Ia Tausia se Uiga Faanatinati!
1 Sa silafia e Iesu ua utiuti lona taimi i le lalolagi e faataunuu ai le galuega a lona Tamā. (Ioa. 9:4) O lea, na ia faia ai lana faiva ma se uiga faanatinati, ma sa ia toleniina foʻi ona soo ina ia faia faapea. (Luka 4:42-44; 8:1; 10:2-4) Na te leʻi faatāuaina pe faamuamua mea faaletino ia sa sologa lelei ai le soifuaga. (Mata. 8:20) O le māfuaaga lenā, na mafai ai ona ia faauma le galuega na tuuina mai e Ieova iā te ia e fai.—Ioa. 17:4.
2 Ua Utiuti le Taimi: Ua utiuti foʻi le taimi e talaʻi ai le tala lelei i “le atu laulau uma.” (Mata. 24:14) Ua faaalia e valoaga lo tatou matuaʻi lalata tele atu i le taimi o le iʻuga. Ua lē o toe umi nei se taimi o totoe mo “ē ua lē iloa le Atua, ma ua lē anaana i le tala lelei a lo tatou Alii o Iesu. E faasalaina i latou lava i le fanoga faavavau lava.” (2 Tesa. 1:6-9) O le a matuā faafuaseʻi lava ona oo mai lenā faamasinoga. (Luka 21:34, 35; 1 Tesa. 5:2, 3) Ua tatau nei ona iloa e tagata lo latou tulaga lamatia. O lo tatou tiute la le fesoasoani atu i nei tagata ia saʻilia le finagalo malie o Ieova, a o maua le taimi.—Sefa. 2:2, 3.
3 Ia Fai Mea Uma Tatou te Mafai: O le iloa faapea ua “itiiti ona aso ua totoe,” ua faamuamua ai e auauna a le Atua le galuega talaʻi. (1 Kori. 7:29-31; Mata. 6:33) Ua tuua e nisi avanoa e maua ai le tele o le tamaoaiga po o ni galuega, ina ia faatele ai so latou sao i le faiva. (Mare. 10:29, 30) Ua faaauau e isi ona ‘alualu lo latou faamalosi i le galuega a le Alii’ e ui i le feagai ai ma puapuaga. (1 Kori. 15:58) Ua faitau fia sefulu tausaga o folafola atu pea e le toʻatele le tala lelei e aunoa ma le faalotolotolua. (Epe. 10:23) E matuā faatāua e Ieova na faataulaga o loo fai ina ia lagolagoina ai manaʻoga o le Malo.—Epe. 6:10.
4 O le faaautū o o tatou olaga i le tapuaʻiga iā Ieova lea e aofia ai ma le galuega talaʻi, e fesoasoani iā i tatou e teufatu ai le lata tele mai o le aso o Ieova. E puipuia ai i tatou i le tosina ese atu e le lalolagi a Satani ma faamausalīina ai la tatou faaiʻuga ia tausia amioga mamā. (2 Pete. 3:11-14) O le mea moni, o le faia o la tatou faiva ma se uiga faanatinati e mafai ona faasaoina ai i tatou, ma i latou e faalogologo iā i tatou.—1 Timo. 4:16.