Le Māfuaaga Tatou te Faaauau ai Pea Ona Toe Foʻi Atu

1. O le ā le fesili ua lāgā e faatatau i la tatou galuega talaʻi?

¹ I le tele o nofoaga, tatou te galueaʻiina soo ai a tatou oganuu. O loo faaauau ona tatou toe foʻi atu i aiga ua uma ona talaʻia, e tusa lava pe latou te faaalia le lē fiafia mai i la tatou galuega. Aiseā e tatou te āsia ai pea i latou ia sa lē taliaina la tatou galuega i taimi ua teʻa?

2. O le ā le māfuaaga autū o lo tatou maelega pea i le faiva?

² Alofa iā Ieova Faapea ma Tagata: O le māfuaaga autū o lo tatou maelega pea i le faiva, o lo tatou alofa iā Ieova. E uunaʻia i tatou e o tatou loto ina ia taʻu atu pea i isi mea e uiga i lo tatou Atua sili. (Luka 6:45) O lo tatou alofa mo Ieova, e uunaʻia ai foʻi i tatou e usitaia ana poloaʻiga ma fesoasoani i isi ia latou faia foʻi faapea. (Faata. 27:11; 1 Ioa. 5:3) O lo tatou tumau ma le faamaoni i le galuega talaʻi, e lē faalagolago i le tali mai a tagata. E ui lava ina sauāina Kerisiano i le uluaʻi senituri, ae sa faaauau pea ona latou talaʻi ma le “lē mapu.” (Galu. 5:42) O lea la, pe afai e lē fia faalogo mai tagata, aua tatou te faavaivai ai, ae ia tatou tutumau maumauaʻi pea, e faailoa atu ai le malosi o lo tatou alofa ma lo tatou tuutoina iā Ieova.

3. E faapefea ona fesoasoani le alofa i tagata ia tatou faaauau ai pea i le galuega talaʻi?

³ Tatou te maelega foʻi ona o lo tatou alofa i o tatou tuaoi. (Luka 10:27) E lē manaʻo Ieova ia fano se tasi. (2 Pete. 3:9) Tusa lava po o oganuu ua galueaʻiina soo, ae tatou te maua pea i ai tagata o loo mananaʻo e auauna iā Ieova. Mo se faaaʻoaʻoga, i Guadeloupe, pe ā ma le 1 mai le toʻa 56 o tagata o le atunuu, o se Molimau a Ieova. Ma i le tausaga na teʻa nei, e 214 le aofaʻi o ē na papatisoina. Ma e toeitiiti lava 20,000 i latou na auai i le Faamanatuga, o lona uiga e 1 mai le toʻa 22 o tagata o le atunuu na auai!

4. O ā ni suiga e ono tulaʻi mai i a tatou oganuu?

⁴ Suiga i Oganuu: O loo faaauau pea ona suia tagata e iai i a tatou oganuu. Atonu tatou te toe foʻi atu i le fale na lē talia ai i tatou, ua ese mai se isi tagata o le aiga o iai—atonu o se tasi e leʻi faalogo muamua lava i la tatou feʻau—ma o le a ia tatala mai le faitotoʻa ma faalogo mai iā i tatou. Pe tatou te ō atu foʻi ua ese le aiga ua iai, ma e fiafia e faalogologo. O nisi fanau sa tetee o latou mātua a o laiti ae ua matutua aʻe ma tuua aiga, atonu la o le a fia faalogo mai na fanau i le feʻau o le Malo.

5. O ā ni mea e ono faapogaia ai tagata ia sili ona fia faalogo mai?

⁵ E mafai foʻi ona suia tagata. I le taimi muamua, sa avea le aposetolo o Paulo o se tasi e “taufaifai, ma faasauā, ma faatautala.” (1 Timo. 1:13) E faapena foʻi le toʻatele o i latou o loo auauna iā Ieova i aso nei, sa avea muamua i latou ma ni tagata e lē fiafia i le upu moni. O nisi atonu sa matuā tetee mai i le tala lelei. A o suia le tulaga o mea i le lalolagi, atonu o ē sa tetee ma lē ano mai iā i tatou, ua naunau nei e faalogologo. Atonu ua sili ona fia faalogo mai nisi ona sa aafia i se mala po o ni faafitauli i le olaga, e pei o le maliu o se tasi o le aiga, le lē toe iai o se galuega, o faafitauli tau tupe, po ua faalētonu foʻi le soifua mālōlōina.

6. Aiseā e tatau ai ona tatou talaʻi pea ma le maelega?

⁶ O loo agaʻi mālie ifo lenei lalolagi i lona iʻuga, ae o loo matuā televave le faagasologa o la tatou galuega talaʻi ma le aʻoaʻo atu. (Isa. 60:22) O lea la, ia faaauau pea ona tatou talaʻi ma le maelega ma ia faatumauina pea se vaaiga mautinoa i la tatou galuega. Atonu, e iʻu lava ina e maua se isi e fia faalogo mai. E manaʻomia la ona tatou tautala atu pea! ‘⁠O lo tatou faia o lenā mea, o le a faaolaina ai i tatou atoa ma ē ua faalogo iā i tatou.’—1 Timo. 4:16.