Ia Oofu Outou i le Lotomaulalo
1 Sa faalagolago iā Ieova se tama leoleo mamoe ma faatoʻilaloina ai se toa malosi. (1 Samu. 17:45-47) Sa onosaia e se tamāloa maumea ni mala na oo iā te ia. (Iopu 1:20-22; 2:9, 10) Sa tuu atu e le Alo o le Atua le viiga uma i lona Tamā mo mea na ia aʻoaʻoina atu. (Ioa. 7:15-18; 8:28) I nei faaaʻoaʻoga taʻitasi, o le vala autū lava na māfua ai, o le lotomaulalo. E faapena foʻi aso nei, e tāua tele le lotomaulalo i le faafetaiaʻia o tulaga eseese e tulaʻi mai.—Kolo. 3:12.
2 Pe a Talaʻi: I le avea ai ma faifeʻau Kerisiano, e tatou te tufa atu ma le lotomaulalo le tala lelei i ituaiga uma o tagata, e tatou te lē muaʻi faia se faaiʻuga iā i latou ona o lo latou ituaiga, aganuu, po o lo latou talaaga. (1 Kori. 9:22, 23) Afai e faaalia mai uiga lē faaaloalo o nisi pe teena ma le faamaualuga le feʻau o le Malo, e tatou te lē toe tali atu i le uiga lava lenā ae tatou te ō atu ma le onosai e saʻilia i latou ua tatau i ai la tatou feʻau. (Mata. 10:11, 14) Na i lo le taumafai e faaofo isi i lo tatou poto po o le lelei o le aʻoaʻoina o i tatou, e tatou te faauaʻi atu manatu i le Afioga a le Atua, i le amanaʻiaina e faapea e sili atu ona uunaʻia ai tagata na i lo se isi lava faamatalaga e tatou te ono fai atu ai. (1 Kori. 2:1-5; Epe. 4:12) O le faaaʻoaʻo iā Iesu, e tatou te avatu ai le viiga uma iā Ieova.—Mare. 10:17, 18.
3 I le Faapotopotoga: E tatau foʻi i Kerisiano ona ʻoofu i latou uma lava i le loto maulalo o le tasi i le tasi.’ (1 Pete. 5:5) Afai tatou te manatu i isi faapea e sili aʻe i latou i lo i tatou, o le a tatou tulimataʻia ai auala e auauna ai i o tatou uso, na i lo le faatalitalia o i latou e auauna mai iā i tatou. (Ioa. 13:12-17; Fili. 2:3, 4) O le a tatou lē manatu ai faapea e tāua tele lo tatou tulaga e lē mafai ai ona tatou ō e faamamā le Maota o le Malo.
4 O le lotomaulalo e fesoasoani iā i tatou e ʻfaapalepale ai le tasi i le tasi i le alofa’ ma o le faia faapea e faaauiluma ai le tulaga filemu ma le autasi i totonu o le faapotopotoga. (Efe. 4:1-3) O le lotomaulalo e fesoasoani foʻi iā i tatou e gauaʻi ai iā i latou ua tofia e fai ma taʻimua. (Epe. 13:17) E uunaʻia ai i tatou e talia so o se fautuaga po o se faasaʻoga e tatou te mauaina. (Sala. 141:5) O le lotomaulalo e uunaʻia ai i tatou e faalagolago iā Ieova i le faatinoina o so o se tofiga e tatou te maua i le faapotopotoga. (1 Pete. 4:11) I le pei o Tavita, e tatou te amanaia e faapea, o le taulau manuia e lē faalagolago i le tomai faaletagata ae i le faamanuiaga a le Atua.—1 Samu. 17:37.
5 I Luma o le Silafaga a lo Tatou Atua: I nei mea uma, e manaʻomia ona ʻfaamaulalo i tatou i lalo o le aao malosi o le Atua.’ (1 Pete. 5:6) Afai ae tatou fesagaʻi ma tulaga faigatā, e tatou te moomoo mo le mapusaga lea o le a aumaia e le Malo. Peitaʻi e tatou te faaalia ma le lotomaulalo le onosai, ma faatalitali iā Ieova e na te faataunuuina ana folafolaga i lana taimi atofaina. (Iako. 5:7-11) E pei lava o le tulaga moni na oo iā Iopu o lē na tausia le faamaoni, o le mea e aupito sili ona manatu mamafa i ai o le ʻfaamanūina lea o le suafa o Ieova’—Iopu 1:21.
6 O le perofeta o Tanielu sa ʻfaamaulalo o ia i lona Atua’ ma sa faamanuiaina i le mauaina o le finagalo malie o Ieova ma le tele o faaeaga matagofie o le auaunaga. (Tani. 10:11, 12) O lea la, seʻi o tatou faia foʻi faapena i le oofu i le lotomaulalo, i le iloa faapea, “O le taui o le faamaulalo [lotomaulalo] ma le mataʻu iā Ieova, o le oloa lea, ma le viiga, ma le ola.”—Faata. 22:4.