Se Aʻoga e Fesoasoani iā i Tatou e Faia ni Faatatauga Aogā
1 A o tatou iloiloina mataupu o loo lisi mai i le Faasologa o le Aʻoga o le Faiva Faatiokarate mo le 2006, e tatou te taumafai malosi ina ia maua aogā mai aʻoaʻoga faale-Tusi Paia e ala i le faatatauina i la tatou auaunaga paia ma o tatou olaga i aso faisoo. E tatou te mananaʻo e faatatau mea ua tatou aʻoaʻoina.—Ioa. 13:17; Fili. 4:9.
2 Avatuina o Manatu: O le faasologa mo le tausaga e 2006 o loo avatu ai se minute faaopoopo e faaali mai ai manatu o le aofia e faatatau i manatu tāua o le Tusi Paia. O lona uiga, e ao ona faaeteete le uso ua tofia e faia manatu tāua o le faitau Tusi Paia ina ia māeʻa lana vaega i le lima minute ae lē o le ono minute lea sa iai muamua. O i latou e fai mai ni o latou manatu, e ao foʻi ona tagaʻi lelei i le taimi. O le mafaufau muamua, e mafai ai e le tagata o loo fai mai sona manatu ona faaali mai ni faamatalaga aogā i totonu o le 30 sekone pe itiiti ifo foʻi. Pe tusa e toʻasefulu tagata e mafai ona fai ni o latou manatu i totonu o le lima minute lea e faatulaga e fai mai ai ni manatu o le aofia.
3 Lauga e Aʻoaʻoina Ai: O manatu tāua mai le faitau Tusi Paia, ma le lauga e aʻoaʻo ai e tatau ona taulaʻi atu i aogā o le mataupu i la tatou faiva ma isi vala o o tatou olaga i aso faisoo. E tatau ona sili atu mea e faia e le failauga i lo le na ona uunaʻia o le aofia e fai ni gaoioiga. E ao ona ia faamaʻoti gaoioiga e manaʻomia ona fai, faaali le auala e fai ai, ma talanoa atu i aogā o le faia faapea. E ono faapea atu, “O le auala lea e saunia ai taʻiala mo i tatou e le mau lenei,” po o le faapea foʻi “O le auala lenei e tatou te faaaogā ai fuaiupu nei i le faiva.” O toeaina ma auauna o le faiva o loo iloa le tulaga o le faapotopotoga, e tatau ona taumafai e faia se faatatauga aogā o le mataupu i se tulaga maʻoti.
4 O le taʻua o faaaʻoaʻoga faale-Tusi Paia e ono aogā patino i le faatatauina o le mataupu. Pe a uma ona faasino atu i se faataʻitaʻiga faale-Tusi Paia, e ono faapea atu le failauga, “Atonu foʻi e te ono oo i se tulaga faapenei.” E tatau foʻi ona ia faamautinoa e so o se faatatauga o faaaʻoaʻoga faale-Tusi Paia e ao ona ōgatasi ma le uiga o le mataupu, le Tusi Paia atoa, ma manatu ua lomia e “le auauna faamaoni ma le mafaufau.”—Mata. 24:45.
5 O le poto o le tomai lea e faaaogā lelei ai le iloa ma le atamai. “O le poto o le mea sili lea.” (Faata. 4:7) A o tatou maua le poto e ala i a tatou suʻesuʻega o loo faia i le Aʻoga o le Faiva Faatiokarate, seʻi o tatou faaleleia foʻi o tatou tomai e aʻoaʻo ai isi.