Polokalame Fou o le Fonotaga Matagaluega

E manaʻo le lalolagi ia tatou talitonu o le a tumau e faavavau mea o loo faia ai. Ae e ese le mea ua taʻu mai i le Afioga a le Atua iā i tatou. (1 Ioa. 2:15-17) Ua fesoasoani ia tatou iloa e lē aogā le faaputuina o ʻoa o le lalolagi. Ina ia faamalosia tagata o le Atua, o le a fesoasoani le polokalame o le fonotaga matagaluega mo le tausaga faaleauaunaga e 2007, e talanoaina le matua, ‘Ia Toloʻaʻi ʻOa i le Lagi.’—Mata. 6:19, 20.

O le mafaufau i mea faitino, e aofia i mea o loo faasino ai le Efeso 2:2, o le ‘pule i le va nimonimo, o le agaga lea o loo matuā galue nei i ē ua faalogogatā.’ E pei lava ona iai le ea i so o se mea e mānavaina, ua faapena foʻi ona taatele “le agaga o lenei lalolagi.” (1 Kori. 2:12) Talu ai e malolosi ona aafiaga, ua taʻua ai faapea o loo iā te ia le ‘pule.’ O le a fesoasoani iā i tatou le polokalame fou o le fonotaga matagaluega, e ʻalofia le mafaufau i mea faitino o le lalolagi, ma taulaʻi ai i mea e sili ona tāua. (Mata. 6:33) O le a fesoasoani foʻi le polokalame iā i tatou e faalagolago iā Ieova a o faia le auaunaga, e ui i omiga ma tofotofoga e fesagaʻia.

Ia faamautinoa ua e auai i aso uma e lua, ma ia ‘atili ona e naunau’ e uaʻi atu. (Epe. 2:1) Ia fai ni faamaumauga pupuu o ni manatu e te faatatauina i lou olaga ma lau faiva. O le auai i le amataga e oo i le faaiʻuga o lenei polokalame e faaʻoaina ai faaleagaga, o le a faalaeiauina ma faamalosia ai oe e faaauau ona ‘toloʻaʻi ʻoa i le lagi’!