Ia Vivii iā Ieova e Ala i le Molimau Atu Lē Fuafuaina

¹ E saʻili e auauna faamaoni a Ieova avanoa e vivii atu ai iā te ia i aso taʻitasi. (Sala. 96:2, 3; Epe. 13:15) O se tasi o auala e tatou te faia ai lenā mea o le talaʻi lē fuafuaina. E toʻatele tagata tapuaʻi o Ieova i aso nei ua lotofaafetai i le faailoaina atu o le tala lelei e nisi iā i latou e ala i le molimau lē fuafuaina.

² O le molimau atu lē fuafuaina i se tagata, e masani ona tatala ai le avanoa mo isi ina ia faalogo ai i le feaʻu o le Malo. O se faataʻitaʻiga, o le talanoaga a Iesu ma le fafine Samaria i le vaipuna o Iakopo sa mafai ai e le isi toʻatele ona faaalia le naunau fiafia i le tala lelei. (Ioa. 4:6-30, 39-42) A o iai Paulo ma Sila i le falepuipui i Filipi, na la talaʻi atu ai i lē na vaaia le falepuipui ma sa talia e lenei tamāloa ma lona ʻauaiga atoa le upu moni.—Galu. 16:25-34.

³ Avanoa: O ā avanoa o loo e mauaina e molimau atu ai lē fuafuaina? O nisi e molimau atu lē fuafuaina pe a ō e faatau, feoaʻi i auala o femalagaaʻiga i le lautele po o le taimi o loo faatalitali ai e vaai le fomaʻi. O isi ua mafai ona talaʻi atu i taimi o mālōlōga i galuega po o aʻoga. O le iai o se tasi o a tatou lomiga faale-Tusi Paia i se mea e iloagofie atu ai, e ono uunaʻia ai isi e fesili e faatatau i o tatou talitonuga.—1 Pete. 3:15.

⁴ Le Auala e Amata Ai: O se teineitiiti matamuli e fitu tausaga, sa faalogo o ia i le sauniga i le tāua mo tagata uma ona talaʻi. Ina ua ō atu ma lona tinā e faatau, sa ia tuuina ni polosiua se lua i lana ato. A o pisi lona tinā mo le totogiina o le la faatauga, na ofo atu ai e lenei teineitiiti se polosiua i se fafine, o lē sa taliaina ma le fiafia. Ina ua fesiligia o ia i lona lototele e talanoa atu ai i le fafine, na faapea mai lenei teineitiiti matamuli: “Na ona ou faapea a, Sauni, amata, alu loa! Ia ma ou fai atu loa!”

⁵ Ina ia molimau atu lē fuafuaina, e manaʻomia e i tatou uma le faanaunauga lea na i le teineitiiti. O le ā e mafai ona fesoasoani iā i tatou? Ia tatalo mo le lototele ina ia tautala atu ai. (1 Tesa. 2:2) Ia mafaufau i se fesili po o se manatu i se mataupu e fiafia iai le tagata e amata ai se talanoaga. Ona faatuatua lea o le a faamanuia e Ieova au taumafaiga.—Luka 12:11, 12.

⁶ O le talaʻi atu lē fuafuaina i tagata e tatou te feiloaʻi i ai i aso taʻitasi, e aumaia ai le viiga iā Ieova ma tatou maua ai le olioli. Atonu e fesoasoani ai i se tasi ina ia maua le ala i le ola e faavavau.