Aʻoaʻo Ē Agamalu e Savavali i Ala o le Atua
1. O ā mea e aofia ai i le faia o soo?
1 I le uluaʻi senituri, sa taʻua soo o Iesu “o le Ala.” (Galu. 9:2) O le Faa-Kerisiano moni, e aofia ai le olaga atoa o se tagata. (Faata. 3:5, 6) Pe a tatou faia suʻesuʻega faale-Tusi Paia, e lē lava le na ona taʻu i tagata o aʻoaʻoga moni o le Tusi Paia. Ae e ao foʻi ona tatou fesoasoani i tagata aʻoga o le Tusi Paia ina ia savavali i ala o Ieova.—Sala. 25:8, 9.
2. O le ā e uunaʻia ai se tagata aʻoga o le Tusi Paia e tausia poloaʻiga a le Atua?
2 Fesoasoani i Tagata Aʻoga e Ati Aʻe le Alofa iā Ieova ma Iesu: E mautinoa lava le faigatā i tagata lē lelei atoatoa ona taumafai e faaōgatasi o latou mafaufauga, faamatalaga, ma amioga ma le finagalo o le Atua! (Roma 7:21-23; Efe. 4:22-24) Ae ui i lea, o le alofa i le Atua ma lona Alo, ua uunaʻia ai ē agamalu e feagai ma na faigatā. (Ioa. 14:15; 1 Ioa. 5:3) E faapefea ona tatou fesoasoani i a tatou tagata aʻoga o le Tusi Paia e ati aʻe lea alofa?
3. E faapefea ona tatou fesoasoani i tagata aʻoga e ati aʻe le alofa iā Ieova ma Iesu?
3 Ia fesoasoani i lau tagata aʻoga ia iloa moni lava Ieova. Na faamatala e se tasi uso e faapea: “E lē mafai ona alolofa tagata i se tagata e latou te lē iloa, o lea la, mai lava i le amataga o le suʻesuʻega, sa ou aʻoaʻoina aʻu tagata aʻoga i le suafa o le Atua mai le Tusi Paia, ma ou te tulimataʻi avanoa e faamamafa ai iā i latou uiga o Ieova.” O le faamatilatila o le faaaʻoaʻoga a Iesu, o se auala e sili ona lelei e faia ai faapea. (Ioa. 1:14; 14:9) E lē gata i lea, ia faaaogā lelei le pusa lea e toe autalu ai manatu i le faaiʻuga o mataupu taʻitasi o le tusi Aʻoaʻoga a le Tusi Paia, e fesoasoani i le tagata aʻoga e mafaufau loloto ai i uiga matalasi o le Atua ma lona Alo.
4. (a) Aiseā ua faigatā ai i le toʻatele o tagata aʻoga ona auai i le talaʻiga? (e) E faapefea ona tatou fesoasoani i a tatou tagata aʻoga ia amata ona auai i le faiva faa-Kerisiano?
4 Aʻoaʻo Tagata Aʻoga e Ala i Faaaʻoaʻoga Lelei: I le avea ai ma faiaʻoga, e tatou te faaalia i isi le auala e savavali ai ma le Atua e ala i a tatou gaoioiga. (1 Kori. 11:1) O se faaaʻoaʻoga, o le tele o tagata aʻoga o le Tusi Paia e lē masani i le faafeiloaʻia o tagata e lē masani ai, ina ia taʻu atu i ai o latou talitonuga. O lea la, e manaʻomia le onosai ma le tomai e fesoasoani atu ai iā i latou e ati aʻe le alofa, faatuatua, ma le loto tele lea e manaʻomia e auai ai i le galuega o le talaʻi ma le faia o soo. (2 Kori. 4:13; 1 Tesa. 2:2) O lo tatou faanaunauga e taʻitaʻia a tatou tagata aʻoga, e uunaʻia ai i tatou e lagolagosua iā i latou a o amata ona latou auai i le faiva Faa-Kerisiano.
5. E faapefea ona fesoasoani se faaaʻoaʻoga lelei i le tagata aʻoga e mātauina ai mea e aofia i le usitaia o poloaʻiga a le Atua?
5 O lau faaaʻoaʻoga e aʻoaʻoina ai tagata aʻoga i isi vala o le olaga faa-Kerisiano. Pe a e asiasi atu i se tagata maʻi po o le faafeiloaʻia ma le māfana o isi i sauniga a le faapotopotoga, e latou te mātaulia ai le auala e faatinoina ai le alofa. (Ioa. 15:12) Pe a fai sou sao i le faamamāina o le Maota o le Malo po o le faia o mea e fesoasoani ai i isi, o lona uiga la o loo e aʻoaʻoina i latou i le auala e auauna atu ai. (Ioa. 13:12-15) Pe a latou mātau mai o loo e ola i se olaga e faafaigofie mea uma, ona latou malamalama ai lea i le uiga o le “muaʻi saʻili le malo.”—Mata. 6:33, LT.
6. O le ā e maua i le fesoasoani atu i ē agamalu e auauna iā Ieova?
6 O le aʻoaʻo o isi i le Afioga a le Atua ma le faia o soo, o se galuega e tele taumafaiga e alu ai. Ae maʻeu le olioli i le vaaia o ē agamalu o ‘savavali i le upu moni’!—3 Ioa. 4.