O Aafiaga Lelei o Vitiō o Loo Avatua se Molimau
1 “Na amata mai lava ona matamata le ma tamaitiiti i le vitiō i le taimi a o leʻi mafai ona savali. E matamata ma toe matamata. Maʻeu le matagofie o le iai o ni meafaigaluega e faagaee ai le alofa mo Ieova i loto o a tatou fanau!” O lē fea vitiō lea e faamatala mai e lenei matua Kerisiano? O le vitiō ua faaigoaina Noah—He Walked With God. Na lafo atu i se ofisa o le lālā e se tinā e lē o se Molimau a Ieova, ae na matamata lana tamaitiiti i le vitiō o Noah i se isi aiga, se meaalofa e US$90 ma fesili atu i le lālā pe o iai nisi vitiō faapea mo tamaiti. O vitiō o loo saunia e le faalapotopotoga a Ieova, o loo iai se uunaʻiga malosi i ē talavou faapea foʻi i ē matutua.
2 I le Aiga: Ina ua uma se matamataga a se aiga Molimau i le vitiō o le Jehovah’s Witnesses Stand Firm Against Nazi Assault, ona faamatala mai lea e le tinā: “Na alu lenā aso atoa o oʻu mafaufau lava i le auala na fesoasoani ai Ieova i tagata e pei o i tatou ina ia mafai ona latou lavatia nei mea e sili ona mataʻutia! O le mafaufau i na mea sa ou iloa ai le matuā faatauvaa lava o oʻu faafitauli. O lo matou matamata faatasi ma le ma fanau i lenei vitiō, ua fesoasoani ai iā i laʻua e malamalama lelei i le manaʻomia ona faalagolago atu iā Ieova. Ina ua uma le ata ma matou toe talatalanoa i ai, na mafai ona ma fesoasoani i le ma fanau teine, ina ia lelei ona la tapenapena e faafoe so o se omiga ma ni sauāga la te fesagaʻia.”
3 I le Aʻoga: Na mafai e se talavou Molimau ona faamatamata lana vasega i se vaega o le ata vitiō o le Stand Firm, e fai ma vaega o lana lipoti. I taimi muamua atu, sa taʻua ai e le faiaʻoga lona lē fiafia i Molimau. Ina ua uma ona matamata le vitiō, sa ia faapea mai: “Ua matuā suia ai lava i inei oʻu manatu e uiga i Molimau a Ieova. Ou te folafola atu, o le isi taimi e toe talaʻi mai ai i loʻu fale, o le a ou faalogologo atu iā i latou, ma amata sa matou suʻesuʻega faale-Tusi Paia!” O le ā na suia ai ona manatu e uiga iā i tatou? Na ia faapea mai, ona o lo tatou “alofa moni ma le faamaoni.”
4 I le Faiva: Na feiloaʻi se tuafafine ma se fafine sa musu e talia lomiga, ae sa iai ni ana fesili e faatatau iā i tatou ma o tatou talitonuga. Na toe asia e le tuafafine, ma avatu i ai le vitiō o le Jehovah’s Witnesses—The Organization Behind the Name e matamata ai le fafine ma lana tane. Na matuā taufai ofo uma le ulugalii i le ata, ma la mananaʻo ai e suʻesuʻeina le Tusi Paia. Talu ai se molimau lelei na tuuina atu iā i laʻua, na amata ai loa ona la ola e ōgatusa ma le finagalo o le Atua.
5 Po o e faaaogāina ea a tatou vitiō i se auala e oo ai i ni iʻuga e sili ona aogā?