Suʻesuʻeina o le Tusi Tapuaʻi i le Atua
Ua faatulagaina le tusi Ia Tapuaʻi i le Atua Moni e Toʻatasi e fai ai suʻesuʻega a tagata fou, pe a uma ona suʻesuʻeina le tusi o le Poto. O lo tatou iloiloina o lenei lomiga i Suʻesuʻega Tautusi a le Faapotopotoga, o le a faaauupegaina ai i tatou e faaaogā lenei meafaigaluega i le faiva ma o le a fesoasoani iā i tatou e faalolotoina ai lo tatou alofa ma le talisapaia mo Ieova ma lana faalapotopotoga. E faapefea ona tatou maua atoatoa aogā mai lo tatou suʻesuʻeina o le tusi Tapuaʻi i le Atua?
Faia o le Suʻesuʻega: Ona o le a tatou iloiloina se mataupu atoa i vaiaso taʻitasi, e manaʻomia la ona faasoasoa lelei e ovasia o suʻesuʻega tautusi le taimi o le suʻesuʻega. O le a latou mananaʻo e faagasolo le suʻesuʻega e aunoa ma se talanoaga auiliili a o talanoaina palakalafa amata ina ia faasaoina ai le taimi mo manatu tāua, lea e masani ona iai i vaega mulimuli o le mataupu. O le talanoaina puupuu o le pusa fesili i le faaiʻuga o suʻesuʻega taʻitasi, o le a fesoasoani i ē o loo iai i le suʻesuʻega e manatua ai manatu autū.
Pe tusa o le ʻafa o mataupu o le tusi Tapuaʻi i le Atua o loo iai fesili mo talanoaga ma manatunatu loloto ai. O loo iai se faaaʻoaʻoga i le itulau e 48-49. E lē manaʻomia ona faitau na fesili faatasi ma palakalafa. Pe a talanoaina na fesili ma le vaega, e tatau i le ovasia ona faitauina mau o loo sii mai ma talanoaina pe a lava le taimi.
Sauniuni Muamua: O le sauniuni lelei mo le suʻesuʻega e sili atu mea e fai na i lo le tau ina vase o tali. O le maumauaʻi e manatunatu loloto i mau ua siiina mai o le a mafai ai ona tatou saunia e lē gata o a tatou tali, ae sili atu ona tāua le saunia o o tatou loto. (Esera 7:10) E tatou te mafai uma lava ona saosaolaumea i se fetufaaʻiga o faalaeiauga e ala i le ofoina atu ma le lotomaulalo o a tatou tali.—Roma 1:11, 12.
O lo tatou suʻesuʻeina o le tusi Tapuaʻi i le Atua o le a fesoasoani iā i tatou e faalatalata atu ai iā Ieova ma saunia ai i tatou e fesoasoani iā i latou o ē e lotofaamaoni e aufaatasi ma i tatou i le tapuaʻiga iā te ia. (Sala. 95:6; Iako. 4:8) Tau ina ia tatou mauina uma aogā mai lenei sauniuniga matagofie faaleagaga.