Pusa Fesili

◼ O ā lapataʻiga e ao ona tatou utagiaina pe a talaʻi atu i tagata o loo i falepuipui?

I le lalolagi aoao pe a ma le valu miliona tagata o loo faafalepuipuiina, ma o nisi o latou nei ua faaalia le naunau i le tala lelei. (1 Timo. 2:4) Sa mauaina e se tasi o ofisa o le lālā ni tusi pe a ma le 1,400 i masina taʻitasi mai i tagata o loo iai i nei nofoaga ma tagata o o latou aiga e talosagaina ai lomiga po o le asia foʻi o i latou. A o naunau moni le toʻatele o i latou, ua faaalia i mea na tutupu e faapea o nisi tagata taufaasesē, ua latou saʻilia ni avanoa manatu faapito e faaaogā ai tagata o le Atua. O le manatu i lenei mea, e tatau ai iā i tatou uma ona utagiaina ia lapataʻiga o loo mulimuli mai e faatatau i tagata o loo i falepuipui.

I le tele o tulaga e molimau atu ai i tagata o loo i falepuipui e ala atu lea i tusi. O loo fautuaina ma le malosi le lē tatau i tuafāfine ona tusi atu i ni pagota tamāloloa, e tusa lava po o le faanaunauga o le avatu o se fesoasoani faaleagaga. O lea tiute tauave e tatau ona taulimaina e uso ua agavaa. O tuafāfine agavaa e mafai ona latou tusi atu i fafine o loo i nei nofoaga, o loo faaalia le naunau moni i upu moni o le Tusi Paia. E lē tatau ona e avatuina ni au tupe po o sau meaalofa i tagata o loo i nei nofoaga, e ui atonu o loo latou talosaga mai ai.

Pe a faaalia e le tagata o loo faafalepuipuiina le fiafia, e tatau ona tuuina atu lona suafa ma lona tuatusi i le faapotopotoga o loo i le nofoaga o loo iai le falepuipui. E masani lava ona malamalama lelei uso agavaa i lenā faapotopotoga i le auala e taulimaina ai tulaga eseese e ono tulaʻi mai. Afai e lē o mautinoa se faapotopotoga, e tatau la ona tuuina ia faamatalaga i le ofisa o le lālā.

Atonu e mafai e le uso ua tofia ona fai se talanoaga ma pagota ina ia suʻesuʻe ai tagata uma i le taimi e tasi. Ae peitaʻi, o gaoioiga faapitoa lea e mafai e tagata talaʻi ona faifaimea faatasi ai ma pagota e aunoa ma se faasāsāga, e lē tatau ona faia i totonu o le falepuipui. E lē gata i lea, o se faiga lē atamai mo se tagata talaʻi le asiasi atu i le falepuipui e aunoa ma le faia o ni fuafuaga lelei ma aumea vavalalata atu ma pagota.

O lea ia tatou “atamamai pei o gata, a ia fifilemu e pei o lupe” a o tatou folafola atu le tala lelei i tagata o loo i falepuipui.—Mata. 10:16.