Ia Faaaogā ma le Uigā Vaega Eseese o le Tusi Aʻoaʻoga Moni

A o faasolosolo ona aʻoaʻoina e se tagata aʻoga ia aʻoaʻoga moni a le Tusi Paia ma faatatauina, o le a tuputupu aʻe o ia i le itu faaleagaga ma fua mai ni fua lelei. (Sala. 1:1-3) E mafai ona tatou fesoasoani i tagata aʻoga e agaʻigaʻi i luma e ala i le faaaogā lelei o nisi o vaega o le tusi Aʻoaʻoga Moni.

Fesili Tomua: E amata mataupu taʻitasi i ni fesili o loo taliina i le mataupu. E mafai ona e fai atu nei fesili faatupu manatu, ina ia faaosofia ai le naunau o le tagata mo manatu o le a oulua talanoaina. E mafai foʻi ona e valaaulia o ia e faaali puupuu mai sona manatu i nei fesili taʻitasi. E lē manaʻomia ona vave faasaʻo o ia i le taimi lava lenā, pe afai e sesē sana tali. O ana tali o le a fesoasoani iā te oe e iloa ai po o ā manatu e manaʻomia ona matuā faamalamalama ma faamanino.—Faata. 16:23; 18:13.

Faaopoopoga: Pe afai ua malamalama le tagata aʻoga ma talia manatu o loo taʻua i le mataupu autū, e mafai ona e faalaeiau o ia e autalu e ia lava ni manatu o loo i le faaopoopoga e fesootaʻi i le mataupu. I la oulua suʻesuʻega e sosoo ai, ia faaalu ni nai minute e faamautinoa ai pe ua malamalama lelei o ia. Peitaʻi, pe afai e te manatu e aogā faamatalaga o loo i le faaopoopoga i lau tagata aʻoga, e mafai la ona faaalu se taimi a o faagasolo le suʻesuʻega, e iloilo ai le faaopoopoga atoa po o se vaega, e ala i le faitau o palakalafa ma fai atu ni fesili ua uma ona e saunia.

Pusa Autalu: O pusa autalu o loo i le faaiʻuga o mataupu taʻitasi, o loo iai ni manatu e tali ai fesili tomua o loo i le amataga o mataupu. E mafai ona e faaaogā lenei vaega ina ia faamautinoa ai o loo saʻo le malamalamaga o le tagata aʻoga, ma faamatala atu ai iā te ia manatu autū. Ia faitau faatasi ma le leotele, manatu taʻitasi faapea mau o loo iai. Ia fai i le tagata aʻoga e faaaogā mai se mau (po o ni mau) e faamatala ai le māfuaaga e saʻo ai lenā manatu.—Galu. 17:2, 3.