E Tusa Ona Matuā Viia Ieova
O le a Faamanatu le Talisuaga Afiafi a le Alii iā Aperila 16
1 Ua tatou aloalo atu nei iā Aperila 16, 2003. O le a tatou faamanatuina i lenā pō ma isi o tatou uso i le lalolagi aoao, le maliu o Iesu lea e faamamaluina ai le suafa o Ieova. Ua onomea lo tatou vivii atu iā Ieova mo lana sauniuniga alofa o le togiola. E ala i lenei togiola, o le a ia aumaia ai faamanuiaga matagofie i tagata usiusitai uma. E tatou te auai ma le lotoatoa ma le faisalamo i le faapea atu: “E silisili lava Ieova, e tusa ona matuā viia o ia.”—Sala. 145:3.
2 O le Faamanatuga o le taimi tonu lea tatou te mafaufau loloto ai i le agalelei o le Atua ma le lototalisapaia i le ʻauina mai o lona Alo e toʻatasi i le lalolagi, ina ia tatou ola iā te ia.’ (1 Ioa. 4:9, 10) O le usiusitai i le faamanatuina o le Talisuaga Afiafi a le Alii, o le a tatou matuā talisapaia ai e faapea: “E alofa fua mai ma alofa mutimuti vale mai Ieova . . . e tele foʻi lona alofa.” (Sala. 145:8) E mautinoa o le togiola o se faaaliga lea o le mataʻina o le alofa o Ieova i le fanau a tagata. (Ioa. 3:16) Pe a tatou toe tōmanatu i le alofa o le Atua ma mafaufau i le faamaoni o Iesu, o le a uunaʻia ai i tatou e vivii atu iā Ieova. O le a faavavau ona tatou vivii iā te ia mo le tele o lona alofa, lea ua mafai ona tatou mauaina ai le ola e faavavau.—Sala. 145:1, 2.
3 Fesoasoani i Isi Ina ia Vivii Atu iā Ieova: O le lotofaafetai i le meaalofa silisili a le Atua o le togiola, e uunaʻia ai i tatou e valaaulia isi ina ia tatou vivii faatasi atu iā Ieova. Sa faagaeeina le faisalamo ina ia tusi e faapea: “Latou te taʻu atu lava le faamanatuga i lou agalelei tele lava; latou te alalaga fiafia foʻi i lau amiotonu.” (Sala. 145:7) I le tausaga ua mavae na faaaluina ai e Molimau a Ieova i le lalolagi aoao le sili atu i le piliona itula i le galuega talaʻi. O le ā le iʻuga na maua mai i a latou taumafaiga? I vaiaso taʻitasi sa iai se faatatauga i le sili atu i le 5,100 tagata na papatisoina o le faailoga o lo latou tuuina atu iā Ieova. E toʻa 15,597,746 i latou na auai i le Faamanatuga, e aofia ai ma le 9 miliona o i latou e leʻi avea o ni tagata talaʻi e vivii atu iā Ieova, o loo telē le avanoa mo se faatelega atili! I le avea ai o ni ē e faalauiloa le Malo, e tatou te faapelepele ai i la tatou faaeaga o le faalauiloaina o le tala lelei ma ia faatalitonu loto o isi tagata iā Ieova, o lona Alo ma le Malo.
4 O le auala lelei lava e faalaeiau ai isi ina ia ava iā Ieova, o le valaauliaina lea o i latou ia tatou auai faatasi i le faamanatuina o le Talisuaga Afiafi a le Alii. Po ua fai sau lisi o i latou o loo e manaʻo e valaaulia faapea foʻi ma i latou e manaʻomia ona faamanatu iai le aso ma le itula e faia ai? Po ua e avatu ea se valaaulia iā i latou uma na ua i totonu o lau lisi? Afai e leai, ia filigā loa e valaaulia i latou manū o lava le taimi. Ia fesoasoani iā i latou ina ia malamalama i le fuafuaga o le faamanatuina. I le faamanatuga ia sauniuni e faafeiloaʻi tagata valaaulia. Ia faafeiloaʻi ma le māfana i latou, ma faailoa atu i isi ma faamālō iā i latou mo le auai mai.
5 O le auai i le Faamanatuga e mafai ona faalaeiau ai tagata fou ina ia agaʻigaʻi i luma faaleagaga. O se tagata suʻesuʻe o lē e mafatia ona o ni faalētonu i ni mala ua mavae lea sa faafaigatā ai mo ia ona alu atu i nofoaga lautele, sa auai mai i le Faamanatuga. Ina ua fesiligia o ia po o le ā sona manatu i le sauniga, na ia faapea mai: “O se pō e ese le mamalu, ma sa ou auai ai.” Talu mai lenā taimi sa auai ai loa o ia i sauniga.
6 Pe a Māeʻa le Faamanatuga: O le ā e ao ona faia ina ia fesoasoani ai i nei tagata fiafia e vivii atu ai iā Ieova? O le a mātau e toeaina tagata fou na auai i le Faamanatuga ma faia ni faatulagaga mo ni tagata talaʻi ua iai le tomai e asia i latou i se taimi vave, ina ia toe autaluina mea sa latou faalogo ma vāai i ai. O nisi atonu e mananaʻo e faia ni suʻesuʻega faale-Tusi Paia i aiga. E tatau foʻi ona valaaulia i latou ina ia auai i sauniga uma faalevaiaso a le faapotopotoga, auā e mafai ona faateleina ai lo latou poto e faatatau i le Tusi Paia.
7 Ua faia ni faatulagaga ina ia faalaeiau ai tagata e iai masina e lē talaʻi ai ma ē ua lē o toe talaʻi, ina ia latou toe auai e lē aunoa i sauniga. Afai e talanoa atu le ʻautoeaina iā te oe ina ia e fesoasoani i se tagata ua lē o toe talaʻi, ina ia mafai ona toe auai i le galuega talaʻi, ia nofosauni e tali lelei atu. O le manatu mamafa i o tatou uso, e mafai ona ōgatusa ma upu faalaeiau a le aposetolo o Paulo: “Ia tatou agalelei, ia faatatau i mea e tutupu i lea aso ma lea aso, i tagata uma lava, aemaise i le aiga o le faatuatua.”—Kala. 6:10.
8 O lea ia tatou faia uma ni taumafaiga faapitoa e auai ai i le Faamanatuga iā Aperila 16. E tatou te lē mananaʻo e misia lenei auaufaatasiga e sili ona mamalu e vivii ai iā Ieova. Ioe, seʻi o tatou vivii atu iā Ieova i le taimi nei seʻia oo i le faavavau mo ana galuega uma!—Sala. 145:21.