Faatupu Avanoa e Talaʻi Atu Ai
1 O loo faia aʻe le faapotopotoga Kerisiano i tagata e eseese uma lava o latou tulaga. Ae peitaʻi, o loo tatou autasi i lo tatou faanaunauga e vivii atu iā Ieova. (Sala. 79:13) Pe afai ua avea faalētonu o le soifua mālōlōina po o isi toʻatugā ma mea ua tapulaa ai lo tatou folafolaina atu o le tala lelei, e faapefea la ona tatou faatupuina avanoa e talaʻi atu ai?
2 Gaoioiga Masani i Aso Faisoo: Sa faaaogā e Iesu ana feutagaʻiga ma tagata i aso faisoo e avatu ai se molimau. Na ia talanoa iā Mataio a o ia ui ane i se ofisa o lafoga, na ia talanoa atu foʻi iā Sakaio a o faimalaga, faapea ma se fafine Samaria a o ia mālōlō. (Mata. 9:9; Luka 19:1-5; Ioa. 4:6-10) I a tatou gaoioiga i aso faisoo, e mafai foʻi ona tatou suia se talanoaga masani e avea ma avanoa e molimau atu ai. O le iai o se Tusi Paia, faatasi ai ma ni sāvali po o ni polosiua, o le a uunaʻia ai i tatou e tautala atu e faatatau i lo tatou faamoemoe.—1 Pete. 3:15.
3 Po o avea ea le lē faigofie ona e fealuaʻi e taofia ai oe mai le auai i le galuega mai lea fale i lea fale? Ia mataala i avanoa e molimau atu ai pe a asiasi atu tagata mai le falemaʻi faapea ma isi e te feiloaʻi i ai. (Galu. 28:30, 31) Pe afai ua e lē mafai ona alu ese mai le fale ona o lou tulaga ua iai, po ua e faataʻitaʻia ea le molimau atu i le telefoni po o le faia o se tusi? E masani ona tusi atu se tuafafine i nisi o ona tauaiga e lē o ni Molimau a Ieova. E na te faaaofia ai ni manatu faalaeiau mai le Tusi Paia ma mea na tutupu iā te ia a o talaʻi.
4 I le Galuega po o le Aʻoga: O lo tatou faanaunauga e vivii iā Ieova, e uunaʻia ai foʻi i tatou e faatupu avanoa e tufa atu ai upu moni i le galuega po o le aʻoga. Na taʻu atu e se tagata talaʻi e valu ona tausaga i lana vasega mea na ia faitau ai i le Ala Mai! e faatatau i le masina. Ina ua iloa e lona faiaʻoga le mea na maua mai ai nei faamatalaga, sa amata loa ona ia taliaina Le Olomatamata ma le Ala Mai! i so o se taimi lava e tuuina atu ai e Molimau iā te ia. I mea o loo tatou faigaluega ai, o le tuuina o le tusi Aʻoaʻoga a le Tusi Paia i mea e mafai ona vaaia e tagata, e vave ai ona fesili mai se tagata ma tatou maua ai le avanoa e fai atu ai se molimau.
5 Pe e mafai ona e mafaufau i ni auala e faatupu ai ni avanoa e talaʻi atu ai a o fai a tatou galuega masani? I le faia o le mea sili e tatou te mafai e tusa ai o lo tatou tulaga o loo iai, seʻi o tatou taumafai i aso taʻitasi e avatu “le taulaga o le viiga i le Atua.”—Epe. 13:15.