Polokalame Fou o le Aso Faapitoa o Fonotaga

E tele ni faamatalaga o loo mafai ona maua i aso nei e faatatau i le tausia o o tatou fatu i se tulaga mālōlōina lelei, ina ia maua ai se soifuaga e sili atu ona fiafia ma faafualoa. Ae sili atu ona tāua le tulaga o loo iai o tatou loto. O lea maʻeu le talafeagai o le matua o le polokalame o le aso faapitoa o fonotaga e amata iā Setema 2003: ‘Auauna iā Ieova ma le Loto Atoa.’ (1 No. 28:9) O le ā o le a tatou tulimataʻia e aʻoaʻoina?

O le a talanoaina e le ovasia o le matagaluega le mataupu “Fesoasoani i Isi e Auauna iā Ieova ma le Loto Fiafia.” O le a faamatilatila i faatalanoaga le olioli e maua mai le taumafai e ati aʻe le naunau o tagata i le upu moni ma amata suʻesuʻega faale-Tusi Paia ma tagata o loo mananaʻo e auauna iā Ieova. O i latou uma e auai, e mautinoa o le a maua faamalosiauga ma faalaeiauga mai le lauga muamua a le failauga asiasi, “Ia Leoleoina o Tatou Loto i se Lalolagi Tumu i Faalavelave.” O le vaega i le taeao o le a faaiʻu i le lauga o le papatisoga.

I le aoauli, o le vaega “Ia Avatu le Fesoasoani” o le a talanoaina ai le auala e tatou te fesoasoani ai i isi. O le ā e mafai ona faia e mātua e puipuia ai loto o a latou fanau mai taaʻina sesē ma fesoasoani iā i latou e faalatalata atu iā Ieova? O le vaega “Fesoasoani i Lau Fanau ia Fiafia iā Ieova” o le a saunia ai fautuaga aogā ma faataʻitaʻia ai le auala e mafai ona faia ai.

Po o tatou faaaogāina avanoa uma o loo saunia e Ieova e tausia ai o tatou loto i se tulaga mālōlōina lelei ma le malosi? O le lauga mulimuli a le failauga asiasi, “Ia Faatumauina se Loto Atoa i le Auaunaga iā Ieova,” o le a taulaʻi atu i vala tāua e fā o la tatou faasologa masani mo le tausia o lo tatou tulaga faaleagaga. O le ā le tele o lo tatou taimi ma taumafaiga e tatou te faaalu mo le faia o tatalo faatauanau, le suʻesuʻeina o le Afioga a le Atua, talaʻi atu ma le maelega, ma le auaufaatasi ma isi Kerisiano? Pe mafai ona tatou faaleleia nisi o nei vala?

Ua faasafua mai e Ieova le valaaulia e faapea: “Uaʻi mai lou loto i mea e aʻoaʻoina, ma ou taliga i upu e poto ai.” (Faata. 23:12) Ia fuafua nei e auai i lenei aso tāua o aʻoaʻoga faale-Tusi Paia. O le faia faapea, e faamalosia ai oe e faaauau ona auauna iā Ieova ma le loto atoa ma le fiafia.