Ia Oo Atu i le Tele o Tagata e Mafai Ai
1. O le ā na faia e uluaʻi Kerisiano ia oo ai i le tele o tagata e mafai ai ma le tala lelei?
1 Na filigā uluaʻi soo o Iesu i le folafolaina atu o le feʻau o le Malo. Na latou faaaogāina ni auala talafeagai ina ia oo atu ai le tala lelei i le tele o tagata e mafai ai. Sa tusia e le ʻau tusitala Kerisiano o le Tusi Paia a latou tusitusiga i le gagana masani a Eleni, o le gagana lenā na tautatala ai atunuu na i lalo o le Emepaea a Roma. E lē gata i lea, o tagata talaʻi maelega o le senituri lona lua ma le lona tolu T.A. faasolo mai ai, atonu o i latou ia na muaʻi faaaogāina se tusi e fai ona itulau, lea sa sili atu ona faigofie na i lo le faaaogā o se tusi tāʻai e suʻe ai faamatalaga.
2, 3. (a) Ua faapefea ona faataunuuina i aso nei le Isaia 60:16? (e) Ua faapefea ona faaaogā faiga faaonapōnei e faaauilumaina ai le tapuaʻiga moni?
2 Faaaogāina o Faiga Faaonapōnei: Na folafola mai e Ieova e ala i lana perofeta o Isaia e faapea: “E te susu i le suāsusu o nuu ese.” (Isa. 60:16) O le faataunuuga i aso nei o lenei valoaga, ua faaaogā ai e auauna a Ieova punaʻoa tāua mai i nuu ese, e faaauilumaina ai le galuega talaʻi. O se faataʻitaʻiga, i le tausaga e 1914, na amata ai ona faaali e Tagata Aʻoga o le Tusi Paia le “Ata o le Tala o le Foafoaga” a o leʻi tāitai ona faia ni ata gaoioi e iai leo. O lenei ata gaoioi faatasi ai ma ata lē gaoioi, e valu itula le umi, e lanu ma e iai le leo, na avatu ai se molimau uigā i le faitau miliona o tagata.
3 I aso nei, ua faaaogā e tagata o le Atua masini lomitusi e maoaʻe le televavave, ma mea faigaluega ua faakomepiuta e lomia ai Tusi Paia ma lomiga faale-Tusi Paia i le faitau selau o gagana. O faiga televavave tau felaʻuaʻiga ua avatu ai lomiga faale-Tusi Paia i vaega mamao o le lalolagi, ma oo atu ai i tagata i atunuu e 235. E ala i lona agaga, ua uunaʻia ai e Ieova ana auauna e faaaogā lelei faiga faaonapōnei ia mauaina ai upu moni o le Tusi Paia, e le tele o tagata e leʻi faapea ona iai muamua.
4. O ā ni fetuutuunaʻiga ua faia e nisi i o latou olaga, ina ia oo atu ai i le tele o tagata ma le tala lelei?
4 Fetuutuunaʻiga a le Tagata Lava Ia: Ua timaʻia foʻi tagata tapuaʻi moni e faia ni fetuutuunaʻiga a le tagata lava ia ina ia tele tagata e oo atu i ai ma le tala lelei. E toʻatele tagata ua faafaigofie o latou olaga ina ia faatele ai se sao i le galuega talaʻi. Ua uunaʻia nisi e ō atu e auauna i mea o loo tele ai le manaʻoga mo tagata talaʻi o le Malo. Ua faalautele atu e nisi la latou faiva e ala i le aʻoaʻoina o se isi gagana.
5, 6. O le ā e ao ona fai e oo atu ai i le tele o tagata e mafai ai i le oganuu a le faapotopotoga?
5 E lē gata i lea, e mafai foʻi ona tatou oo atu i le tele o tagata ma le tala lelei e ala i le talaʻi atu i taimi e iai tagata i fale ma nofoaga e maua i ai tagata. Afai e masani ona lē maua tagata i la outou oganuu a o faagasolo le aso, pe faamata e mafai ona fetuunaʻi lau faasologa ina ia molimau atu i taimi o le afiafi? Pe e iai ni nofoaga faitele e mafai ona molimau atu ai? Pe na e faataʻitaʻia le molimau atu i telefoni ma oganuu o pisinisi? Po o e tulimataʻi avanoa e te molimau atu ai lē fuafuaina?
6 Maʻeu se faaeaga ua iā i tatou e fai ai se sao i le galuega mataʻina o le molimau atu e faatatau i le suafa o Ieova ma le Malo! Seʻi o tatou faaauau ona tufa atu upu moni o le ola mai le Afioga a le Atua, i le tele o tagata e mafai ai.—Mata. 28:19, 20.