Pe e Mafai Ona E Fesoasoani Atu?
1 O loo silasila e lē aunoa Ieova i ni auala e fesoasoani ai i ana auauna faamaoni. (2 No. 16:9; Isa. 41:10, 13) I le faatusaina o Ieova i se leoleo mamoe alofa, na tusi ai Isaia e faapea: “Na te sapaia tamaʻi mamoe i ona lima, ma tauave i latou i lona fatafata; na te taʻitaʻi filemu i mamoe ua fananau.” (Isa. 40:11) Seʻi iloilo la nisi o auala e tatou te faataʻitaʻi ai i le naunau mai o Ieova.
2 Ia Faalautele Atu le Fesoasoani i Ē Fou: E tatou te faalautele atu le fesoasoani e ala i le valaaulia o ē fou e olioli ma i tatou i auaufaatasiga e ati aʻe ai. (Faata. 13:20) O le toe tomānatu i auala na faalautele atu ai le fesoasoani a isi iā te ia ina ua amata ona ia auaufaatasi ma le faapotopotoga, na faapea mai ai se uso: “O nisi o taimi e faaaofia ai ma aʻu i se suʻesuʻega faaleaiga a se tasi o aiga. A o oʻu agaʻigaʻi i luma, sa valaaulia aʻu e lē aunoa e se ulugalii paeonia e matou te talaʻi mo ni aso atoa i le faiva. E ese le manaia o a matou talanoaga faaleagaga e fai.” Na ia toe faaopoopo mai: “A o leʻi avea aʻu ma Kerisiano, sa masani ona ou tafao i pō o Aso Faraile ma Aso Toonaʻi. Ae o taimi o loo oʻu faaaluina ma uso, e faamalieina ai loʻu naunau mo ni faatasitasiga.” O le naunau alofa o le faapotopotoga na fesoasoani i lenei uso e mauaa ai ma faatumauina i le faatuatua, ma o loo auauna nei o ia o se sui o le aiga Peteli.—Kolo. 2:6, 7.
3 Ia Fefaamāfanafanaaʻi le Tasi i le Isi: Atonu e tatou te iloa se avanoa e faalautele atu ai se fesoasoani pe a feagai o tatou uso ma tulaga faigatā. Pe e mafai ona e faia se fuafuaga e molimau atu ai ma se tagata talaʻi e lē atoatoa le malosi e ala i le telefoni, po o le valaaulia o ia e te lua ō i sau suʻesuʻega faale-Tusi Paia, pe atonu e aumai lau tagata aʻoga i lona fale? Pe e lē talisapaia ea e se matua e iai sana fanau se fesoasoani a o auai i le faiva? Po o iai nisi e matamumuli o le a latou taliaina lau fesoasoani i le faia o toe asiga, po o le auai foʻi i nisi o vala o le faiva? O le naunau i o tatou uso o le a uunaʻia ai i tatou e vaai i auala e ati aʻe ai i latou.—Roma 14:19.
4 A o tatou faataʻitaʻi i le manatu mamafa o Ieova mo ana auauna, e tatou te faamalosiau ai le tasi i le isi, ma fesoasoani ia iai le agaga o le alofa i le faapotopotoga, ma viia ai lo tatou Tamā i le lagi.—Efe. 4:16.