Tapuaʻi iā Ieova o se Aiga
1 I vaitaimi o le Tusi Paia, sa tele ina faifaimea faatasi tagata o le aiga. Sa fai faatasi a latou feʻau, ae o le mea sili ona tāua o le tapuaʻi iā Ieova o se aiga. (Levi. 10:12-14; Teu. 31:12) I le tele o vaipanoa i aso nei, e seāseā faifaimea faatasi tagata o le aiga. Peitaʻi, e iloa e Kerisiano le tāua o le faifaimea faatasi o se aiga, aemaise lava i le tapuaʻiga. E mautinoa le faafiafiaina o Lē na amataina le aiga pe a ia silasila mai o loo autasi le aiga i le tapuaʻiga iā te ia!
2 Talaʻi Faatasi: E faamalosia le aiga pe a galulue faatasi e talaʻi le tala lelei. O lea la, e faaopoopo atu i le galulue faatasi ma le faapotopotoga i le talaʻiga, e ao foʻi i se toeaina ona galulue faatasi ma lana avā ma le fanau. (1 Timo. 3:4, 5) E ui e pisi a latou faasologa, ae ao i ovasia femalagaaʻi ona faatulaga se taimi e galulue ai ma a latou avā i le talaʻiga.
3 E mafai e mātua o loo talaʻi faatasi ma le fanau, ona fesoasoani ina ia latou agaʻigaʻi i luma o nisi e folafola atu le tala lelei. E lē gata e mātauina ai e le fanau le olioli ma le faamalieina o o latou mātua i le talaʻiga, ae latou te iloa ai foʻi le faatinoga o le alofa o o latou mātua iā Ieova ma tagata. (Teu. 6:5-7) E lē faaitiitia le tāua o le galulue faatasi o mātua ma fanau a o tuputupu aʻe tamaiti i le aiga. E fai ma masani a se ulugalii le galulue faatasi i le talaʻiga ma le la fanau tama e toʻatolu pe ā ma le 15 i le 21 tausaga le matutua. Na faapea mai le tamā: “Ma te aʻoaʻo iā te i latou se mea i taimi uma. Ma te faamautinoa o se mea latou te fiafia ma faalaeiau ai.”
4 Sauniuni Faatasi: E tele ni aogā pe a sauniuni faatasi le aiga mo le talaʻiga. E fiafia le fanau e auauaʻi e fai ni faataʻitaʻiga ma isi o le aiga, e fai isi ma tagata talaʻi, a o le isi o lē ona le fale. E faaaogā e isi ni nai minute pe a māeʻa le suʻesuʻega a le aiga e faia ai faapea.
5 E faateleina lo tatou olioli pe a tatou galulue i galuega tāua toe faamalie loto, ma ē pele iā i tatou. O se fiafiaga le galulue faatasi ma le aiga i le talaʻiga mai lea fale i lea fale, aemaise le faia o toe asiga ma le faia o suʻesuʻega faale-Tusi Paia! A o outou tapuaʻi ma lou aiga iā Ieova, e mafai ona e faapea mai ma le olioli: “A o aʻu nei ma loʻu aiga, matou te auauna iā Ieova.”—Iosua 24:15.