Fesoasoani i Lau Fanau ia Agaʻigaʻi i Luma i le Faiva
1 E felagolagomaʻi mātua Kerisiano i le tiute tauave tāua o le toleni o a latou fanau i le faiva mai lava a o laiti. E eseese auala e mafai ona faataunuuina ai lenei mea. E mafai e nisi tamaiti ona latou taulotoina se mau o le Tusi Paia a o leʻi mafai ona latou faitau. E iai se aafiaga malosi o lenei mea i ē o loo faalogologo mai. Ma a o agaʻi ina matutua, o le a sili atu mea latou te mafai ona fai a o auai i le faiva. E faapefea e outou mātua ona fesoasoani i a outou fanau e auai i le avatuina o se molimau? Atonu e mafai ona fesoasoani atu fautuaga o loo mulimuli mai.
2 Pe a uma se faafeiloaʻiga, e te ono faapea atu:
◼ “O loʻu atalii, [taʻu lona igoa], o loo iai se mau tāua lava o loo ia manaʻo e te faafofoga mai i ai.” E ono faapea atu le tamaitiiti: “Ua ou aʻoaʻoina i le mau lenei i le Salamo le suafa o le Atua. [Faitau e le tamaitiiti po o le tauloto atu le Salamo 83:18.] O loo talanoa mekasini nei e faatatau i mea o le a faia e Ieova le Atua mo i tatou. Pe e te finagalo e tuu mo oe?” E mafai ona e faaiʻu le talanoaga i le faamatala i ai o le auala o loo lagolagoina ai le galuega i le lalolagi aoao.
3 Po o lou faia foʻi o le faafeiloaʻiga lenei:
◼ “Talofa lava. O loo oʻu fesoasoani i loʻu afafine, [taʻu lona igoa], e faaalia lona manatu mamafa i isi o loo i totonu o le alaalafaga nei. O loo manaʻo o ia e taʻu atu se feʻau puupuu o le Tusi Paia iā te oe.” E ono faapea atu le teine: “O se tasi o auala ou te manaʻo e fesoasoani ai i tagata, o le taʻu atu lea o le faamoemoe i le lumanaʻi o loo aumai i le Tusi Paia. [E faitau e le teineitiiti po o le tauloto atu foʻi o le Faaaliga 21:4.] O loo faamalamalama e mekasini nei mea o le a faia e le Malo o le Atua mo i tatou. Ou te manatu o le a e fiafia e faitau i ai.”
4 O le faaaogāina pea o se taulimaga faigofie, o le a lagonaina ai e fanau le mautinoa i lo latou tomai e taʻu atu ai le feʻau o le Malo. O le faia o ni faataʻitaʻiga e faataʻitaʻi ai le manino o le tautala ma talafeagai le leo e tautala atu ai, o le a aʻoaʻoina ai i latou e tautala atu i so o se tulaga. O le muaʻi sauniuni lelei ma se faamālō moni e fai atu i ai, o le a fesoasoani i fanau iti e faaali atu lo latou faatuatua.
5 O faalaeiauga faapena, ua toʻatele ai fanau laiti ua agavaa e avea o ni tagata talaʻi e leʻi papatisoina. Maʻeu se olioli i le vaaia o a tatou fanau o faia ni agaʻigaʻi i luma i le faiva faa-Kerisiano!—Sala. 148:12, 13.