Polokalame Fou o le Aso Faapitoa o Fonotaga
Pe a tatou vaai ma faalogo i se lapataʻiga ae lē faia, e ono ogaoga ni iʻuga e oo i ai. E sili atu ai la ona tāua le gaoioi i taʻitaʻiga faaleagaga ua saunia mai e Ieova. O le a faamamafaina lenei manatu i le polokalame o le aso faapitoa o fonotaga i le tausaga faaleauaunaga o loo sau. O le matua ‘Pe Faapefea la Outou Faalogo.’—Luka 8:18.
O le a iloiloina e le failauga asiasi mai i lana lauga muamua, ia le auala e faatatauina ai iā i tatou i aso nei fautuaga o loo i mataupu amata o le tusi na faagaeeina Paulo e le Atua e tusi i Eperu. I le lauga faaiʻu, “Ia Faalogo e Lē Aunoa i Faatonuga Mai le Atua,” o le a fesoasoani le failauga asiasi mai i tagata uma e iloiloina po o latou faalogo moni atu iā Ieova, lona Alo, ma “le auauna faamaoni ma le mafaufau.”—Mata. 24:45.
E iai ni vaega i le polokalame o le a aogā faapitoa i aiga. O le lauga, “O Aiga e Faalogo Atu i le Afioga a le Atua e Aunoa ma le Tosina Ese Atu” o le a fesoasoani iā i tatou e ʻalofia ai mea a le lalolagi lea e faaitiitia ai le tupu aʻe o lo tatou itu faaleagaga. O le a aofia ai ni faatalanoaga o i latou ua faia ni suiga ina ia tuu faamuamua ai mea faaleagaga i o latou olaga. O le lauga, “Le Auala e Faamalosia ai o Tatou Talavou i le Faalogologo Lelei i le Afioga a le Atua” o le a aofia ai ni faatalanoaga o talavou ua faaalia lo latou faamaoni i le upu moni i le aʻoga, iā latou aumea, po o le faiva. O le lauga, “Le Fanau Iti o Ē Faalogo i le Atua ma Aʻoaʻoina Mai Ai” o le a fesoasoani iā i tatou ia lē manatu māmā ai i le tomai o fanau laiti e aʻoaʻo ai mea. O le faatalanoaina o fanau ma o latou mātua o le a fesoasoani iā i tatou e vaai ai i aogā e maua mai le toleniina o fanau mai lava o laiti i ala o Ieova.
A o faia e Satani le gaoioiga o le “faasesē i le lalolagi uma,” o loo faaalia e Ieova i ana auauna faamaoni le auala e ao ona latou savavali ai. (Faaa. 12:9; Isa. 30:21) Ia uaʻi atoatoa atu i ana fautuaga ma gauaʻi e faatatauina i o tatou olaga e tatou te popoto ai, ma aumaia ai iā i tatou le fiafia, ma taʻitaʻia ai i le ola e faavavau.—Faata. 8:32-35.