Aiseā e Talaʻi ai Pea?

¹ Faamata ua umi se taimi o faia pea le galuega talaʻi o le Malo i lou vaipanoa? (Mata. 24:14) Afai o le tulaga lenā, e ono oo ifo la sou lagona e faapea, ua lelei ona galueaʻiina le oganuu a le faapotopotoga. Pe a e talaʻi atu i le taimi nei, atonu o le toʻatele o tagata e te feiloaʻi atu i ai e foliga ua faalēano mai i le feʻau o le Malo. E ui i lea, mātau foʻi le mea ua taʻua mai e faatatau i soo moni o Iesu, i le itulau e 141 o le tusi, Isaiah’s Prophecy II: “I nisi vaipanoa, atonu e foliga mai e laʻitiiti ni iʻuga o la latou faiva pe a fua atu i le telē o se galuega ma ni taumafaiga sa faaalu ai. Peitaʻi, o loo tutumau pea i latou.” Ae aiseā e talaʻi ai pea?

² Ia Manatua Ieremia: O lo tatou tutumau ma le faamaoni i le galuega talaʻi, e lē tatau ona fuafuaina i le fiafia o tagata e faalogo mai iā i tatou pe leai. E 40 tausaga na talaʻi ai Ieremia i le oganuu lava e tasi, e ui ina toʻaitiiti tagata na fiafia e faalogo ane iā te ia, ae o le toʻatele lava sa tetee i lana feʻau. Aiseā na finafinau ai pea Ieremia? Talu ai sa ia faia se galuega na poloaʻiina o ia e le Atua e fai, ma na avea lona malamalama i mea o le a tutupu i se taimi mulimuli ane, ma itu na uunaʻia ai o ia e tautala atu pea.—Iere. 1:17; 20:9.

³ E tai faapena foʻi i tatou. Ua ‘poloaiina i tatou e Iesu ina ia talaʻi atu i nuu, ma molitino atu, o ia lava le ua tofia e le Atua e fai ma faamasino i e o ola ma e ua oti.’ (Galu. 10:42) O le feʻau o loo tatou momoliina atu e iʻu ai i le ola po o le oti foʻi iā i latou e faalogologo i ai. O le a faamasinoina tagata e tusa ai o la latou tali mai i le tala lelei. Ona o lenā tulaga, o lo tatou tiute tauave la le faia o le mea tonu ua poloaʻiina i tatou e fai. E tusa lava pe mumusu tagata e faalogo mai, ae o lenā ua tatou maua ai le avanoa e faaalia atu le telē o lo latou alofa mo i latou, atoa ai ma lo tatou faamaoni aʻiaʻi iā Ieova, i le maumauaʻi pea e fai le mea e ao ona tatou faia. Ae o loo iai ma nisi mea.

⁴ O Loo Tatou Maua ai Aogā: E tusa lava po o le ā le tali mai a le oganuu, ae ua tatou iloa, o le faia o le finagalo o le Atua, e tatou te maua ai le filemu o le mafaufau, le lotomalie, ma le fiafiaga, lea e lē mafai ona maua i se isi lava mea. (Sala. 40:8) Ua tatou maua ni olaga e uigā moni ma iai se faamoemoe. O le tele o so tatou sao e fai i le faiva, o le atili foʻi lenā ona uaʻi atu o o tatou loto ma mafaufau i le faamoemoe ma le olioli, i le ola i le lalolagi fou a le Atua. O le mafaufau pea i nei folafolaga a le Tusi Paia, e atili faaleleia ai lo tatou itu faaleagaga, ma faamalosia ai la tatou faiā ma Ieova.

⁵ E tusa lava pe lē o vave ona tatou iloa atu ni iʻuga lelei i la tatou galuega talaʻi, ae o lenā ua totōina se fatu o le upu moni i le loto o se tagata, ma o le a tupu aʻe lenā fatu i le taimi atofaina a Ieova. (Ioa. 6:44; 1 Kori. 3:6) E leai se tasi o i tatou e iloa pe toʻafia nisi o le a latou aʻoaʻoina upu moni e uiga i le Malo, e ala i taumafaiga a tagata o Ieova i lou vaipanoa pe i isi itu o le lalolagi.

⁶ I se naunautaʻiga sa leʻi iai muamua, ua tatau ai ona tatou utagia le faatonuga a Iesu: “Ia outou, ina mataala ia, auā tou te le iloa pe oo mai afea ia aso. O le mea ou te fai atu ia te outou, ou te fai atu ai i tagata uma: Ina mataala ia.” (Mare. 13:33, 37, LF) O lea la, seʻi o tatou folafola atu pea le tala lelei o le Malo, ma faafiafiaina ai le finagalo o Ieova a o faia so tatou sao i le faapaiaina o lona suafa sili ma le paia.