Faaaʻoaʻo i lo Tatou Atua Fiafia o Ieova
1 E finagalo moni lava Ieova ia tatou fiafia. O lana Tusi Paia ua faatumulia ai i tatou i le naunau atu i faamanuiaga matagofie ua ia saunia mo tagata. (Isa. 65:21-25) E ao ona manino atu i isi ua tatou maua le olioli i le folafola atu o “le tala lelei silisili a le Atua [“fiafia,” NW].” (1 Timo. 1:11) O le auala e tatou te talanoa ai e faatatau i le feʻau o le Malo, e ao ona faaalia ai lo tatou fiafia i le upu moni, ma lo tatou naunau faamaoni atu i tagata o loo tatou talaʻi atu i ai.—Roma 1:14-16.
2 E moni e iai taimi e faigatā ai ona tausia se uiga fiafia. I nisi o oganuu, e toʻaitiiti lava ni tagata e tali fiafia mai i le feʻau o le malo. Atonu e iai ni aso e tatou te feagai ai ma tulaga faigatā i o tatou lava olaga. Ina ia tausia se uiga fiafia, e ao ona tatou mafaufau i le manaʻomia tele e tagata i la tatou oganuu ona faalogo, ma lagona le tala lelei o le Malo o loo tatou talaʻia. (Roma 10:13, 14, 17) O le mafaufau loloto i lenei tulaga, o le a fesoasoani iā i tatou e faaauau ai ma le olioli i le faalauiloaina atu o sauniuniga alofa a Ieova mo lo tatou faaolataga.
3 Taulaʻi Atu i Mea Lelei: E manaʻomia ona tatou mafaufau lelei i mea o loo tatou fai atu ai. E ui lava e tatou te amata le talanoaga i le taʻua o se faafitauli, po o se tala fou o loo i mafaufau o tagata, ae ia ʻalofia le saga talanoa pea i mea leaga o loo tutupu. O lo tatou tofiga, o le faailoa atu lea o le “tala lelei” o se mea e sili atu. (Isa. 52:7; Roma 10:15) O lenei tala lelei, o se feʻau e faavae i folafolaga a le Atua i se lumanaʻi manuia. (2 Pete. 3:13) O le manatuaina o lenei mea, ia faaaogā Mau e faalaeiau pe “fufusi [ai] i ē loto momomo.” (Isa. 61:1, 2) O le a fesoasoani lenā iā i tatou taʻitoʻatasi, e faatumau ai le agaga fiafia ma se uiga saʻo.
4 O le a mautinoa, e mātau e tagata o tatou uiga fiafia, a o tatou auai i le galuega talaʻi. O lea la, seʻi o tatou faailoa atu le tulaga o lo tatou Atua fiafia o Ieova, a o tatou auai i le talaʻia atu o le tala lelei o le Malo i tagata i la tatou oganuu.