Faaaʻoaʻo i le Faiaʻoga Sili pe a Faaaogā le Tusi o Aʻoaʻoga a le Tusi Paia
1. Na faapefea ona aʻoaʻo atu Iesu?
1 E masani ona faamatala e le Faiaʻoga Sili o Iesu mea i se auala faigofie ma manino. Ina ia faagaee manatu o lana aofia, o nisi taimi e muamua ona ia fesili atu i ni o latou manatu. (Mata. 17:24-27) Na ia tataʻi atu o latou manatu i le Afioga a le Atua. (Mata. 26:31; Mare. 7:6) Sa faaeteete Iesu mai le soona taʻu atu o ni faamatalaga se tele i ona soo i le taimi e tasi, auā na ia silafia e faaauau ona latou aʻoaʻoina mea. (Ioa. 16:12) Sa naunau foʻi Iesu e fia iloa po o talitonu ma malamalama ona soo i mea na ia aʻoaʻoina ai i latou. (Mata. 13:51) Ua saunia le tusi o Aʻoaʻoga a le Tusi Paia e fesoasoani iā i tatou, e aʻoaʻo atu i le auala na aʻoaʻo atu ai Iesu.
2. E faapefea ona tatou faaaogāina fesili o loo faatomua ai mataupu taʻitasi?
2 Fesili Tomua: Pe a amata se mataupu, e lelei pe a uaʻi atu i fesili tomua o loo i lalo o le ulutala. Ia lāgā fesili nei e faagaee ai le naunau fia iloa o le tagata aʻoga e aunoa ma le faatalitalia o ia e fai mai sana tali. E lelei foʻi le fai i ai e fai mai ni ona manatu pupuu e uiga i nei fesili. E lē manaʻomia ona talanoaina auʻiliʻili ana tali pe faasaʻo ana tali sesē uma i lenā taimi. Atonu e tau o le faafetai iā te ia mo ona manatu ma amata loa ona iloilo le mataupu. O le a fesoasoani ona manatu i fesili tomua e te iloa ai le vaega tonu o le lesona e manaʻomia ona faamanino atili i le lua talanoaga.
3. E faapefea ona tatou faafaigofieina le suʻesuʻega?
3 Mau o le Tusi Paia: E ao ona faavae le suʻesuʻega i le Tusi Paia. (Epe. 4:12) Peitaʻi, e lē manaʻomia ona faitau uma mau o loo i le lesona. Ia faamatilatila mau o loo faavae ai o tatou talitonuga. E ono lē manaʻomia ona faitau mau ia e maua ai nisi faamatalaga faaopoopo. E faigofie lava le auala o loo faamatalaina ai le upu moni e le tusi o Aʻoaʻoga a le Tusi Paia. Ia faafaigofie le suʻesuʻega. Ia uaʻi atu i manatu tāua, ma ʻalofia le talanoaina auʻiliʻili o manatu pe talanoa i ni faamatalaga e lē fesootaʻi i le talanoaga.
4. E faapefea ona fuafua pe ao ona tatou iloiloina faamatalaga o loo i le faaopoopoga?
4 Faaopoopoga: E 14 mataupu o loo iai i le faaopoopoga e faaopoopo atu i le mataupu autū. E lē faamalosia le talanoaina o nei mataupu a o faia le suʻesuʻega. Mo nisi mataupu, e te ono filifili e faalaeiau atu i lau tagata aʻoga e faitau vaega faaopoopo nei i sona lava taimi avanoa, aemaise pe afai e malamalama ma e na te taliaina faamatalaga i le mataupu autū. O se faaaʻoaʻoga, pe a talitonu le tagata aʻoga o Iesu o le Mesia, e lē manaʻomia ona oulua talanoaina le faaopoopoga, “O Iesu Keriso, le Mesia na Folafolaina Mai” pe a talanoaina le mataupu e 4, “O Ai Iesu Keriso?” Peitaʻi e aogā i nisi taimi le talanoa o le faaopoopoga po o se vaega a o faia le suʻesuʻega.
5. Pe a tatou filifili e talanoaina faamatalaga i le faaopoopoga, o le ā le auala e fai ai?
5 Pe a e manaʻo e talanoaina le faaopoopoga, e te ono saunia ni fesili a o leʻi faia le suʻesuʻega, ona lua talanoaina lea ma le tagata aʻoga e pei lava ona faia i le mataupu autū. Po o le fua foʻi i manaʻoga o le tagata aʻoga, atonu e te filifili e faaalu ni nai minute o le suʻesuʻega e te lua autaluina ai faamatalaga. O le faia faapea, e te mautinoa ai o loo ia malamalama i faamatalaga sa ia faitauina na o ia lava.
6. E faapefea ona faaaogā le pusa autalu pe a māeʻa suʻesuʻega taʻitasi?
6 Pusa Autalu: O le pusa o loo i le faaiʻuga o le mataupu, e tele lava ina maua ai faamatalaga e tali ai fesili tomua. E mafai ona e faaaogā nei faamatalaga e autalu ai manatu autū o le mataupu. O isi tagata talaʻi ua latou iloa le aogā o le faitau faatasi ma le tagata aʻoga, o faamatalaga taʻitasi ma mau o loo aumaia ai. Ona fesili lea i le tagata aʻoga e faamatala puupuu mai pe faapefea ona lagolagoina e le mau le faamatalaga. I le faia faapea, e iloa ai e le faiaʻoga po o malamalama le tagata aʻoga i manatu autū o le lesona, pe faapefea ona lagolagoina e le Tusi Paia, ma pe na te ioeina ia manatu. E faamasani ai foʻi le tagata aʻoga e faaaogā le Tusi Paia e faamalamalama ai le upu moni i isi.
7. E faapefea ona tatou faaaogā le tusi o Aʻoaʻoga a le Tusi Paia e faataunuu ai lo tatou tofiga?
7 O le auala sili e faataunuu ai lo tatou tofiga o le aʻoaʻo o tagata ma le faia o soo, o le faaaʻoaʻo lea i le auala na aʻoaʻo ai Iesu. (Mata. 28:19, 20) E mafai ona fesoasoani le tusi o Aʻoaʻoga a le Tusi Paia i le faia faapea. Ia faaaogā lelei lenei tusi e aʻoaʻo ai isi i le upu moni i se auala manino, faigofie, ma faaoso naunau.