O le Faia o Toe Asiga e Iʻu ai i Suʻesuʻega Faale-Tusi Paia
1. Aiseā e tāua ai tele le faia o toe asiga?
1 Sa faatonuina e Iesu ona ʻausoo e lē gata i le talaʻi atu ae ia ʻfai ma soo ma aʻoaʻo atu iā te i latou.’ (Mata. 28:19, 20) O le tagata talaʻi e folafola, ae e tele atu mea e faia e lē e aʻoaʻo atu. E na te faatonutonu, faamatala, ma avatu faamaoniga. O le isi auala e mafai ona tatou aʻoaʻo ai isi, o le faia o toe asiga ma le sini e amataina ai ni suʻesuʻega faale-Tusi Paia ma i latou.
2. O ai e tatau ona tatou toe asia?
2 O ai e tatau ona e toe asia? Ia faamautinoa ua e toe asia i latou uma na talia lomiga po o i latou na faaalia sina naunau itiiti i le tala lelei. Afai e te talanoa i se tagata naunau a o molimau atu i le lautele, ia taumafai e maua mai le tuatusi po o le numera o lana telefoni ina ia mafai ona atiina aʻe ai le naunau o le tagata. Ia mautinoa i le amataina o suʻesuʻega faale-Tusi Paia. Ia faaauau pea ona saʻiliʻili mo i latou e talia le ofo e suʻesuʻeina ai le Tusi Paia, ma e lē taumatea o le a e mauaina i latou.—Mata. 10:11.
3, 4. O le ā e aofia ai i le faia o toe asiga uigā?
3 Ia Faaalia le Naunau Totino: O le sauniuni mo le faia o se toe asiga uigā e faia lea i le uluaʻi asiasiga. O faievagelia e taulau manuia e latou te mātauina mea e fiafia iai lē e ona le fale, ma e latou te faaaogāina e fai ma manatu autū e faalautele ai le talanoaga. O nisi ua latou iloaina le aogā o le faatuina o se fesili i le faaiʻuga o le talanoaga ina ia faaosofia ai le naunau o lē e ona le fale mo le isi asiasiga. O lo tatou naunau moni i tagata, e tatou te manatua ai pea i latou e oo lava i le taimi e tatou te tuua ai le fale, ma e uunaia ai i tatou e toe asia i latou e aunoa ma se faatuai. Pe a talafeagai, ia taumafai e toe vave asia a o faaalia e le tagata le naunau—atonu i le aso e sosoo ai pe lua foʻi ni aso.
4 Pe a faia toe asiga, ia taumafai e sosoo le manatu mai le lua talanoaga muamua. Ia fai ma ou sini le faamatalaina pe a ma se tasi se manatu o se mau e atiina aʻe ai i taimi taʻitasi ma ia taumafai e faalogologo lelei. Ia taumafai e faamasani lelei i lē e ona le fale. O isi asiasiga e sosoo ai, ia tufa atu i ai upu moni mai le Afioga a le Atua ia e fesootaʻi atu i mataupu e sili ona naunau i ai.
5. O le ā se auala faigofie e mafai ona faaaogā e amata ai suʻesuʻega faale-Tusi Paia?
5 Ia Mataala i Avanoa e Fai ai Suʻesuʻega Faale-Tusi Paia: Ia faia toe asiga ma le faanaunauga e amata ai se suʻesuʻega faale-Tusi Paia. E mafai faapefea ona faia o lenei mea? Ia taʻu atu i le tagata e ona le fale e te fiafia e faamatala atu iā te ia se manatu tāua, ma suʻe i se palakalafa i le tusi o Le Poto po o le Manaʻomia e te manatu e fiafia i ai le tagata. Ia faitau le palakalafa, ona talanoa lea i le fesili ma iloilo se mau sii se tasi pe lua. E mafai ona faia lenei mea i luma o le faitotoʻa i le lima pe sefulu minute. Ia faaiʻu i le faia o le isi fesili ma faia ni faatulagaga e faaauau le talanoaga i le isi taimi e sosoo ai.
6. E mafai faapefea ona faaalia e tatou te talisapaia le tāua o le faia o toe asiga?
6 O le atiina aʻe o tagata naunau uma e tatou te feiloaʻi i ai, o se vala tāua lea i la tatou faiva. O lea, ia faaavanoa ese se taimi i lau faasologa o le vaiaso e faia ai au toe asiga. O le faia faapea o le a atili ai ona uigā lau faiva ma aumaia ai se fiafiaga moni.