” po o le “matuaoti” i nei fuaiupu, ua faaaofia uma ai tama ma teine. Peitai, o na faaliliuga ua latou lē faaaogāina ai le uiga sa maua i le upu faavae faa-Eperu o le (ya·thohmʹ), o loo i le kenera tane. Na i lo lena, ua faaaogā e le New World Translation of the Holy Scriptures le uiga saʻo o le upu “tama ua leai se tamā,” e pei ona iai i le Salamo 68:5, e faitauina faapea: “O le tamā o tama ua leai ni tamā, ma o le faamasino mo fafine ua oti a latou tane, o le Atua lea o loo i lona afioaga paia.” E faavae i lena lava uiga o le upu Eperu i le kenera tane, ua faitauina ai faapea le kenera fafine o le veape i le Salamo 68:11, NW: “O fafine o loo talaʻiina le tala lelei o se ʻau tele.”a

E ui lava o le “tama ua leai sona tamā” o le uiga autū lea o le upu ya·thohmʹ, ae ua lē avea lenei ma manatu tatou te faapea ai ua lē o amanaia ai teine ua leai ni mātua. O faamatalaga e pei ona siiina mai ma isi foi faaupuga, ua faaalia ai le faamalosia o tagata o le Atua ina ia tausi i tamaitai, ma fafine ua oti a latou tane. (Salamo 146:9; Isaia 1:17; Ieremia 22:3; Sakaria 7:9, 10; Malaki 3:5) I le Tulafono, na faaaofia ai foi e le Atua se manatu e faatatau i se faaiuga faafaamasinoga, sa faamaonia ai se tofi mo afafine o Selofeata ua leai so latou tamā. Na avea lena tulafono ma faavae o le taulimaina o tulaga faapena, e taofia ai le aiā a teine ua leai ni tamā.—Numera 27:1-8.

E leʻi faailogaina e Iesu ni kenera i lona faaali atu o le agalelei i tamaiti. Na i lo o lena, tatou te faitau ai e faapea: “Ona latou au mai lea o tama iti ia te ia, ina ia paʻi ane o ia ia te i latou; a ua vavao atu le au soo i e na aumaia. A ua silafia e Iesu, ona tiga ai lea o lona finagalo, ua na fetalai atu foi ia te i latou, Ina tuu mai ia o tama iti e o mai ia te au; aua le vavao ia te i latou; auā e faapei o i latou nei o e o i le malo o le Atua. E moni, ou te fai atu ia te outou, Ai se le talia le malo o le Atua faapei o se tama itiiti, e le sao lava ia i ai. Ona siitia lea e ia o i latou i ona lima ma faamanuia ia te i latou.”—Mareko 10:13-16.

O le upu Eleni i inei o loo faamatalaina “tama iti” o loo i le kenera neuta. Ua faapea mai se tusi e faamatala ai le gagana Eleni, o le upu lenei e “faaaogā mo tama ma teine.” Sa faaatagia e Iesu se naunau e tali tutusa ma Ieova i tamaiti uma, o tama ma teine. (Eperu 1:3; faatusatusa i le Teuteronome 16:14; Mareko 5:35, 38-42.) O lea la, e ao ona matauina lena fautuaga o loo aumaia i Tusitusiga Eperu e faatatau i le tausiga o “tama ua leai ni tamā” auā ua aumaia ai le fautuaga i le auala e ao ona tatou manatu ai i tamaiti uma ua leai se matua po o ni mātua.

[Faaopoopoga i lalo]