Ia Faatāua lo Tatou Faaeaga!
1 E tele ituaiga o faaeaga ua faasafua mai e Ieova i ana auauna i le faagasologa mai o taimi. Ua ia tuuina mai faaeaga iā i latou e tusa lava po o le ā le ituaiga, le matua, pe faaipoipo pe nofofua foʻi. (Luka 1:41, 42; Galu. 7:46; Fili. 1:29) O ā faaeaga o loo ia faasafua mai iā i tatou i aso nei?
2 O Nisi o o Tatou Faaeaga: Ua iā i tatou le faaeaga o le aʻoaʻoina e Ieova. (Mata. 13:11, 15) O le faia o se sao i sauniga, o le isi faaeaga lenā e viia ai Ieova. (Sala. 35:18) Ia maelega pe a maua se avanoa e faia ai se sao. Pe a tatou manatu i so o se tofiga e mai le faapotopotoga o se faaeaga, o le a tatou faatinoina lenā tofiga i le mea sili tatou te mafaia. Po o tatou auai e lē aunoa i le faaeaga o le faamamāina ma le faatumauina o le tulaga lelei o le Maota mo Sauniga?
3 E ui lava e faitau miliona tagata ua taumānatu po o faafofoga mai le Atua i a latou tatalo, ae o loo tatou olioli i le faaeaga o le faafofogaina o a tatou tatalo e le Silisili Ese. (Faata. 15:29) E faafofoga mai Ieova i tatalo a ana auauna. (1 Pete. 3:12) E na te lē faatapulaaina pe faafia ona tatou tatalo atu iā te ia. Ua tatou maua se meaalofa tāua, o le mafai lea ona tatalo atu iā te ia “i aso uma”!—Efe. 6:18.
4 ‘O le ʻAufaigaluega Faatasi ma le Atua’: O se tasi o o tatou faaeaga tāua, o le folafola atu lea o le tala lelei o le Malo o se ‘ʻaufaigaluega faatasi ma le Atua.’ (1 Kori. 3:9) O lenei galuega e faamalieina ma faafouina ai. (Ioa. 4:34) E lē tau manaʻomia fua e Ieova ona faaaogā tagata e fai lenei galuega, a ua tuuina mai lenei tofiga iā i tatou e faaalia mai ai lona alofa. (Luka 19:39, 40) Ae ui i lea, e lē o soona tuuina mai e Ieova lenei faaeaga i so o se tagata. O ē ua auai i le talaʻiga, e tatau ona ausia ma tumau ai i agavaa faaleagaga. (Isa. 52:11) Pe tatou te faatāuaina lenei faaeaga e ala i le avea o le talaʻiga o se vaega tāua o a tatou meafai i vaiaso taʻitasi?
5 E faatamaoaigaina o tatou olaga i faaeaga mai iā Ieova. (Faata. 10:22) Aua neʻi faatalalē i faaeaga! Pe a faaalia o loo tatou faatāuaina o tatou faaeaga i le auaunaga, tatou te faafiafiaina ai lo tatou Tamā i le lagi, o Lē na te ‘foaʻifuaina mai mea lelei uma, atoa ma mea alofa uma e atoatoa ona lelei.’—Iako. 1:17.