“O le ā Sau Tali?”

1. O ā luʻi ua fesagaʻia e le toʻatele o i tatou?

¹ Pe e te naunau i le Afioga a le Atua ae ua faigatā ona e manatua ni faamatalaga i ni tala o le Tusi Paia, pe manatua foʻi po o fea o faamau ai ni faaupuga patino? Pe te manaʻo e maua e lau fanau se malamalamaga saʻo o upu moni faavae ma aʻoaʻoga a le Tusi Paia? Ua fesoasoani le mataupu “O le ā Sau Tali?” ua lomia i le itulau e 31 o le Ala Mai! i talavou ma ē matutua, ina ia faamasani atili ai i le Afioga a le Atua.—Galu. 17:11.

2. E faapefea ona faaaogā isi vaega o le mataupu “O le ā Sau Tali?”

² E faapefea ona e faaaogā lelei lenei mataupu? O loo taʻua i le Ala Mai! o Aperila-Iuni, 2006 manatu nei: “Tagaʻi i le itulau e 31 . . . E iai vaega o le a fiafia i ai le ʻau laiti, ae o le a iloilo le iloa o ē ua tele se iloa o le Tusi Paia i isi vaega. O le vaega “O Anafea na Tupu Ai?” o le a aogā e te iloa ai le faagasologa mai o tagata o loo taʻua i le Tusi Paia, ma taimi na soifua ma tutupu ai nisi o mea tāua na tutupu. O tali o le vaega “E Maua Tali i Lenei Mekasini,” e maua i mataupu eseese o le mekasini, ae o tali o isi vaega o le a lomia i se itulau o le mekasini, ae faaū i lalo le lolomiina. E lelei pe a e suʻesuʻe muamua i fesili ae e te leʻi faitau i le tali ma talanoa ma isi i mea ua e iloa mai ai. Atonu foʻi e te faaaogā le vala fou lea “O le ā Sau Tali?” e avea ma mataupu o le Tusi Paia e talanoa ai ma le aiga, faapea ma isi.”

3. Ua faapefea ona aogā i nisi o aiga lenei vaega, ma o lē fea vaega e sili ona e fiafia i ai?

³ E mautinoa e fiafia le tele o aiga e faaaogā lenei mataupu o se faavae mo a latou suʻesuʻega faaleaiga. Na tusi se tinā: “Na ma manatu ma laʻu tane o se mea lelei le faaaofia o le vaega lea e suʻe ai ata e le fanau (i le Ala Mai! faa-Peretania), ina ia ola ai la matou suʻesuʻega faaleaiga ma fiafia i ai la ma tama teine e tolu tausaga. E ese lo ma olioli e vaai atu o aumai lana ia lava Ala Mai!, ma suʻe i itulau taʻitasi seʻiloga lava ua maua le mea o loo ia suʻeina.” Na taʻua e se tamā i Pasili: “E ese lo ma fiafia ma loʻu atalii e fitu tausaga i le vaega lenei o le Ala Mai! Ua fesoasoani iā Mose e uaʻi atu, suʻe mau o le Tusi Paia, malamalama i uiga o ata, ma malamalama i le taimi na tutupu ai na mea.” Na tusi mai Ashley e valu tausaga: “Faafetai mo le vaega lenei ‘⁠O le ā Sau Tali?’ lea e i tua o le Ala Mai! Ua tele ai ni mea ua ou aʻoaʻoina e uiga i le Tusi Paia.”

4. E ono faaaogā faapefea e se aiga lenei vaega o le lomiga i a latou suʻesuʻega faaleaiga?

⁴ Aiseā e lē faaaogā ai le mataupu “O le ā Sau Tali?” mai lea taimi i lea taimi e fai ma vaega o la outou suʻesuʻega faaleaiga? E mafai ona faaaogā le Index po o le Watchtower Library i le CD-ROM e saʻili ai tali i nisi o fesili e sili atu ona faigatā. O le faia faapea, ua e aʻoaʻo ai lau fanau i le auala e faia ai saʻiliʻiliga. Afai e iai sau fanau matutua, aiseā e lē tofia ai i latou e suʻe mai tali o ni fesili e sili atu ona faigatā i le vaega “O Ai Aʻu?” po o le “O Anafea na Tupu Ai?” a o leʻi oo i le suʻesuʻega faaleaiga? O le a mafai ona latou fefaasoaaʻi iʻuga o a latou saʻiliʻiliga na faia i le taimi o le suʻesuʻega. O le faaaogā tatau o lenei itulau, o se tasi lea auala e mafai ai e mātua ona aʻoaʻo ma totō i loto o le fanau le Afioga a le Atua, ma fesoasoani iā i latou e iloa ai “tusi paia” mai lava a o laiti.—2 Timo. 3:15; Teu. 6:7.