Ia Taʻutaʻu Atu le Mamalu o Ieova
1 Na faalauiloa atu e le faisalamo e faapea: “Ia outou pepese atu iā Ieova i le pese fou; le lalolagi uma e, . . . Ia outou taʻutaʻu atu lona mamalu i nuu ese, ma ona vavega i nuu uma lava.” A o tatou manatunatu i mea ua faia e Ieova, ma mea o le a ia faia mo i tatou, e uunaʻia ai i tatou e o tatou loto e taʻutaʻu atu lona mamalu!—Sala. 96:1, 3.
2 I la Tatou Faiva: Ua faaeaina Molimau a Ieova e tauaveina le suafa o le Atua ma viiviia i le lalolagi atoa. (Mala. 1:11) Pagā se eseesega ma taʻitaʻi lotu ia ua latou aveese ma le faamaualuga le suafa o le Atua mai i a latou faaliliuga o le Tusi Paia! Ua faanatinati le galuega o le faalauiloa atu o le suafa o le Atua, ona e ao ona valaau atu ma le faatuatua tagata i le suafa o le Atua ina ia faaolaina i le puapuaga tele o loo fotuaʻi mai. (Roma 10:13-15) E lē gata i lea, o le filemu i le aoao o mea e aofia ai ma ē o loo aināina le lalolagi, e faalagolago i le faapaiaina o le suafa o le Atua. Ioe, o mea uma na faia e le Atua e fesootaʻi atu i lona suafa.
3 “E silisili Ieova, e tusa foʻi ona matuā viia o ia.” Ae peitaʻi, ina ia “avatua iā Ieova le viiga o lona suafa,” e ao i tagata ona latou iloa le mea moni e faatatau iā te ia. (Sala. 96:4, 8) Ae peitaʻi, ua teena e nisi le manatu faapea o loo soifua le Atua. (Sala. 14:1) Ua tuuaʻia o ia e isi faapea e vaivai, po o lo latou fai mai foʻi e lē o naunau mai i mataupu faaletagata. O lea la, a o tatou fesoasoani atu i tagata lotofaamaoni ia maua le poto saʻo e faatatau i Lē na faia i tatou, lona finagalo, ma ona uiga mataʻina, ua tatou viiviia ai Ieova.
4 E Ala i a Tatou Amio: O le ola e tusa ai o tapulaa amiotonu a Ieova e faamamaluina ai o ia. Ua iloa e tagata la tatou amio lelei. (1 Pete. 2:12) Mo se faataʻitaʻiga, o le mamā ma lelei o tatou foliga vaaia e uunaʻia ai isi e fai mai ni faamatalaga lelei iā i tatou, ma maua ai le avanoa e talanoa atu ai e faatatau i aogā o le ola e tusa ai ma mataupu silisili o loo maua i le Afioga a le Atua. (1 Timo. 2:9, 10) Maʻeu lo tatou fiafia pe afai e iai nisi e latou te ‘iloa la tatou amio lelei, ma latou vivii atu ai i lo tatou Tamā o i le lagi’!—Mata. 5:16.
5 E ala iā tatou upu ma amio, seʻi o tatou viiviia ia lo tatou Atua mamalu i aso taʻitasi, ma tatou tali atu i le valaau fiafia: “Ia outou pepese atu iā Ieova, ia outou faafetaia lona suafa; ia outou talaʻi atu lana faaolataga i lea aso ma lea aso.”—Sala. 96:2.